ثرثره عراقيه على دجله /ح 2

علي الصفار

الحوار المتمدن-العدد: 1957 - 2007 / 6 / 25 - 11:06
المحور: كتابات ساخرة
    

أصيب عباس العراقي بأربع رصاصات بينما كان يمشي يوما ما في احد شوارع بغداد بسبب مواجهات حدثت بين ألأرهابيين والميليشيات والقوات الحكوميه والأميركيه،ظل عباس في المستشفى لأسابيع ولم يستطع ألأطباء إخراج الرصاصات والتي كانت بأربعة انواع، المهم منذ تلك الحادثه اصبح عباس العراقي شخصا آخر يقضي وقته على نهر دجله يتحدث معه ويصر على ان اعظم مافي دجله انه شاهد على كل ماحدث ويحدث في العراق وانه أي دجله يسجل كل الأحداث في سجل خاص به بكل حياديه وسيأتي يوم يحكيها بصوت مدوي ...احيانا يتكلم عباس مع دجله بصوت عالي ونحن معه معتقدا اننا لانسمع مايقول وحتى لو سمعنا فلن نفهم لأنه يتحدث معه بلغه خاصه تعلمها عندما رقد في مستشفى مدينة الطب الكائنه على نهر دجله..واليكم بعض احاديثه التي سجلتها بدون علمه و قد تكون هلوسات وعلينا مسامحته بسبب حالته والرصاصات ألأربعه ولأننا قد نصبح مثله يوما ما كما يؤكد ..}.

لامصالحه ولاهم يحزنون

كل العراقيين يتمنون يرجع بلدهم آمن وتنحل المشاكل، ومن وره الكتل اليومي كامو يصدكون بكل شي ،وهسه الموده عالمصالحه الوطنيه ،تنكطع الكهرباء يكلك، لاتضوجون من تصير مصالحه تجيكم الكهرباء 24 ساعه وعلى هالرنه طحينج ناعم، بعدين شنسوي غصبن علينه نصدك بيهم، الغركان يجلب بكشايه،بس مرات اصفن ويه نفسي واكول زين المصالحه ويامن، اذا المالكي يريد يتصالح ويه التوافق، يعني الشيعه ويه السنه، هم ميخالف بس هو ده خلي يصالح بين الشيعه اول شي ،اشو يوميه عالكه بيناتهم ، اصلا واحدهم مايباوع بوجه صاحبه،زين شلون راح يقنع السنه، مو بس هاي اذا هو كدها، دخلي يوحد حزب الدعوه اللي انقسم خمس اقسام ،يعني اللي مايكدر على اهل بيته يكدر عالجيران وشلون جيران كلهم من جماعة عادل إمام الممثل ( ضربني بخده على ايدي)، إستاديه بالتهم،المهم هاي المصالحه مورفين امريكي يلهونه بيه، ومن نعرف الحقيقه ينطونه غيره وهاي صار إلنا اربع سنين على هالموال ..العجيبه مرات اقره بالحوار المتمدن مال رزكار لكتاب وسياسين معروفين ينظرون للمصالحه، واحد يرفع واللاخ يكبس، شلون عابره عليهم اللعبه ماأدري، يابه والله هسه المالكي لويتصالح ويه الشيطان هم ماترضه عنه امريكا وراح يطلعوله غير شغله وهنه هوايه،يخلص مصالحه يكولوله خطيه البعثيه وحتى لو رجعهم يكولوله الجيش ومن يرجعهم يطلعوله شغلة ألأمن مال صديم....صدكوني كلها فاليوم امريكي ، مايفيد ويه السرطان اللي بينه..وانتظرو اذا ماطار المالكي...وجابوالنا مالكي برقم جديد...


فالح وفلاح....ياعمال العراق..اويلاخ

يايابه... يابويه..شلون راح تمشي امورنا إحنا العمال...ليش ربي وره ماحصلنا كل حقوقنا، يتزاعل فالح ابن مكطوف ويه فلاح ابن علون، بكلشي قبلنا، سقطت دولة العمال وكلنا نسوي غيرها ،صار أربع سنوات تحملنا ألأحتلال وألأرهاب والميلشيات وهم صبرنا، بس شلون يزعل فالح وفلاح ، هم نرجع على قصة لينين وستالين.....تصدكون اكو واحد كتب مقاله بالحوار المتمدن على فلاح يوم ألأحد 24/6... يكول بيها ( ان شخصيته القويه كقائد عمالي ولأكثر من 25 عام لم يأخذها من أحد بل كسبها بنضال مرير...) ، بشرفكم لعد شراح يكتب على لينين لو سوسلوف..يابه والله آني ماطالع من العراق أبد وآني عامل اب عن جد ومتابع النقابات وسامع ب(علي شكر وصادق الفلاحي..وحتى محمد عايش) بس ماسمعت بفلاح إلا بعد ألأحتلال وعلى غفله وعالأنترنيت بس، وبالأخير سمعنا بفالح من زعل وياه،ومن سألت على فلاح كالو خطيه جانت اموره كلش داجه قبل ألأحتلال حتى فلوس بطل........ ماعنده، بس هسه الله وفقه وماينلكي بالعراق وشايل اللاب توب مالته ومن دوله لدوله،يعني لو آني بمكانه ادعي للأحتلال يوميه ، وأرفع شعار الله ينطي ألأحتلال ..عمي فالح وفلاح د ضربوا بالأيفادات مال المحتل بعد شلكم بها الشغله،بشرفك فلاح لوما ألأحتلال شي يوصلك لأمريكا ولندن،اكيد انت ما مصدك بنفسك بس هم دير بالك على أخيك فالح ،هم خطيه من كل عشر ايفادات انطي واحد، دزه لعمان اكيد انت ضايج منها، شنو فرقهه عنك، اشو هو هم شيوعي /عمالي / مجالسي/ ومن انصار النسوان اللي يتزوجن بأربعه،. بعدين عيني فلاح انت مايصير كل ماتصير مظاهره بمكان تطلع بيان تكول انت مسويها بس لا تطلع انت مسوي إضراب كاورباغي، هاي ماتعبرعلينه، والصدك ضحكت من قريت الحجي مال جماعة فالح وشنون توحدوا المجالس الأربعه ،صدك جذب كبل شهر جنتو واحد شوكت صرتو اربعه وشوكت توحدتو يعني افتهمنا انتو تشجعون النسوان عالطلاك بس مو بالسياسه..
ومو بس هاي انتومنتبهين انتو إثنينكم نفس الأسم تقريبا، الفرق هو مكان حرف الألف،واحد ليكدام والثاني ليوره، يعني مو فد فرق بروليتاري...ها.. لا....والله شلون... واحد حرفه تقدمي واللاخ رجعي ،هسه عرفت السبب...يابه انتو جماعة الشيوعي العمالي تاكلون وتشربون وتـ..... شيوعيه...

بس تره خطيه العمال ...ومثل ماكال ألأخ اللي كتب بالحوار يوم ألأحد( 24/6) على فلاح...
فلاح علوان....عنوان..لعنفوان....الطبقه العامله... ما ده يرهم الوزن ...الأحسن


فلاح علوان......عنوان.....لعنفوان......ألأمريكان

#علي_الصفار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل