من ادب الانتفاضة الفلسطينية - هتافات المسيرات والتظاهرات - سابع عشر : شعارات للاصلاح السياسي

خالد منصور
عضو المكتب السياسي لحزب الشعب الفلسطيني

الحوار المتمدن-العدد: 1062 - 2004 / 12 / 29 - 07:06
المحور: الادب والفن
    

من أدب الانتفاضة الفلسطينية
هتافات المسيرات والتظاهرات

سابع عشر : شعارات للإصلاح السياسي

شعبي حدد خصمه الأول
لاحتلال ما بتبدل
**************
مطالبنا يا قيادة
لاستقلال والسيادة
*************
يا قيادة ما بصير
والمخطط خطر كبير
قولو قولو للجماهير
من وراهم شو بيصير
**************
قولو قولو للختيار
ما بنتنازل مهما صار
*************
الأعداء عالابواب
بانتظرونا بالحراب
*************
يا سلطتنا الوطنية
ردي شروط الامنية
فيها خنق الحرية
**************
قولو قولو لابو عمار
ارادة شعب ما بتنهار
صحح صحح هالمسار
حتى نحقق لانتصار
**************
V.I.P V.I.P
فخ كبير وقعتو فيه
**************
للقائد بدنا نقول
اللي بصير مش معقول
***************
سنو سنو القوانين
وانهو زمن المدعومين
***************
شنو حرب عالفساد
حتى تنظف هالبلاد
**************
صونو حقوقو هالانسان
حتى يخدم هالاوطان
**************
بدنا سيادة للقانون
كل الشعب تحتو يكون
**************
الحقيقة للجماهير
والتضليل ما بيصير
**************
قبل وقوع الفاس بالراس
الاساس حقوق الناس
***************
صوت الشعب بدو يطلع
والمسؤول بدو يسمع
وطني هذا وانا حر
لاجلو مبسكت طول العمر
****************
الفساد زاد زاد
وانتو منعتو لانتقاد
***************
عنا غول وعنا حيتان
وعنا فساد بالاطنان
***************
احكو وقولو لكل الناس
ليش كبتو هالانفاس
***************
للنضال للنضال
حتى يزول لاحتلال
***************
كيف نواجه لاحتلال
واحنا نمارس لاعتقال
ضد الشرفا والابطال
**************
لا اعتقال لا اعتقال
ضد الشرفا والابطال
**************
كل الشعب هونا قال
من جرزيم لعيبال
مع تحريم الاعتقال
**************
لاعتقال السياسي
سيف مسلط عالناس
**************
حق النقد والتعبير
وسيلة شعبي للتغيير
**************

لا لا للإرهاب
وللي عملو البلد غاب
**************
شو اللي صار في هالدار
بوجه الكلمه طلقة نار
*****************
رجال الأمن وطنيين
ضحوا لاجلك فلسطين
همي معانا ملتحمين
بالمطالب مؤمنين
**************
القانون القانون
يا حراس القانون
حطو حد للجنون
للخروج عالقانون
**************
يللي حملتو هالسلاح
لاجل الوطن والكفاح
بدنا ضبط للسلاح
**************
الشهيد وصى وقال
خلي سلاحك للقتال
حتى تواجه لاحتلال
**************
الشهيد صاح صاح
لا تستعرض بالسلاح
****************
لاستعراض ليش ليش
خلي رصاصك على الجيش
*****************
رصاصك غالي وروحي اغلى
بالسلاح لا تتسلى
******************
سؤال كبير وبدو جواب
ليش الفاسد مالو حساب
صارت عيشه مثل الغاب
بنكتب عنها الف كتاب
للظالم طلع نياب
والفقرا بلا ثياب
**************
اسمع اسمع يا عرفات
سلطة وحدة لا سلطات
احنا شبعنا صيراعات
بدنا نحدد صلاحيات
لاجهزتنا الامنيات
**************
هي الوحدة يا اخوان
في القيادة وفي الميدان
***************
بدنا نشارك بالقرار
بدنا نرتب جوا الدار
***************
صاح الشعب يا عرفات
بدنا بدنا اصلاحات
في الدوائر والوزارات
***************
بدنا نكافح هالفساد
حتى تنظف هالبلاد
***************
اسمع اسمع يا عرفات
شبعنا شبعنا خطابات
بدنا بدنا إجراءات
بدنا نشوف إصلاحات
**************
ليه ليه قولو ليه
كيف ارضيتو السي أي ايه
لا قيادة بالتعيين
او زعامة مابدين
***************
انتخابات انتخابات
للجان البلديات
ولعموم النقابات
*************
التشريعي بهدلتو
حاضر غايب شرشحتو
*************
استقيلوا يا نواب
حتى نكرس لانتخاب
*************
مهما تحطو من قيود
العدالة بدها تسود
*************
الحرية بالتعبير
اول خطوة للتحرير
وقمع الشعب ما بيصير
**************
جيل تعلم علم جيل
الخضوع مستحيل
**************
بدنا نحكي بدنا نقول
بدنا نوصل راس الغول
مش معقول مش معقول
تصادر حقي يا مسؤول
تحجز عللي في لعقول
**************
يا سلطة يا اخوان
بدنا نعيش بامان
حطو حد للزعران
*************
هذا نتيجة لانفلات
والقانون لما مات
**************
اللي تواطأ واللي تستر
مجرم سافل ذنبه اكبر
**************
اسمع اسمع يا عرفات
اوقفوها لاعتقلات
الحرية لسعدات
*************
الحرية للأبطال
للي خاضوا هالنضال
*************
بعالي الصوت بدنا نقول
لاعتقال مش مقبول
**************
الله يعينو هالوزير
على جريه بمشي كثير
عالحواجز بصلوبوه
وزي الناس بضروبوه
ما بآمن بالتنسيق
وشوف الجيش ما بيطيق
بين الشعب على طول
وغير الحق ما بيقول
***************
يا نواب مالكو
مشغولين بحالكو
حال الناس عم بسوء
والفساد تحت الضوء
الرقابة غايبة
والاحوال سايبة
*************

ابو مازن نيالو
بعدو المجلس عاحالو
اغلبية مضمونة
وكلمة لا ملعونة
أبو مازن مش قلقان
ضامن ثقة هالاخوان
*************
آمنة ضحيــه
لزعران الوطنيــه
*************
جبل النار قوليها
حاميها حراميها
*************
روس كبيرة مشبوهة
بدنا نلعن أبوها
**************
يا عباس ويا دحلان
وين الامن والامان
وين حقوقو هالانسان
***************
الضحايا بتنادي
طفح الكيل يبلادي
**************
عصابات المجرمين
تحت السلطة محميين
**************
يلي بتحمي هالكلاب
جايي يومك للحساب
**************
عنا فوضى بالسلاح
واستهتار بالارواح
*************

يا زعامة هالبلاد
انتو بواد واحنا بواد
*************
إحنا شعب محاصرين
وانتو عنا مش سائلين
**************
احنا نقارع لاحتلال
وانتو غرقتوا بالاوحال
***************
اللي فوق مختلفين
على شو مش عارفين
**************
يا زعامة هالقضية
بدها روح مسؤولية
*************
لا عبث ولا استهتار
ولا طوشة عالادوار
*************
شعبي الحر يا امين
اوعى تكل واوعى تلين
للحرية سائرين
حتى نحرر فلسطين
**************
اللي ركبوا عالاصلاح
الفساد منهم فاح
*************
الإصلاح ما بيصير
بالإرهاب والتدمير
*************
اسمع اسمع يا عرفات
شبعنا شبعنا خطابات
بدنا نشوف اجراءات
بدنا بدنا اصلاحات


خالد منصور
عضو المكتب السياسي
لحزب الشعب الفلسطيني

#خالد_منصور (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات