الحج الى واشنطن

سرمد علي الجراح

الحوار المتمدن-العدد: 3577 - 2011 / 12 / 15 - 11:44
المحور: كتابات ساخرة
    

يدور في رؤوس الدايخين سؤال مهم عن السبب الحقيقي وراء زيارة السيد المالكي لأمريكا؟؟
فالبعض يقول إنه ناذر يزور دزني لاند, ويذبح طلي لميكي ماوس
بينما ذهب مصدر مقرب من حزب الدعوه, إن المالكي أخذ معه جدر قيمه وتمن للبيت الابيض, بمناسبة عاشوراء طلبا للأجر لاغير!!
أما جمعية الحفاظ على التراث, فانهم يؤكدون إن دزني لاند, مذكوره في مقام دزني واعرف مرامي, ولاتمت للزياره بصله. وإنه ذهب مع الريح
واليكم ماجرى في الاجتماع المغلق بين الرئيسين حسب مصدر مامطلع بس يقره الممحي:
المالكي: يمعود فاذر أوف جيلوسي - أبو الغيره - يرحم المِلْك أوف يور ماذر - حليب امك - دخيل جدك أبو عمامه ليش ماتبقّي كم لواء يحرسوني, تره ماكو واحد أكدر أئمن بيه, كلهم علاسه ألله وكيلك.
أوباما: وات إز ألاسه؟
المالكي: علاسه يعني كلرز طال عمرك
أوباما: نو مستر ماك لكي, لاتخاف إذا إنعلست نجيب غيرك!!
المالكي: ولك عمي قابل شفتني إبن عم ماك دونالدز, مالكي عمي مالكي, وشنو تجيبون غيري تره أزعل وأروح على خالي خامنئي
أوباما: يطبك طوب وإذا زعلت؟ العالم كله يعرف إحنه لانخاف ولانستحي, وأكبر شارب مانشتريه بكاله
وبعدين أنتو العراقيين كلكم مو خوش أوادم, فوك ما خلصناكم من أخو هدله, كاد بلس هز إيفل سول, تسبونه وتتحالفون ويه أعدائنه, وياهو اللي نجيبه يطلع ألعن من القبله
المالكي: زين خلي نتفاهم على الأستثمارات الأمريكيه بالعراق, نريد شركات تجي تطلع نفط لأن الحراميه هوايه والميزانيه ماتلحك عليهم
أوباما: مستر ماك لكي, ومنو يحمي هل شركات, بلا حصانه ماكو شركات
المالكي: هاي شلون طركاعه, يمعود شبيك مو كلنه مالكي من غضب الله على راسك. يابه الحصانه ماتقبل بيها إيران متكلي شسوي
وعلى ذكر إيران, تره يسلمون عليك ويكولون بلكي تنطوهم الكتلوك مال الطياره الكمشوها, لأن الحرس الثوري مايندل منين الباب مالتها
أوباما: أوكي الطياره نحسبها بلاش, بس الكتلوك بمليارين, وكلهم تره الطياره دتصورهم ولحد يلعب بيها تره تنفجر
المالكي: ليش ماتبيعلنه هيج طيارات, عفيه الله يخليك, حتى ننقل اللطميات لايف من الجو, واشوف الكتل السياسيه شتسوي
اوباما:, أنتو ماتفيدكم طيارات بلا طيار, بس عدنه عرباين بلا زمايل هاي تفيدكم اكثر
المالكي: وبيش تفيدنه طال عمرك
اوباما: انتو البلد الوحيد بالعالم اللي بي نقص بكلشي عدا الزمايل
المالكي: ويه نفسه, هاي اسرار دوله شلون عرفها هذا؟
المالكي: أبشرك التيار الصدري طرح ميثاق شرف للكتل وره انسحابكم
اوباما: أحلى من الشرف مفيش!!!, ولكم ياشرف, ومنين تجيبون شريف حتى يوقعه
أكلكم: استوردوا من شارع الهرم بمصر راقصات يوقعنه,
حسب تقرير السي آي أي العندي خطيه راح يضلن بلا شغل بعد ما فازوا السفلسيين!!, أول مره اسمع بحزب للسفلس
المالكي: همزين إحنه ماعدنه هل حزب, بس عدنه سيد مقتدى اضبط من الأيدز
اوباما: هذا مستر ماك تدى, إلا نعلسه
المالكي: هلو عيني, مقتدى صار اسكتلندي ويصيحوله ماك تدى, إي حظوظ, والسيد هم يشبه ماركريت تاتشر
اوباما: يله مستر ماك لكي, نطلع نسوي مؤتمر صحفي, بس انته لاتفتح حلكك
المالكي: لا يمعود ما أطلع وياك, أخاف هم تجينه قندره طايره!!

#سرمد_علي_الجراح (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل