قصاقيص، اتجننت فى سجن المرج – 10

مايكل نبيل سند

الحوار المتمدن-العدد: 3522 - 2011 / 10 / 21 - 08:26
المحور: حملات سياسية , حملات للدفاع عن حقوق الانسان والحرية لمعتقلي الرأي والضمير
    

- بكرة عيد ميلادى... يا ترى ده هيكون آخر عيد ميلاد فى حياتى؟ 2011/9/30
- فى الهند من أكتر من شهر، أعلن مواطن هندى الإضراب عن الطعام اعتراضاً على الفساد فى الهند (رغم ان الهند دولة فيها تجربة ديموقراطية متميزة) وفى خلال أسبوع من إضرابه أعلنت الحكومة الهندية تجاوبها واستعدادها لإجراء إصلاحات... أنا بكرة هكمل 40 يوم مضرب عن الطعام، ومحدش فى النظام المصرى سأل فيا... عجيبة يا مصر، يا أرض اللوا. 2011/9/30
- قالولى ان نور مرعب قبل لما ينتحر، تعمد يخلى صورته على الفيسبوك تطالب بالإفراج عنى... شىء صعب جداً لما تحس انك مسئول عن تعاطف ودماء ومجهود آلاف البشر اللى ضحوا علشان حريتى، وانى مطلوب منى انى أكون فى محل ثقتهم. 2011/9/30
- سقوط القومية العربية بدأ بوفاة عبد الناصر، ثم بإسقاط نظام صدام حسين، والسنة دى اكتمل بسقوط نظام القذافى، ومابقاش فاضى من أعمدة القومية العربية غير البعث السورى، لكنه خلاص فقد أى تعاطف شعبى معاه بسبب جرايمه ضد الشعب السورى... فلنحتفل بسقوط القومية العربية. 2011/9/30
- بستغرب من الناس اللى بيقولوا على أمريكا انها دولة إمبريالية، رغم ان الإمبريالية ليها تعريف محدد، وأمريكا عمرها ما حاولت تتوسع فى أراضيها أو تضم أراضى دولة تانية لأراضيها... المفروض ان اختلافنا مع شخص ميخليناش نتبلى عليه بحاجات مش فيه. 2011/9/30
- المفروض بعد 40 يوم من الإضراب عن الطعام، المخ والجهاز العصبى بيبتدوا يتدمروا... أنا فعلاً بقى عندى دلوقتى التهابات فى الأعصاب ومشاكل فى الذاكرة... أنا داخل على المراحل الأخيرة. 2011/9/30
- لما قريت كتاب ”البحث عن الذات“ بتاع أنور السادات ، لفت انتباهى مساحة التشابه اللى بينى وبينه... هو دخل السجن أول مرة وهو سنة 24 سنة، وأنا دخلت السجن وأنا سنة 25 سنة... هو قضى فى السجن سنتين ونص، وأنا حكمى 3 سنين... هو اتعلم ألمانى جوا السجن، وأنا كذلك... هو سلم رئاسة التنظيم بتاعه لما اتسجن، وأنا عملت نفس الشىء فى حركة ”لا للتجنيد الإجبارى“... هو عمل إضراب اعتراضاً على سجنه، وأنا نفس الشىء... هو اتكلم عن مشاكل مرض الجرب جوا السجون، وأنا جالى الجرب من قذارة الأماكن اللى حبسونى فيها... لكن طبعاً فيه اختلافات جوهرية بينى وبين السادات، هو عسكرى وأنا مناهض للعسكرية، هو تواصل مع المخابرات الألمانية وأنا ضد كل أجهزة المخابرات مهما كانت جنسيتها، وهو اشترك فى اغتيال أمين عثمان وأنا ضد القتل والاغتيالات وحتى ضد عقوبة الإعدام. 2011/9/30
- عبد الناصر لما بلغ السادات بانتحار عبد الحكيم عامر، السادات رد عليه وقال ان ده شىء طبيعى ”لأن التقاليد العسكرية ان القائد العسكرى بينتحر إذا اتهزم“... طيب ما عبد الناصر كان قائد عسكرى واتهزم فى نفس المعركة، منتحرش ليه؟ وليه الازدواجية فى تصرفات السادات، يقول ان انتحار عبد الحكيم عامر شىء طبيعى، وفى نفس الوقت يرفض تنحى عبد الناصر ويطالبه بالبقاء فى السلطة؟ شىء غريب! 2011/9/30
- هناك دول كثيرة مرت بتجربة السلام بعد الحرب، أتمنى أن نتعلم من تجاربهم حينما نتعامل مع ماضينا المرّ مع إسرائيل... منها تجربة الحرب فى ايرلندا، وتجربة عودة الاندماج فى ألمانيا وجنوب أفريقيا، وإعادة السلام الشعبى بين ألمانيا وفرنسا، والتعامل الإنسانى والعرقى فى الدول التى انشقت عن الاتحاد السوڤييتى. 2011/9/30

#مايكل_نبيل_سند (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل