بِلْسان أهلنَّه - ألأبوذيه إعلّه رُبعْ !!

داود أمين

الحوار المتمدن-العدد: 2837 - 2009 / 11 / 22 - 03:29
المحور: مواضيع وابحاث سياسية
    

البرلمانيين الصوتو على قانون الغفله والحَرمنّه وبوك الأصوات، زعلانين على طارق الهاشمي، شلون يعترض على قانونهم المسلوك بسوك مريدي، وهو تكْ نفرْ، وهُمّه تلث ترباع الشعب العراقي، إذا مو كِلّه!! وما خلو نقطه بالدستور ما نبشوها ولوو ركبتها، وطَلَعّو بيها الرجال غلطان ومو من حقه يعترض!! لا وفوكها راحو للمحكمه الدستوريه حته تِسلكلهُم بخمس دقايق راي يكول النقض مو قانوني! والقضيه وما بيها الجماعه تصورو تعديلاتهم القراقوشيه على القانون راح تعبر من جوّه الرجلين ولا من شاف ولا من دِري، على كولة إخوانه المصريين! وراح بسد قانونهم الجديد، يظلون جيره بزبون البرلمان، مِناه لمّن يطلع صاحب الزمان! وما جانو حاسبين واحد من نص الكتل الجبيره التلاثه المَشَتْ القانون، يعترض ويبوش كل اللي خططوله وبنوه!! وفاجئتهم وخربطتهم إعتراضات الهاشمي، وخلتهم يخيطون ويخربطون وكلساعه يطلع واحد منهم براي ما إله كل ربّاط براي الكبلّه، والمشكله نَسَّو روحهم ويردون ينَسون الناس، لب القضيه وزبدة الإعتراض، وجَلبّو بالكِشور، يِحِق للهاشمي لو ما يحقله يعترض!؟ والرئاسه صادقت لو ما صادقت!؟ وشنهي قيمة إعتراض واحد جدام موافقة إثنين إبيناتهم الريس!؟ وهاي هي طريقتهم الصار شعبنه يعرفها بيهم كلش زين، وقوانة كركوك اللي مررو القانون بسدّها بعدها تازه والناس مانستها! لب إعتراض الهاشمي وزبدته هي أصواتنه إحنه البلخارج، أصواتنه اللي مادة قانونكم الأولى صاحت بيها وير، مدري كَشَّت بطشتْ غسلها، وصارت من 15% ل5% ! أصواتنه اللي تردون تصادروها، وتخلونه مواطنين درجه عاشره! وما ادري شلون حسبتوها وعلى يا اساس!؟ إذا لكل مية الف عراقي مقعد واحد بالبرلمان، وإحنه فوك الأربع ملايين! يعني حصتنه بالبرلمان؟ أربعين، إذا مو فوك الأربعين! جا شلون حسبتولنه 8 مقاعد!؟ وفوك هذا الحجي التشكيك بوطنيتنه، وهذا التمسلت اللي نسمعه كل ساعه على لساناتكم بالفضائيات ، مره سويتونه بعثيه ومن جماعة صدام، ومره زورّنه جوازاتنه وإحنه مو عراقيين! ومره أصواتنه كلها راح تروح لعلاوي والمطلك!! والكل يعرف علاوي صديجكم ، وأجه وياكم على دبابة بوش! وامس عمار الحكيم بالجزيره، كال علاوي اخونه وصديجنه واحنه وياه دهن ودبس! والمطلك خوب كلها الناس شافته وسمعته، ومن نص برلمانكم من حط الورقه وكال هاي ورقة حزب البعث! ومحد فك حلكه ورد عليه! وهسه هم عادها وكال البعث راح يحصّل اربعين مقعد بالبرلمان الجاي، شو ما رديتو عليه ولاجَرّيتو عليه سيف الدستور اليحرم البعث !
المهم الطوبه هسه بساحتكم، إنتم الميه وواحد واربعين نايب، اللي رفعتو إيديكم وصوتو علقانون! إذا تردون صدك تسوون إنتخابات بموعدها،إدرسو القضيه من صدك، وإحسبوها زين، وشوفو الهاشمي علويش معترض، وإنطو الناس حقها، ولا تظلمون العراقيين البلخارج فوك غربتهم وضيمهم، وحقوقهم المسلوبه من أيام صدام ولهسه!! إحسبوها عدل، ولا تفرقون بين عراقي وعراقي علمجان العايش بيه، بعد ما فرقتو العراقيين عالقومية والدين والطائفه!!
ذيج السِنه إلتمو المغنين جدام رازونة محاسب الإذاعه حته ياخذون رواتبهم، المحاسب صاح : حسين نعمه ونِكِدّه بخمسين دينار! فاضل عواد وجرخّه ب45 دينار! ياس خضر ونضدّه بستين دينار! سعدون جابر ولفحّه بخمسين دينار! وصل السرّه العمنه إبو كاظم، صاح المحاسب : داخل حسن، وحط بيده خمس دنانير !! داخ إبو كاظم، وكامت عيونه تسورب، كام مرّه يباوع للخمس دنانير البيده، ومرّه يباوع لحسين نعمه وفاضل عواد والمغنين الباقين، وأمهات الخمسه والعشره تتراكص بين إيديهم، عدّل أبو كاظم عكاله زين فوك راسه، ومد ركبته برازونة المحاسب وكلَّه : بويه يلمحاسب شنهي هاي؟ شو خمس دنانير.. ! والجماعه كلها أمهات الخمسه وأمهات العشره!! شنهي .. يبين حاسبيلنه الأبوذيه إعله رُبُعْ !!

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل