هيا بنا ننتخب !

جمال محمد تقي

الحوار المتمدن-العدد: 2795 - 2009 / 10 / 10 - 18:36
المحور: كتابات ساخرة
    

وين رايح وين ؟
هية لعبة ، هيا بنا نلعب مو ؟
ماكو انتخابات بدون مرجعية او مراجع ، شنو هية هيونطة !
انت انت شنو مرجعيتك ؟
مو اني سمعت انو يعني كل واحد عراقي لازم ينتخب !
اي يعني انت تعرف تنتخب منو ؟
انتخب اللي اريدة غير ، انت شعليك !
اشلون شعلينة ، غير لازم نضبط الانتخابات حتى لا اتشيشنة ، احنة اللي سوينة الانتخابات واحنة لازم اندوزنهة !!
يابة انتخب حسنة ملص هة !
شنو هاي من المرشحات لو من المراجع لو من الائتلافات ؟
اخوية اشمدريني ، هية اجت ابالي ، او انة كتيتهة ، جا هية غير حرية والمواطن حر !
شنو حر او بر ماكو هيج حجي ، يعني ما كو هيج بطة تلعب شناو !
لا لا لا لازم تعرف الجهة لو الحزب اللي اتريد تنتخبة !
حزب الديج هو احسن حزب ، بس ياكل وينام و يضرك بس !
شنو اتحيونت الرموز الانتخابية عدنة ، اوصارت ديج او دجاجة وانة ما ادري ؟
جا لعد امريكا احسن من عدنة شنو مو حزب بوش عندة ماركة الفيل او حزب اوباما حشاك ماركتة الحمار ؟
ها اي اي ، اي والله صدك ، بس احنة بعدنة ما وصلنة الهاي السالفة !
زين شعار القائمة مالتك شنو ؟
ها اي اي ، الشعار ايكول حسنة ملص ذبحت ديج او عزمت كل شيالة البريج !
ولك امنين جبت هالشعار هاذة !
عمي انت مو عندك مرجعية او هية تاج على راسك ، ها او شدكلك ، انت مثل الحمار تمشي وراها اي احنة مرجعيتنة من راسنة ، انباوع عليك او نضحك او نوبات نبجي ، او بعدين انكوم انصنف عليك لانك تركض والعشة خباز ، اشمالك اثوك ؟
شنو يعني انة مضحكة مال الخلفوك ؟ مو هاي احنة دناخذ بطانيات ، او سبح او محابس او ناخذ كمبيالات مال الحج لو العمرة اي شنو بعد ؟ او اهم من كلشي احنة وية اهل البيت بعد شكو ؟
بلابوش اللي يضربك حتى لا اتكول ليش ، او صخرية ماو ابعرج الاذن على هيج سمعة كشرة ، ولك اسمع اسمع ، اهل البيت سكنوا يم دار حقهم ، بس احنة وينة سكنة ها ؟ ولك هذولة ايقشمرون على الوادم ، ولك هذولة من لحم ثورنة ايطعمونة ، همة ايبوكون بفلوس النفط واحنة ماكلنة الهبري ، او فوك . . حبة ماش ، ياخذون الخموس من هل فقرة ، ولك هذولة ما يلطمون على الحسين بس علة الهريسة ، كلبهة ابراسك اشوية راح تفتهم كل واحد من الناس هو نفسة من اهل البيت او ـ بيتنة و نلعب بيه او شلهة غرض بينة الناس ـ احنة مامحتاجين واسطة عد الله هو شايفنة لو لا ، هو مايشوف ها احجي ؟ هو شايفنة زين او شايف السيبندية جماعة المرجعية ، روح روح شوف حتى الكشوانية صاروا من اصحاب الملايين والعقارات والشركات وانت احسب بعد ، امنين ها امنين ؟ اشو الناس ميتة جوع ، او همة او عوايلهم ايعيشون ابنعيم ، وتريدني انتخبهم ، لا لا لا والله ما انتخبهم حتى لو ادخل النار ، بس لازم تعرف هذولة جماعتك همة النار اللي تحرك اليابس والاخضر واللي كال عنهم القرآن المنافقين !
حجيك ايدوخ بس هسة خلي ناخذ او بعدين يجي الليل او نسمع حس العياط !
بس اسمع لا تحجي حجيك هاذة الياهو جان ترة هذولة حالفين لازم ايفوزون او همة امعرتين بالحكم او لازمينهة بيديهم وسنونهم !
الله ايكسر اسنونهم انشا الله ، عمي انة لا راح انتخب ولا اقشمر نفسي !

#جمال_محمد_تقي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل