جلسات نفسية 8

عادل ندا

الحوار المتمدن-العدد: 3231 - 2010 / 12 / 30 - 22:29
المحور: الفلسفة ,علم النفس , وعلم الاجتماع
    

الجلسة الثانية عشر، جماعية: رأيت هذا من قبل
هالة: أنا شفت اللى بيحصل ده قبل كده.
الدكتور: دى ظاهرة نفسية اسمها " رأيت هذا من قبل". وبتحصل لأى حد. أنما لما بتتكرر كتير ممكن تسبب إضطراب نفسى.
هالة: وفى آخر الموقف حضرتك قلت نفس اللى قلته ده يا دكتور.
سميح: أنا أيضا أستطيع أن أرتفع عن الأرض وأسير فى أى اتجاه، طبقا لأفكارى. وزمان سألت واحد صاحبى فى الفصل، شفتنى لما كنت بطير فى الفصل؟ قالى اه.
مختار: أنا اللى بيحصلى، هو التزامن. وبحس كتير أنى متواصل مع آخرين عن بعد.
حسنين: كل دى تخاريف وأحلام يقظة.
نورة: ازاى؟ عمرك ما رحت مكان لأول مرة، وحسيت أنك جيت المكان ده، زى ما هو عليه، قبل كده؟
حسنين: بيجيلى الأحاسيس دى أحيانا بس اللى أحس أنه برة المنطق، بأستبعده من دماغى على طول. كل دى تخاريف.
شريفة: أيه المانع أن الواحد يخرف، بس يبقى واعى أنه بيخرف.
الدكتور: طفى النور كله يا صفية. ونشوف ايه اللى هيحصل.
شريفة: بخاف من الظلمة.
هالة: هى جلسة تحضير أرواح ولا ايه؟
نورة: ما تخوفنيش أكتر.
الدكتور: اللى يشوف حاجة فى الظلمة يقول.
تمر دقائق من الصمت.
صفية: أنا شايفة نور بيظهر ويختفى، فى نص الأوضة.
حسنين: ده نورك يا صفية. على فكرة أنا شايف نور كمان.
نورة: لونه أحمر برتقالى، وبيتحرك ناحية الشباك.
شريفة: لأ بيتحرك لفوق. طالع ناحية السقف.
هالة: دا جاى ناحيتى.
سميح: أنا مش شايف حاجة خالص.
الدكتور: اللى شايف نور وشايف بيتحرك ازاى يقول؟
هالة: دلوقتى طالع لفوق.
شريفة: لأ ثابت فى النص.
هالة: أنا حاسة أن الموقف ده حصل قبل كده.
الدكتور: وايه اللى حصل فى آخره، يا هالة؟
هالة: مش عارفة.
الدكتور: لما عملوا التجربة دى لفترة طويلة حوالى ساعة على مجموعة متجانسة، بعد ساعة كلهم شافوا النور، بنفس اللون ونفس اتجاه الحركة.
شريفة: وده معناه أيه؟
الدكتور: ولعى النور يا صفية. كل واحد يفسره زى ما هو عايز، يا شريفة.

الجلسة الثالثة عشر: جريمة
الزوج: نحن نرتكب جريمة، وده اللى خلانى أصر على أننا نجى للجلسات.
الزوجة: أنت اللى بترتكب جريمة كل يوم. كل يوم بيشرب يا دكتور.
الدكتور: واضح انكم متخانقين.
الزوج: فيها أيه لما أشربلى علبتين بيرة، بعد ما أرجع من الشغل بالليل، عشان أفضى دماغى وأعرف أنام.
الزوجة: فيها أنه حرام. رحتك بتبقى خمرة، وما بطيقهاش.
الزوج: ما انتى متجوزانى وعارفة ده من الأول.
الزوجة: كنت فاكرة أنى ممكن أغيرك. وأكسب فيك ثواب.
الدكتور: ما فيش حد بيغير حد، غصبن عنه.
الزوج: أصرار غريب ومستمر على أنى أمشى على مزاجها. على فكرة يا دكتور قعدت 3 سنين مبطل حتى السجاير، بسبب أزمة مالية. وبرضه كل يوم كان فيه نكد.
الزوجة: ما تطلقنى.
الزوج: والعيال؟ وما تنسيش أنى رميت عليكى الطلاق مرتين قبل كده. والطلقة التالتة تبقى مفيش رجوع.
الزوجة: ومين اللى قالك أنى عايزة أرجع لك. دا أحنا معيشين العيال فى نكد.
الزوج: وهى دى الجريمة اللى أرتكبناها، ومالهاش حل.
الدكتور: أنتى بتشتغلى أيه؟
المريضة: ما بشتغلش.
الزوج: عاملانى شغلتها. حاجة تقرف. ليه بتحاولى تقهرينى؟ ليه مصرة على أنى أبقى زى ما أنتى عايزة؟ المفروض العكس.
الدكتور: لأ، الاتنين غلط. ولا أنت تقهرها، ولا هى تقهرك.
الزوج: عمرى ما حاولت أغيرها. وقابل كل الإختلافات اللى بينا.
الزوجة: عشان ما يفرقش معاك، لانك ما بتحبنيش.
الدكتور: وهو اللى بيحب حد يخليه يطابق الصورة اللى جواه.
الزوجة: يطابق الصح.
الزوج: وهو الصح، أنك على طول لوية بوزك، ومعيشة البيت فى نكد.
الزوجة: ما أنت السبب.
الدكتور: بيقولوا أنا صح، وأنت صح. كل واحد له ظروفه واختياراته، اللى صح بالنسباله، حتى لو كانت عند التانى غلط. المهم نحاول نقلل الضرر من الاختلاف.
الزوج: ونقلل الضرر ازاى؟
الدكتور: بحلول الوسط مثلا. لما تشرب، نام فى اوضة تانية.
الزوجة: دا أحنا كلنا عايشين فى أوضة واحدة.
الدكتور: دى تبقى خانقة، مش خناقة.

#عادل_ندا (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل