خريطستان في أزمه

سرمد علي الجراح

الحوار المتمدن-العدد: 3069 - 2010 / 7 / 20 - 10:54
المحور: كتابات ساخرة
    

الكل مشغول ومترقب ومتخوف من تأخير تشكيل الحكومه, ما عدا الخريطستانيون!!! فهم غير مبالين بالمره لما ستؤول له الامور على الصعيد السياسي. ولهذه اللامبالاة مايبررها, فهم ادركوا ان الوجوه الموجوده على الساحه السياسيه ليست جديره بالقياده ولا يوجد بينهم من هو افضل من الاخرين فالكل كسرة وجه, وماكو واحد بيهم تأمنه على صخلتين يسرح بيهن. فاليجي مثل اليروح والحاضر مثل الغايب. كل واحد من رؤساء الكتل يجر وراه سبعين نعجه وحايل, وشيكول يسمع: نعم سيدي, مثل زمن شقاوة العوجه, بس هذوله يكولون نعم مو من الخوف, لكن طمعا في حصه من الذبيحه اللي راح تتقسم. الناس اصبحت تدرك انه ماكو تغيير بالبلد اذا اتفقوا او لم يتفقوا, وهذا كله من طيحان حظنه لأن ندور استقلال ونريد نحكم نفسنه بنفسنه واحنه لا بينه شريف ولا وطني ولا حتى صاحب غيره.
انسجاما مع هذه المصيبه المسماة تواضعا بالازمه, قامت جمعية المكبسلين والحشاشه باجتماع لأختيار مرشح تسويه اسهاما منها في حل الازمه.

المدير: اريد شويه تنتبهون وتصحون لأن الموضوع جدا خطير ومتأزم
عضو رقم واحد: متحزم على وحده ونص.
عضو رقم اثنين: استاذ خير شكو شراح يصير بعد اكثر, ماشاء الله يوميه تفجيرات وقتل وارهاب وماكو دوله ولا خدامات روسيات ولا حتى فلبينيات.
المدير: شمدريني شو همه خابصين نفسهم يردون توصيه على تشكيل... شنو والله نسيت, اي يمكن تشكيل فريق كرة قدم, لالا كأس العالم وخلص. لا اكيد تشكيل فريق محيبس لأن رمضان جاي.
العضو رقم ثلاثه: لا استاذ انته قلت يريدون حلحلة الوضع ويجيبون مرشح تخ...يه!! هيه بالراء لو بالصاد؟
المدير: ها إي هسه تذكرت تشكيل الحكومه وبلكي نشوف مرشح تفليه.
عضو رقم اثنين: استاذ هسه همه واحد مثل الثاني تكول زوج مدس, وشغلة نفس القندرجي, وياهو اللي يصير ماراح يفرق عن اخوه.
رقم 3: لا تخربط بكيفك اكو فرق بين مدس قم وقنادر ايكو.
رقم 2: ايكو.. ن عساها ابخت اللي باعلي حشيش محشوش.
المدير: من حشنا ليش منا!!
عضو4 )توه صحه(: وين اني, حيل بعدني بالبرلمان, هاي شكد كبرتوا, عفتكم زعاطيط.
عضو 1: ولك هذا غير صاروخ معدل, اشتعلوا اهلك حميد صالنصه على هل تعميره.
المدير: وجدتها وجدتها مثل ماقال حشاش الحمامات اخميّس ابن رازقيه الحوله, احسن مرشح تعزيه هو حميد صالنصه. بيه كل المواصفات المطلوبه
عضو1: شبيه حميد صالنصه مواصفات, حتى يكعد بخته هيج كعده. اني اعرفه من جان يلف مزبن
المدير: اول شئ ايام المزبن كضن, وصار حميد من وجهاء القوم وعنده اتصالات بكبار الحشاشه العرب من امثال علي قات والعقيد كوكايين, وامير البقرالمتين, وعنده اصدقاء في العالم الغربي والشرقي ومره سمعته يحجي بالصيني ويه قائممقام الصين من استقلت عن طويريج, يكله: جم جاي عليكم وجم بوش يمكم
رقم4: هجم كوخه يعرف حتى بوش, لا عمي هذا واصل
رقم2: خلص نرفع تعزيه قصدي توصيه بتشريح مشرحنا حميد صالنصه لمنصب صول جعاب.

#سرمد_علي_الجراح (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل