قصاقيص، اتجننت فى سجن المرج - 22

مايكل نبيل سند

الحوار المتمدن-العدد: 3580 - 2011 / 12 / 18 - 10:22
المحور: حملات سياسية , حملات للدفاع عن حقوق الانسان والحرية لمعتقلي الرأي والضمير
    

- لو عايزين تفشخوا حزب الوفد:
لو عايزين تفشخوا حزب الوفد، يطلع قانون بإلغاء قرار عبد الناصر بحظر الأحزاب اللى كانت موجودة فى العهد الملكى… ساعتها هيبقى فيه حزبين بإسم حزب الوفد: القديم والجديد، وكل واحد فيهم هيدعى انه الوفد الأصلى، وهيحاربوا بعض، وهتبقى دى نهاية الوفد… وطبعاً القانون دة لازم يطلع، لأن قرار عبد الناصر كان استبدادى وغير شرعى وبيحرم نشطاء شرفاء من العمل السياسى، وتونس لما عملت الثورة رفعت الحظر عن كل الأحزاب اللى حظرها النظام السابق، فليه احنا منعملش كدة؟ 2011/11/7

- رفعنا صوابعنا فى التحرير:
على سيرة ظباط الجيش اللى مش عاجبهم صورتى وأنا رافع صباعى للجيش… افتكرت اننا فى التحرير لما كانت طيارات الF16 بتطير فوقينا، رفعنا صوابعنا الوسطى ناحية الطيارات، استهزاء وسخرية منها، وكان الهتاف حوالينا ”مش هنمشى، هو يمشى“… ارفع صباعك فوق، انت مصرى. 2011/11/7

- اشمعنا الإسلاميين؟
من ساعة انقلاب الجيش فى 11 فبراير، مفيش ولا ناشط إسلامى اتحاكم عسكرياً، رغم ان النشطاء المدنيين فى المحكمة العسكرية كل يوم… دة مش بس دليل على وجود صفقة بين الإسلاميين والعسكر (أو انحياز عسكرى تجاه الإسلاميين فى أضعف الاحتمالات)، لكن دة نوع من ارهاق وتشتيت القوى المدنية فى الوقت اللى فيه القوى الإسلامية مركزة فى التحضير للانتخابات! إزاى بقى العسكر بيقولوا انهم بيقفوا على مسافة واحدة من كل القوى السياسية؟ 2011/11/8

- إضراب عن الكلام:
بفكر أبتدى إضراب عن الكلام كنوع من نضال اللاعنف ماستخدمناهوش قبل كدة فى مصر… طالما بيكمموا أفواهنا، يبقى نضرب عن الكلام، ونتفرغ للكتابة… نياهاها. 2011/11/9

- علاء النظيف:
قالولى ان علاء عبد الفتاح كاتب على صفحته على تويتر [ان مايكل] أول مصرى يقاطع القضاء العسكرى… دة شىء طبيعى من حد محترم زى علاء… المصيبة بقى فى الصحافة (الغير نظيفة) اللى طمست دورى بتعليمات من العسكر! 2011/11/10

- بدأت موجة الإضراب عن الطعام:
انبسطت بخبر إضراب ليلى يوسف وسحر ماهر وباقى النشطاء ضد القضاء العسكرى، كدة كزة التلج ابتدت تلف، وهنبقى قوة كبيرة قريب… سعيد انى مصدر إلهام لكتير من النشطاء السياسيين. كنت أول حد يبتدى إضراب عن الطعام ضد المحاكمات العسكرية فى 2011/8/23، والناس ابتدت إضرابات بعدى. كنت أول حد يقاطع المحاكمات العسكرية، والنشطاء كرروا دة بعدى. وقبل دة كله كنت أول معترض ضميرى يرفض الخدمة العسكرية فى مصر، ومطلوب ان الناس تكرر دة برضه علشان نقضى على استبداد العسكر. 2011/11/10

- تحدانى ضابط جيش:
ظابط جيش هنا فى سجن المرج، كان شمتان فى سجنى، ومرة اتريق عليا وقالى ان هنا مفيش فى إيدى أى حاجة ومقدرش أعمل حاجة للجيش… تعالوا اتفرجوا عليا وأنا ببتدى حملات الإضراب عن الطعام وحملات مقاطعى القضاء العسكرى، ولسه ياما فى الجراب يا حاوى…الأسواء متقدرش تخلينى عاجز. 2011/11/10

- غيران من علاء:
علاء حد محترم، ويستحق الاهتمام الإعلامى بيه وأكتر كمان، ومكنش المفروض يتسجن ولو دقيقة واحدة… لكن أنا مش قادر أمنع نفسى من الغيرة من التغطية الإعلامية لأزمته، أنا مسجون لأكتر من 7 شهور مريت فيهم بمتاعب كتير، ومضرب عن الطعام من حوالى 80 يوم، ومع ذلك الإعلام معملش معايا اللى عمله مع علاء… حاسس بالتميير. الإعلام المصرى عنصرى ومش عادل. 2011/11/10

- عمر سليمان فى السعودية:
بعد زيارة عمر سليمان للسعودية، بقى مطلوب من النشطاء السياسيين انهم يكون عندهم وعى أكبر بنشاط أجهزة المخابرات اللى فى المنطقة، وعلاقاتهم ببعض… مينفعش النشطاء يكونوا قاعدين فى وسط السيرك دة كله، وهما مش فاهمين الدنيا ماشية إزاى. 2011/11/10

- الحجاج ممولين للنظام السعودى:
دلوقتى الحجاج بيصرفوا على سياحتهم فى السعودية، والنتيجة ان الحج هو تانى مصر للدخل عند النظام السعودى بعد البترول، كدة الحجاج بقيوا ممولين للنظام السعودى اللى بيستخدم فلوس الحج علشان يشترى بيهم سلاح يقمع بيهم شعبه. هل دة ينفع؟ كان فيه اقتراح ان يتم تدويل الحرمين وفصلهم عن المملكة العربية (زى ما حصل فى الڤاتيكان)، وبكدة يبقى تمويل الحج هيوجه ناحية أمور دينية مش ناحية سوق السلاح وتمويل المنظمات الإرهابية… لحد ما دة يحصل، أعتقد ان السلوك الأخلاقى دلوقتى هو مقاطعة الحج كنوع من المقاطعة النظام السعودى. 2011/11/11

- جدو:
فى العنبر معايا فى المستشفى سجين كبير فى السن فى عمر يوازى عمر جدى لو كان عايش، وبيعاملنى كأنى حفيده… شعور جميل ان الواحد يحس انه عنده جد (أنا مشفتش جدودى، ماتوا قبل ما أتولد)… بس بعد ما جربت الشعور دة، قررت انى مبقاش جد… الموضوع دة مش على مقاسى. 2011/11/11

- صورة علاء:
علقت صورة علاء عبد الفتاح على حيطة الزنزانة… شالوا قبل كدة الصورتين اللى كنت معلقهم قبل كدة… أى حاجة تفكرنى بأيام الصعلكة. 2011/11/11

- عقلى ينحدر:
الإضراب عن الأكل دخل معايا فى مرحلة جديدة… عندى مشكلة كبيرة فى الذاكرة، وبنسى حتى أسامى أقرب الناس ليا، حاسس انى مبقتش عارف أفكر أو أتكلم أو أتعامل أو أبص بطريقة طبيعية… تكسير الدهون فى الجهاز العصبى ممكن يقضى على عقلى للأبد ‎:(‎‏ 2011/11/12

- مش مصدقين:
أخويا كلمنى كذا مرة عن الناس اللى مش مصدقين انى مضرب عن الطعام كل الفترة دى… كأن مثلاً مباحث السجن مش مستنيالى غلطة علشان يعملولى ”محضر فك إضراب“ ويخلصوا منى، وكأن الجيش مش من مصلحته انه يثبت انى باكل علشان يطلعنى كداب ويتخلص من الضغوط اللى عليه بسبب إضرابى… عموماً، الإضراب يسير والكلاب تعوى. 2011/11/12

- حجرتين وصالة:
صديقى ”چيمى“ بعتلى شوية كتب، منهم كتاب ”حجرتان وصالة“ لإبراهيم أصلان… الكتاب بيحكى قصة راجل عجوز بيفقد شريكة حياته فى شيخوخته بعد عقود من الزواج… كتير بيشوفوا ان دة شىء رومانسى، لكنى بشوف انه شىء مؤلم. إذا كان فقدان الشريك شىء حتمى (بالانفصال أو الموت) يبقى ليه نربط عواطفنا بحد نتعذب معاه؟ 2011/11/12

- Please hug me!
Please hug me… I need your hugs! 2011/11/12
- يا حرية فينك فينك؟
يا حرية فينك فينك؟ حكم العسكر بينا وبينك… يا حرية فينك فينك؟ الجيش المصرى بينا وبينك! 2011/11/13

- أخطر حاجة فى السجن:
أخطر حاجة فى السجن انك ترضى بيه وتقبله، وتتعامل مع الزنزانة على انها بيتك… فى اللحظة دى بتفقد حريتك، مش فى لحظة الحكم عليك. 2011/11/13

- رجعى وليس شرقى:
متقولش ”راجل شرقى“، قول ”أنا راجل رجعى“… متقولش ”احنا شعب شرقى“، قول ”احنا شعب رجعى“… ضرورى نتعود نسمى الأشياء بمسمياتها الحقيقية. بلاش نحمل الشرق ذنب تخلفنا! 2011/11/13

#مايكل_نبيل_سند (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل