قصاقيص، اتجننت فى سجن المرج - 23

مايكل نبيل سند

الحوار المتمدن-العدد: 3581 - 2011 / 12 / 19 - 20:45
المحور: حملات سياسية , حملات للدفاع عن حقوق الانسان والحرية لمعتقلي الرأي والضمير
    

- إضراب النوبيين كان البداية أيضا:
أنا كنت قريب من اتحاد شباب النوبة اللى عملوا مظاهرة قدام مبنى ماسبيرو فى 6 ابريل 2009، و نجاحهم هو اللى شجعنى انى أأسس حركة لا للتجنيد الإجبارى بعدها ب 3 أيام يوم 9 إبريل 2009… عرفت دلوقتى انهم كانوا مصدر الإلهام للنشطا المسيحيين انهم يعتصموا قدام ماسبيرو، وحتى واضح التقارب بين اسمهم "اتحاد شباب ماسبيرو" و "اتحاد شباب النوبة"… عجيب الترابط اللى بين الكيانات السياسية ده… كمان ده نموذج واضح ان مجهود النشطاء بيجيب ثمار فى مجالات هما نفسهم ماكانوش يتخيلوها. 2011/11/14

- الجيش عدو نفسه أيضا:
بيقولولى انى عدو نفسى علشان مش راضى أقدم تنازل يخرجنى من السجن… بس الجيش برضه عدو نفسه، وكل يوم بيعمل موقف يستعدى بيه جزء من الشعب المصرى، مرة الإسلاميين ومرة المسيحيين و مرة العمال ومرة المدنيين و مرة الأحزاب، كأن اللى بياخد القرار جوة الجيش متعمد يخلى الشعب يكره الجيش! 2011/11/14

‎- إهانات بسبب إيمانى بحقوق المثليين:
بعانى من إهانات كتيره فى السجن بسبب ان المساجين عرفوا انى كاتب فى مدونتى حاجات دفاعا عن حقوق المثليين جنسيا… يعنى مش كفاية سوء المعاملة بسبب إلحادى وموقفى من إسرائيل؟ الحياه هنا لا تحتمل ‎:(‎‏ ‎ 2011/11/14

‎- عن رفع سن المعاش:
أنا شايف ان سن المعاش المفروض يتناسب مع متوسط الأعمار فى الدولة… يعنى أنا مش ضد رفع سن التقاعد فى أوروبا، لأن عندهم متوسط الأعمار عالى، يعنى مش معقول يكون متوسط الأعمار فى دولة 90 سنة و الناس تطلع معاش فى سن 60 سنة… لكن ضد رفع سن التقاعد فى مصر، لأن متوسط الأعمار عندنا منخفض و الناس بتبتدى تعانى من الأمراض المزمنة من بداية العشرينات. 2011/11/14

‎- أمى و محاولات تنصيرى:
أتمنى ان أمى تيأس منى و تبطل محاولاتها المستمرة لتنصيرى، و دعوتها لتدخل موظفى السماء فى حياتى الشخصية باستمرار، و حكاياتها المستمرة لطوب الأرض عن الأيام اللى كنت فيها شماس و خادم و قديس وبنور فى الضلمة من القداسة و الورع… عاااا 2011/11/15

‎- كتاباتى القديمة و حشتنى:
أشتاق لقراءة مقالاتى القديمة الى كتبتها قبل دخولى السجن… مايكل الجديد يشتاق للتعرف من جديد على مايكل القديم. 2011/11/15

‎- الدين لا يحمى الأخلاق:
فيه ناس بيقولوا ان الدين بيقوم بدور أخلاقى عن العامة، لأنه هو اللى بيمنعهم من ارتكاب الجريمة… أنا شايف ان الإنفلات الأمنى أثبت خطأ الفكرة دى، القانون هو اللى بيمنع الناس من ارتكاب الجريمة مش الدين، و الدليل ان لما سلطة القانون وقعت بانسحاب الشرطة ظهرت الجريمة رغم ان الدين لسه موجود… لو كان الدين بيحافظ على أخلاق العامة، كان منع الجريمة فى غياب الشرطة. 2011/11/16

‎- ماذا لو كان الجيش حكم بإعدامى؟
بفكر ايه اللى كان هيحصل لو الجيش حكم عليا بالإعدام بدل السجن 3 سنين؟ أنا شخصيا الإعدام أريحلى من العذاب فى السجن طول المدة دى… بس السؤال اللى محتاج تفكير: النشطاء و السياسيين اللى سكتوا على سجنى، هل كانوا هيسكتوا لو كان الحكم بالإعدام؟ 2011/11/16

‎- الإمبريالية القطرية:
قطر بتحتل الدول العربية بفلوسها (حزب النهضة فى تونس و المجلس النتقالى الليبى و الجزيرة فى مصر)، وكمان بتتخلص من النظم المعادية ليها واللى بتنافسها على الزعامة (النظام السورى… النظام المصرى)… رغبة قطر فى زعامة الدول العربية كانت واضحة فى ترشيحها لأحد قياداتها لمنصب الأمين العام لجامعة الدول العربية، وكمان المبادرات اللى بتطرحها كل شوية لحل المشاكل الداخلية للدول العربية (السودان- اليمن- فلسطين - لينان - سوريا… ).
احنا محتاجين نبتدى نفكر فى آليات لمواجهة الطموح القطرى للتوسع فى المنطقة والسيطرة عليها… يعنى مش كفاية السعودية و إيران و تركيا و أثيوبيا و إسرائيل، تطلعلنا قطر كمان؟ 2011/11/16

‎- انقلاب ضياء الحق و انقلاب طنطاوى:
عجيب جدا التشابه بين انقلاب المشير طنطاوى على مبارك 2011، و انقلاب الجنرال ضياء الحق على الرئيس الباكستانى ذو الفقار بحجة ان القوات المسلحة الباكستانية مش هتستخدم سلاحها ضد المواطنين، و بعد الانقلاب قال انه هيعمل انتخابات فى خلال 3 شهور لكنه قدم ذو الفقار على بوتو للمحاكمة و أعدمه، و لغى الانتخابات و قعد فى السلطة 11 سنة لحد 1988، وظبعا فى الفترة دى تحالف مع الاسلاميين و أسلم باكستان فى تحالف متكرر بين العسكر و الاسلاميين مكنه من قمع القوى الديموقراطية… وجدير بالذكر ان ضياء الحق كان رئيس أركان القوات المسلحة الباكستانية برتبة فريق، وتم اغتياله سنة 1988 من خلال تفجير طائرته… فهل يعتبر المشير؟ 2011/11/17

‎- التجربة البورمية:
شعب بورما ثار سنة 1988 ضد حكم الدكتاتور "نى وين" اللى كان مستمر فى السلطة 26 سنة متواصلة، وكنتيجة للثورة قام الجيش بالإطاحة بنى وين و تشكيل مجلس عسكرى يدير المرحلة الانتقالية… الخبر المهم، ان المرحلة الانتقالية فى بورما لسه ماخلصتش من سنة 1988 يعنى من 23 سنة، فى سنة 1990 اتعملت فى بورما انتخابات برلمانية؟ لكن العسكر مسمحوش للبرلمان انه ينعقد، وكمان قبضوا على النواب المنتخبين اللى حاولوا يعملوا اجتماعات او يمارسوا مهامهم… ياريت نتعلم من تجربة بورما قبل مايفوت الأوان… يسقط يسقط حكم العسكر! 2011/11/18

‎‎- Aung San Suu Kyi:‎
أونج سان سوكى، سيدة بورما العظيمة، ذهلنى اللى قريته عنها و عن نضالها علشان تحقيق الديموقراطية فى بورما… الست دى قضت 12 سنة تحت الإقامة الجبرية فى آخر 16 سنة، ومع ذلك رفضت عرض من العسكر بالحرية إذا تخلت عن مبادئها… أرفع لها القبعة، و أتمنى انى أقابلها لما أخرج. 2011/11/18

‎- ثورة أعقبها انقلاب:
أعتقد احنا محتاجين ندرس الثورات الشعبية اللى تحولت لانقلاب عسكرى، زى انقلاب ضياء الحق فى باكستان، وانقلاب العسكر فى 1988 فى بورما… الدراسة دى هتفيدنا كتير فى التعامل مع مجلس طنطاوى فى مصر حاليا. 2011/11/18

‎- هل سأشعر بالعدالة يوما!
كتير بسأل نفسى إذا كان ممكن فى يوم اقدر احس بالعداله؟ مفيش حاجة فى الدنيا تقدر تعوضنى عن الفترة الطويلة اللى اتحبستها والمعاناه اللى عانيتها أنا والقريبين منى بسبب انتهاكات العسكر… لو انتقمت هبقى اتحولت لفاسد زيهم، و لو ماحسيتش بالعدالة عمرى ما هبقى مستريح من جوايا.محتار و متألم. 2011/11/18

‎- خواطر سيكولوجية:
على ذكر علم النفس… الإلحاد مش مرض نفسى، بالعكس كتير من السيكولوجيين بيصنفوا الدين على انه مرض نفسى باعتباره نوع من "الوهم الجماعى"… المثلية مش مرض نفسى، بالعكس "الهوموفوبيا‎ - كراهية المثليين" هيا اللى مرض نفسى محتاج للعلاج. 2011/11/19

‎- أحلامى فى السجن:
مستغرب ليه أحلامى فى السجن بشوف فيها نفسى فى بيتى اللى اتولدت فيه وعشت فيه طفولتى فى أسيوط، و مش بحلم بالشقتين التانيين اللى عشت فيهم فى أسيوط ولا بالشقة بتاعتى فى القاهرة… شيء غريب فى عقلى الباطن! 2011/11/19

- حزب المصريين الأحرار:
حد لاحظ ان شعار حزب المصريين الأحرار 3 سبعات (777) لكن شعار حزب الجبهة الديموقراطية سبعتين (77)؟ طيب حد لاحظ ان ال3 سبعات ده اسم وحدة القوات الخاصة فى المخابرات الحربية برضه؟ هل فيه علاقة بين ده كله! 2011/11/19

#مايكل_نبيل_سند (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل