حماتي.. حياتي

مصطفي النجار

الحوار المتمدن-العدد: 2924 - 2010 / 2 / 22 - 23:47
المحور: كتابات ساخرة
    

أسمع يا ابني الكلام الصح.. اسمع وافهم واتعلم.. أوعواك في يوم تبلم.. أسمع نصيحة أبوك تكون واد متنور.. "حماتك حياتك" خدها قاعدة في حياتك، وأوعوا تقعد من غير ما ترضي عنك حماتك. ارسم ابتسامة عرض شبرين وانت معاها واستسمحها تغفر لك ذبك وتتجاوز عن خطائك معاها.. وخلى بالك.. لازم تقدم الولاء وفروض الطاعة وإياك تستهون بحماتك فهي كل حياتك.. بكده تضمن جوازه سعيده وتكون مراتك في حضنك جميلة.

افهم وأعقل كلامي يا واد.. أمك عندي بالدنيا بحالها واللى يرضيها أكون أنا فيه متهني، أمك دي ست عظيمة بحق لأن أمها عرفت تربي وأوعاك تعيش يوم مش متهني.. سيبك من كلام التافهين اللى بينادوا بالشهامة والرجولة.. انت راجل غصبن عنهم، فاهم حياتك، فاهم مصيرك، فاهم قدرك، مش القرآن قال "ولا تلقوا بأنفسكم في التهلكة".. بيني وبينك وبصوت خفيض، حماتي دي ست عظيمة أوعي تفتكر أني خايف والعياذ بالله.. حبي ليها خلاني أنسي عيوبها مش أمك.. دي حماتي.. ست ولا كل الستات.. كبرت ولسه عمرها صغير.. كبرت ولسه شعرها قصير.. شابة ولا كل الشابات.. تأكل وتلبس وتغيظ في البنات.. محترمة وعارفه ربنا أكتر مني ومنك، لكن مشيتها تهد جبال وجبال.. أوعي تفكرها كبرت دي لسه ست البنات.

قلبي بيهفهف لما بشوفها جايه باجري عليها واتشعبط في احبالها.. بدلدل وارفرف من حوليها لأجل ما تهدي نارها وتستقر درجة حرارتها.. حماتي دي آية في الجمال، عيونها يلا تسحر الخيال، حمايا معاها إنسان رقيق.. لا صوت يرتفع ولا كلمة تلخبط كيانها.. ايديها دي جالها ملل من قبلات الولاء.. أنا وأجواز خلاتك الأربعة بنموت فيها موت.. اديك بتشوف هي بتقدم لنا إيه وايه وإيه.. طيبة ورقة وأخلاق ولا في الأحلام. طول عمر أمي تدعيلي يرقق قلب حماتك فيك.. تعرف لما أبوس ايديها قدام أمك تقولى ايه:
- لا مش عارف يا بابا
- تقولى راضية عنك وبنتي معايا كمان.. ليلة سهرة النهاردة تسعد القلب والنظر وتشبع جوعك طووول الشهور اللى فاتت
أنا طبعا قلبي ينشرح وزغاريط بين ضلوعي تنطلق.. وأعيش ليه حمرا ولا ألف ليلة.. تعرف يا ابني اليوم اللى جبتك فيه.. من حبي لحماتي وطيت وحطيت شفايفي على رجليك فقامت خدودها بالفرحة المبتسمة انشكحت.. وقالت لى "يا حبيب قلبي يا ابني اللى مخلفتهوش"، وبصيت على أمك مرة واحدة وكأن جسدي فارق الوحدة اللى انكتبت عليه أخر مرة لما غضبت حماتي من يجي كام شهر وشوية.. قضيت يومها سهرة ما تتعوضتش وعشان كده لازم تكون أحوالك متتغيرش.. حماتك زي أمك ماله يعني لو بوست ايديها واتكيت على البوسة شوية.. ماله يعني لما تسمع كلامها ما انت بتسمع كلام أمك.. ماله يعني لما تقضي لها مشاويرها.. ماله لما تزعق لك في الشارع ما انت زي ابنها.. عمرك سمعت عن ولد له كرامة قدام أمه؟.. اعتبر يا سيدي حماتك هى أمك.

عارف لما حماتك تبقي عنك راضية هتعيش حياتك مستني لحظة حزن أو زعل ومش هتيجي طول ما هي عنك راضية.. هى عايزه منك إيه غير انك تحترمها ولاتعصاش لها كلمة.. خلاص يا سيدي نفذ كل كلامها ولا تنسي منه كلمة واحدة عشان حياتك تكون ليك وبيك سعيدة ومراتك معاك عظيمة وبكلمتين حنيه تأخد كل اللى بتحلم بيه وزيادة حته.


الكاتب الشاب مصطفي النجار

#مصطفي_النجار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل