مصر لم تركع ... بس اتشقلبت!!

خالد الكيلاني

الحوار المتمدن-العدد: 3662 - 2012 / 3 / 9 - 09:04
المحور: كتابات ساخرة
    

الحمد لله ... مصر لم تركع للأمريكان في قضية التمويل الأجنبي، ولم يمض أسبوع على الحكم بسفر المتهمين لبلدهم، حتى صدر حكم أخر بالقبض على المتهمين وإعادتهم لمصر!!، وبما أن الرئيس أوباما مشغول في انتخابات الرئاسة تبعهم، فسوف تقوم الست هيلاري بإحضارهم لمصر ورجلها على رقبتها ... وهي محامية – وأكيد بتشوف قناة الفراعين دلوقتي - وعارفة الكلام ده كويس.
وأي واحد من القلة المندسة أو القلة المغرضة أو القلة العميلة أو "القِلَل" اللي مالية مصر يسألني طب على إيه سفروهم وعلى إيه عاوزين يرجعوهم ... أكيد مش فاهم حاجة، لأن المبادئ لا تتجزأ وحكومتنا أثبتت إنها شريفة ومحدش لمس توبها ... ومستعدة تكشف في "س 28"، والقرار ده يثبت إن القضية قايمة والكفاح دوار، وإن شاء الله حيتحكم على المتهمين كلهم بالسجن ... وساعتها نحط المصريين في الحجز، ونبعت العيش والحلاوة للمتهمين الأمريكان، وخالتي تهديهم أغنية "جاي في إيه وسافرت في إيه ... وما ريحتش عندنا ليه"، ومن ناحيتي أنا بقول للولاد الأراذل بتوع القلة المندسة والقلة العميلة وكل "القِلَل" ... جاتكم القرف مليتوا البلد.
الحمد لله ... حكومتنا طلعت شريفة، وقضائنا نزيه، وشريفة كانت أم البطل وفضلت مراة البطال، ومصر لم ولن تركع ... لأن الوضع هيبقى صعب كده قوي ... لا هو فرنساوي ولا هو بلدي!!، وحكومتنا بتعامل أمريكا معاملة الند، وعلاقتها مع أمريكا زي علاقة لميس وعمرو.
وامبارح واحد صاحبي من المعارضة مات مرتين قبل كده سألني: مش المثل العربي بيقول " تجوع الحرة ولا تأكل بثدييها"، قلت له شفت إنت ظالم الحكومة إزاي ... المثل ده اتكلم عن النص الفوقاني بس وما جابش سيرة النص التحتاني، والجماعة خدوا البرلمان أصلاً علشان يغطوا النص الفوقاني ... ويفضل الفلاح "فايت بيغني من جنب السور" ... هو والعامل ... بال 50 % بتاعتهم، وسيادة اللواء يقوم بأداء "الواجبات" في الليل ... والأوبرج والأندلس نيابة عنهم ... وبرضه تفضل شريفة!!.
ومصر أكبر من أمريكا ب 6800 سنة ... بس أهي قلة عقل ... وعايزة تجدد شبابها، أحسن ما تمشي مع واحد "خِرتي" ولا تروح الغردقة، وأكيد ما دام أمريكا وافقت يبقى دخلها الطمع. وعندهم "أرثر ميلر" اتجوز "مارلين مونرو" من غير تمويل أجنبي لأنه كان طمعان في جسمها ... وهي طمعانة في شهرته، وساعتها وسائل الإعلام في أمريكا أطلقت عليهما لقب «المفكر والساعة الرملية»، في إشارة إلى الفارق الفكري بينهما، وعندنا الشيخ علي يوسف لما اتجوز صفية بنت الشيخ السادات من ورا أبوها طلقتهم المحكمة ... مش علشان هو كان أكبر منها بتلاتين سنة والبنت لسه ما كملتش أربعتاشر ... إنما علشان كان بيشتغل في مهنة مهينة .... صحفي!!.
وصاحبي العبيط بتاع المعارضة اللي مات مرتين تقريباً قبل كده سألني تاني امبارح: طب ليه الحكومة عملت الفضيحة دي ما كان ممكن تطَلْعهُمْ براءة ولا تحفظ القضية، قلت له: خسأت يا رجل ... حكومتنا شريفة وما تعرفش اللف والدوران.
وصديقي الباشمهندس حسن لما طلق مراته عشان شك فيها مرضيش يقول لأي حد ... وكل اللي يسأله يقوله "خلاف في وجهات النظر"، لكن أهل مراته جم عنده في العمارة وعملوا فضيحة وأمها رقعت بالصوت الحياني وقالت للناس كلها "ده طلقها عشان بتمشي مشي بطال!!"، لأنهم عيلة ... المبادئ عندهم لا تتجزأ!!.
وأكيد مصر لم تركع .... لكنها اتشقلبت!!
والمحكمة إن شاء اهفي حتبعت للمتهمين الأمريكان عن طريق الإنتربول ... نفر ... نفر تهديهم أغنية:
سلامات سلامات سلامات يا حبيبنا يا بلديات
شوف سافروا معاك كام واحد ما وحشنا منهم واحد
لا لا لا لا دانته وحشتنا بالذات

#خالد_الكيلاني (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل