شنو يعني اشننزع بعد لاسرائيل حتى نغري النتن ياهو ؟

جمال محمد تقي

الحوار المتمدن-العدد: 2688 - 2009 / 6 / 25 - 09:37
المحور: مواضيع وابحاث سياسية
    

يعني واحد يرفع والثاني يكبس ، اوباما يشجع ايجابيات خطاب نتن ياهو ويطالب العرب والمسلمين بتقديم مزيد من الاغراءات حتى يندفع بقوة الشلال باتجاه السلام ، ويكلك السلام باله طويل ، ويراد له حركات من الوزن الثقيل ، ولا ينفع وياه الاستعجال وقصر النفس ، نسيج السلام الوطيد لا يتحقق الا بغزل دقيق يشبه غزل القطن طويل التيلة ، فقصير التيلة يتهلس ويتبعلس تهلس وتبعلس مفاوضات عرفات وباراك وشارون ، لعد هي لعبة شنو ، عمي هذولة يردون ايسلكون البيض بالضراط ، او على هالرنة انشوف مفاوضات عباس وفياض تدخل الحسبة ولم تخرج بعد ، يعني من اوسلو حتى غزة واريحا الى خطة خارطة الطريق وانابوليس ثم وعد بوش بقيام الدولة الفلسطينية في نهاية حكمه الى خطاب اوباما في القاهرة ثم خطاب نتنياهو الاخير اشكد اخذت العملية 15 سنة او شنو يعني اخمسطعش سنة بعمر الشعوب ؟ شنو يعني اذا الاستيطان ماشي ؟ شنو يعني اذا حايط الفصل العنصري الاسرائيلي ايكطع الضفة الغربية تكطيع ؟ شنو يعني اذا مصادرة الاراضي ماشية على اربعة رجلينات ؟ شنو يعني اذا طردوا العرب من القدس الشرقية واستولوا على بيوتهم ؟ شنو يعني اذا هودوا القدس تماما ؟ شنو يعني اذا حفروا تحت المسجد الاقصى وجعلوا اساساته خاوية ؟ شنو يعني اذا اهالي الضفة والقطاع محبوسين ومحاصرين ومداهمين ومهانين يوميا من قوات الاحتلال الاسرائيلي لا عفوا من قوات السلام الاسرائيلي كما يروق للبعض؟ شنو يعني اذا اسرائيل قررت تهجير فلسطينيي 48 ؟ الدولة العبرية يجب ان تكون يهودية خالصة بمعنى يجب ان اتصير نظيفة مو هيجي الحجي ؟ او شنو يعني اذا رفضوا عودة الاجئين الى اراضيهم وبيوتهم ؟ شنو يعني ها شنو ؟ شنو يعني اذا اسرائيل ما تريد او ما تخلي غيرها ايصير ابقوتها النووية او غير النووية حقها مو حقها هي زغيرة او خاف ياكلوها مو؟ شنو يعني اذا انسجن وتعذب حتى الموت اللي تعتقلهم اسرائيل من الاسرى والمعتقلين وهم بعشرات الالوف اي قابل اتوكلهم شكلاتة هسة مو احسن من سجن ابو غريب ؟
كلشي ايهون من اجل السلام ، شنو مو هذا شاليط معتقل واسير ؟ السلام ليش ماتريدونة ها ، عمي هذولة زعاطيط ما يفتهمون بحبال السلام الطويلة ، مو تراها اطول من احبال المشانق ! ؟
على الاقل اتصير دولة على 60 % من اراضي الضفة ومعها غزة ، على الاقل ايصير مسموح للفلسطينيين العمل داخل اراضي اسرائيل ، على الاقل يتبوش المد الاسلامي في غزة والضفة ، مايهم خلي يصاعد المد العصبوي العنصري الصهيوني مثل جماعة اسرائيل بيتنا هذا مو مشكلة ، المشكلة بالمد الحماسي او اليساري المتحمس ، احبسوهم قاتلوهم هؤلاء خطر على الانظمة العربية الصديقة المعتدلة ذاتها ، على الاقل بعد ماكو حرب وملاحقات ، على الاقل تنتعش التجارة والسياحة والناس اتعيش !
لك يا اخي منو مايريد الناس اتعيش ؟ بس غير اتعيش ابرضها وفي بيوتها ، اي مو تطردوها وتخلوها تعيش بالمخيميات او بعدين تقولون ننسى الماضي بدون ارجاع الحق لاصحابه ، لك اخي عن اي سلام بطيخي تتحدث ؟
اخي قرارات الشرعية الدولية واضحة اسرائيل تنسحب الى حدود 67 وعودة الاجئين وتقام دولة فلسطينية الى جانب دولة اسرائيل ، او هذا ما ايصرف للدولة العنصرية التوسعية ، لكن تباكيها على السلام هو ايضا نوع من انواع التمويه وتاريخها يشهد !
خطاب النتن ياهو واضح وصريح او ما يقبل غلط ، مو تردون دولة اي هي دولة بعد شكو ؟
شيء اسمه دولة وهو ليس بدولة ، لا سيادة ولا اقتصاد ولا مياه ولا جيش ولا حدود ولا سماء ، كيان فلسطيني شكلي تحت وصاية اسرائيلية كاملة ، مقابل اعتراف بيهودية اسرائيل ، اي الموافقة الضمنية على تهجير عرب 48 ، وعدم ازالة المستوطنات في اراضي الضفة ، وتطبيع دولي عربي واسلامي كامل لاثبات حسن النوايا ، يعني لا مبادرة سلام عربية ولا تركية ولا فارسية ولا هم يحزنون ، هناك راعي وحيد هو امريكا وامريكا تعرف ماذا تريد ، انها تريد اكبر تحالف عربي اسرائيلي اسلامي ضد اي توجهات معاكسة من ايران او سوريا او من جزر القمر ، فلسطين مثل العقدة بالمنشار ، كيف ستجر امريكا العرب صوب اسرائيل دون ان تخسر اسرائيل مكاسبها في حرب 67 ودون ان تخسر الارض والتطبيع الذي يسمونه سلاما ؟
شنو صح لها رجل وقالت اعور ، عمي ارضوا بالمقسوم والله كريم !
الحل الامريكي خذ وطالب رغم مماطلة ومراوغة اسرائيل حتى لو استمرت المفاوضات قرن قادم ، لا يهم مادام الامر الواقع يفرض نفسه بقوة القوة ناعمة كانت او خشنة ، المشكلة ياسيد اوباما ان اسرائيل لا تقدم شيء يستحق المواصلة في طريق خذ وطالب بل بالعكس ان اسرائيل تاخذ كل شيء ولا تعطي شيئا !
هسة انتم صرتوا مثل النزل اللي ايدبج على السطح !
ستتكشف الاغطية وبسرعة عن مصداقية التغيير الذي ينادي به اوباما وفلسطين هي المحك فالقضية واضحة وضوح الشمس واسرائيل مطالبة بالايفاء بالاستحقاقات التي تزكيها الشرعية الدولية ، طبعا اوباما لا يستطيع تحقيق ذلك حتى لو اراد فقضية اسرائيل اكبر من قضية رئيس محكوم بحكم ولايتين محركات دواليبها بيد حزبين متناوبين على الحكم وهما يمثلان مصالح اعتى راسمالية احتكارية عرفها التاريخ وهي متصاهرة حتى النخاع مع الراسمال الصهيوني داخل امريكا ذاتها ناهيك عن عوائد الاستثمار السياسي والعسكري والاستراتيجي الامريكي في اسرائيل كواحدة من شبكات الحماية للمصالح الحيوية الامريكية في الشرقين الادنى والاوسط !
خصم الحجي النتن ياهو مثله مثل اوباما ايريدون فوك . . . . حبة ماش !
صدق الفتى بائع الجرائد المصري ـ اهرام ، اخبار، جمهورية ـ عندما ردد وهو يدلل على بضاعته للزبائن قائلا : بص شوف واقرأ يا بيه ده النتن ياهو بيعمل ايه !

#جمال_محمد_تقي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل