وداعاً رحيم ........... صبراً يا عراق / مهداة الى الشاعر الوطني رحيم الغالبي

حامد كعيد الجبوري

الحوار المتمدن-العدد: 3435 - 2011 / 7 / 23 - 11:50
المحور: الادب والفن
    

متأني عرفتك هذا واقع حال
طبع ثائر رسم تاريخه بكفاحه
متأني أشعجب وأستعجلت بالموت
مو تدري بسجل الموت وألواحه
( جسر الطين )1 ما يحمل عبرته أشلون
واليعبر حكم خرزات مسباحه
وأنت العمر كله أكضيته آه وآوف
مثل دمعة يتيم أبكاع مسطاحه
وداعا يا ( رحيم ) أبدنيه ترضع خوف
وخوف أيجيب خوف ويرضعه أكباحه
وأنت آخر ( رحيم ) أبرحمته مذبوح
يتـجَــرع أسـمـوم ولا عـرف راحه
تدري بالوطن ويلاده محرومين
وتحت رجلَه الذهب من النفط واحه
وهذا أول وطن ويلاده ميلعبون
ولا شايـف حديقـه وحـبل مرجاحه
عيد الله يمرهم ما يحس أبعيد
يعيّد بالمـكـابـر يوم مـصــباحه
عرف طعم الحزن من الهدوم السود
وخرسات الهلاهل دمعه وصياحه
هلاهلهم صبر وكلوب مجمورات
ولا يعرف البسمه وفرحته أنياحه
وهذا أول شعب ناسيهه للغنوات
ونبرات الحزن تسمعها بفراحه
حالت يا عراق وبعد عيب أتجيب
ولا نشمي أنتخاك ويترس الساحه
ولا صاحب بخت ويصيح بيك الله
ويسرج للخيول ويبرز أرماحه
ولا يحصل حليم ويكشف المستور
من أيد الحرامي أيردلَه مفتاحه
(آدم) موغشيم ولا بهل (حوه)
و(أبليس) الكدر يغويه بتفاحه
ولا ينفض ترابه وينتهض (شعلان)
مكواره أبيمينه وغيرته أسلاحه
*****
ما طاح الصنم خلف أصنام أهواي
جابوهه أبعراضه وركصه ورداحه
دخيلك يا وطن زوع الكراسي السود
خُراعة الخُضره أموات وشباحه
(يوسف) أخوته البير الغدر ذبوه
ودم الذيب طرَز زوراً أوشاحه
أنباركلك (ييوسف) ما كلاك الذيب
وماكول العراق أبعين الكباحه
هذا أول وطن للمذبح أيجروه
متخله أعله قبله أولده ذباحه
*****
صبراً يا عراق الصار كله أيهون
بعد كاعك بجر بيدين فلاحه
عالي النخل شامخ ما يدنك راس
ويرفض كل عميل أيصير لكاحه
غربيل الوكت يفرز الشين أيطيح
وعرفتهه الفريسه أدموع تمساحَه
لهيب العاصفه أبصدر الزلم ينصد
وأذا غصن انكسر ميموت سباحه
شد صاري العزيمه وصارع الأمواج
توصل للشواطي أبغير ملاحه
عفه صبرك عراق أشكد شفت أهوال
وتحسبها نزيزه وبركه ضحضاحه
من تطلع شمسنه يختل الخفاش
ومتهاب الأسود أجلاب نباحه
أمام أنت العراق الكون بيك أيطوف
ومن حيدر تهب نسمات قداحه
كاعك للشهاده وعمقك التاريخ
ونبراسك طفوف وضمه بجناحه
ما طاح (الحسين) أبكاعك أتياهه
رسم درب البطوله أفكار فواحه
خضر من دماه مشكاة للأجيال
أبكل كطرة دمه من نزفة جراحه
*****

1 : ديوان الشاعر رحيم الغالبي

#حامد_كعيد_الجبوري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل