قصاقيص، إتجننت فى سجن المرج – 4

مايكل نبيل سند

الحوار المتمدن-العدد: 3469 - 2011 / 8 / 27 - 13:20
المحور: حملات سياسية , حملات للدفاع عن حقوق الانسان والحرية لمعتقلي الرأي والضمير
    

النهاردة شفت اتنين من السياسيين الليبراليين على التليفزيون واللى كانوا دايما فى دايرة علاقاتى ، بلال دياب و أمير سالم …. زعلت جدا من طريقة كلام بلال المهادنة للجيش ، وأعجبت بلا حدود بشجاعة أمير سالم فى الكلام عن المجلس العسكرى … الفترة الحالية هتفرق كتير ( إيجابا وسلبا ) فى رصيد كل السياسيين الموجودين فى الساحة السياسية . 4 / 7 / 2011

بيقولوا إن المركب اللى ليها ريسين تغرق … مصر حاليا مش ليها ريسين ، دى ليها مجلسين بيرأسوا البلد ( المجلس العسكرى ومجلس الوزراء ) … الظريف إن عندنا وزير دفاع بيرأس رئيس الوزراء … عجبى ! . 9 / 7 / 2011

معجب جدا بالجماعة بتوع جنوب السودان . إستفتاء الإنفصال كان فى يناير ، وفى ست شهور بقى عندهم رئيس ودستور وبرلمان وكل حاجة … مش المجلس العسكرى اللى ليه 6 شهور ولسه بيفكر فى أول خطوة . 10 / 7 / 2011

محدش سأل نفسه : ليه شعب جنوب السودان عرف يأسس دولته ، لكن شعب فلسطين معرفش ؟؟ … الإجابة بسيطة جدا ، لإن شعب جنوب السودان كسب ود وتعاطف المجتمع الدولى ، ومعملش زى الفلسطينيين اللى احترفوا اختطاف الطائرات ، والعمليات الانتحارية ، وقتل الأطفال والمدنيين ونشر الدعاية العنصرية . 14 /7 / 2011

حجم الإعلانات فى الصحف المستقلة بعد الثورة ، مؤشر للدفعة اللى عملتها الثورة للصحافة المستقلة ، و مؤشر للأرباح اللى بيجنيها حاليا مجموعة من الموظفين على حساب دماء الشهداء و آلام المعتقلين السياسيين . 14 / 7 / 2011

تعليقا على أحداث السفارة الإسرائيلية مايو الماضى …. عجبى على الجيش المصرى ، تدافع عن إسرائيل يسجنوك ، تدافع عن فلسطين يسجنوك … ملته إيه الجيش ده ؟ . 14 / 7 / 2011

الجيش لما سيطر على السلطة فى منتصف فبراير 2011 قال إنه هيسلم البلد لسلطة مدنية منتخبة فى حد أقصى 6 شهور ، يعنى نص أغسطس حد أقصى … دلوقتى بيقولوا إن إنتخابات مجلسى الشعب والشورى فى أكتوبر أو نوفمبر ، ولسه الرئاسة منعرفش امتى … ابتدينا النصب العلنى على الشعب !!!! 14 / 7 / 2011

لما كان مقبوض عليا فى المخابرات الحربية يوم 4 فبراير 2010 ، عطونى آكل ساندويتش المفروض انه ساندويتش مربى … جيت اكله ، لقيت طعمه جاز ، فمرضيتش أكله ومكتبتش عن الموضوع ده وقلت يمكن يكون الأكل اتوسخ منهم من غير ما يقصدوا …. النهاردة وأنا بقرأ شهادات المعتقلين على يد الجيش ، وإزاى إن ضباط الجيش كانوا بيدوهم ساندوتشات جاز ، اكتشفت انها سياسة عسكرية … أحا يا جيش ، مهما قلنا عليك مش هنقدر نقول الحقيقة كاملة أبدا . 15 / 7 / 2011

تابعت النهاردة فى التليفزيون المظاهرات فى التحرير … إستغربت من إن الجيش أعلن بعد الصلاة علطول إنه مش هيلغى المحاكمات العسكرية ، كأنه بيقول للناس ” متروحوش من التحرير ” … افتكرت ساعتها علطول جملة السادات ” ان فيه بعض الناس المفروض يتحاكموا بتهمة الغباء السياسى ” . 15 / 7 / 2011

ملاحظة لاحظتها بشدة من أول الثورة ، ان الناس مستواها الفكرى بيعلى أوى فى وقت صغير جدا ، يعنى قفزات معرفية سياسية ضخمة وسريعة … النت طبعا السبب فى ده لان تويتر والفيس بيسمحولك بتحصيل معرفى ضخم ومختصر فى وقت صغير ، جوا السجن معنديش نت ، ببذل مجهود كبير مع الجرائد والتليفزيون والمقالات علشان الناس ما تسبقنيش بمسافة كبيرة وعلشان مطلعش الاقى نفسى متأخر عن الناس فكريا . 15 / 7 / 2011

معجب جدا بشجاعة إبراهيم عيسى وجريدة التحرير … التحرير بقيت أول جريدة بحرص على قرايتها جوه السجن . 15 / 7 / 2011

طول فترة سجنى خلتنى أبتدى أنسى أسماء معارفى وأصدقائى …. لكن فيه أصدقاء عملوا حاجات تخلينى أفضل فاكرهم باقى حياتى … شكرا ليكم لأنكم كنتم أصدقاء أوفياء . 15 / 7 / 2011

#مايكل_نبيل_سند (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل