الى خالتي أم قيس(قدريه) والدة الباقية منى علي

عبد الرضا حمد جاسم

الحوار المتمدن-العدد: 3088 - 2010 / 8 / 8 - 20:53
المحور: الادب والفن
    

يمه
كدامي ماجنتي تبجين
لكن جنت كل لحضه بعيونج اشوفن دمع
يمه
كدامي ماجنتي تتحسرين
بس تطلع انفاسج جمر يذوب صخر
علبعد تنسمع
يمه كليبج المجروح
محصور مكسور
معصور مقهور
من كثر ما مر على شعبج قمع
يمه
انتِ حرة
واحنه منسولين من كبل سابع ظهر
سبع عن سبع عن سبع
يمه تتذكرين كتلج اشتتمنين
بكل بساطه أو طيبه جاوبني طفل
تربع شبع
لو من صدر أمه رضع
أو عامل يفتخر لو بالعرك ماله نكع
أو شاب ينجح
وبنجاحه علم للصبر والهمه رفع
أورجل بكل شجاعه يكوم لو مره وكع
أو علجرح أصبع وضع
أوام تفتخر بأفعال ابنها لو للبشر بأفعاله نفع
يمه
تتذكرين بالوقت الصعب
كلتي لاتخاف ولا ترتهب
الحاكم الظالم مو بشرجلب
منسول عن جلبه أو ضبع
ضحكوا عليه أولبسوا فروة سبع
أوللضلم باركان الوطن طش أوزرع
ولطبول الحرب بيده قرع
وللمايعرفونه حدع
يجي يوم وتشوفه يا يمه
عريان مكشوف
مذعور مجبور بيده للفروه خلع
يمه
تتذكرين دنيه مابيها صبح
ظلمه
كلتي
يمه أصبر واحتسب
ماأكلك راح يطلع
بس أكلك وره كل ظلمه صبح طلع
ولغيم حتماً ينقشع
وار أكلك يمه
خسران النص مو خسران
لو تحمل الوجع
أولاذل أولاخنع
ولانصه راسه أوخضع
يمه انت من زرع
الأصل باقي شامخ ماركع
والطاح بس يابس فرع
يمه طيب البيج يايمه طبع
منه نهر الفضيله نبع
ونور وجهج عالبعد كل لحضه كدامي يشع
يمه اتمناج يمنه هسه كدامي ربع
للدار مابينج أوبيني سمع
واحهم من ثكل هم الشعب لامل ولا جزع
ناضل وضحه ودوم للعدل والحق تبع
وكل صفات الطيب يايمه جمع
وللظلم والظالم والظلمه بالعمل والجد صفع
وللتواصل ويه باجر من يوم الأول شرع
يمه
عيد بالخير تمسين وتصّبحين وشويه ترتاحين
لن الحق نصع
اوبان اوضوه اولمع
والظالم من جذوره انقلع
والغدر من ساسه انشلع
يمه مسيت العافيه عليج أوعلشعب ألي للحضارة صنع

قصيده ألقيت في عيد الآم والمرأة في باريس في 21 آذار 2010

#عبد_الرضا_حمد_جاسم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات