سكتش مسرحي ساخر ( قرن موز )

عمر قاسم أسعد

الحوار المتمدن-العدد: 6494 - 2020 / 2 / 18 - 20:42
المحور: كتابات ساخرة
    

الشخصيات ( ابو ضياء / أبو خالد ـــ ومجموعة من الباعة )
مشهد ( سوق شعبي لبيع الخضراوات والفواكه . اصوات الباعة تملاء السوق .البائع أبو ضياء امام بسطة تحتوي على عدة صناديق لبيع الموز الفلفل الاحمر الحار )

أبو ضياء : موز يلا يا موووووز هالمرة امريكي يا مووووز ، لا تحكولي صومالي يا موووووز امريكي من عند ترامب يا مووووز ـ فلفل ، فلفل احمر يا فلفل ، فلفل بواسيري يا فلفل ، امريكي يا فلفل ، من عند ايفانكا يااااا فلفل . بطلنا نبيع بطيخ يا مووووز ، لا تغاااار يا فلفل فلفل احمر من البطييييخ يا فلفل ، بطلنا نبيع بالحز يا مووووز ، هلاء نبيع بالقرن يا مووووووز ، تع خدلك قرن على زووووئك يا حلو ، حرك حالك بقرن الفلفل وحلي تمك بقرن المووووز ، تع جرب يا حباب ، يا بلاش يا الموز ، اشتري قرن بطلعلك قرنين ببلاش ، نقي يا ولد اصفر ولا أحمر ، تدلل يا حبااااب .

( يدخل أبو خالد إلى السوق ويتفرس في الباعة والبضاعة ، ويشاهد من بعيد أبو ضياء )

أبو خالد : مرحبا ابو ضياء كيفك وكيف اخبارك ، شو بضاعتك اليوم ؟
ابو ضياء : أهلا يا صاحبي كيفك انتا ، والله زماااان عنك . شو يا صاحبي ليكون بتشتري من غيري
أبو خالد : هههههه ، ولو ابو ضياء ما بستغني عنك والله ، شو بتبيع اليوم ؟
أبو ضياء : شوفتك . موز وفلفل
ابو خالد : اوف اوف اوف ، شو جاب الموز للفلفل يا رجال !!!

أبو ضياء : يضحك ـ سلامة فهمك يا ابو خالد ، يا رجل هاي البضاعة هلاء موسمها ومش ملحق بيع ، خلي العالم تتمزمز وتتفلفل
أبو خالد : يا رجال أنا خابرك زمان تخصص بطيخ وشمام ، شو يلي جد عليك ؟
أبو ضياء : اها ، كلامك صح ، زمان كنت أبيع ابو الحزوز وكان سوقه ماشي ، هلا ببيع ابو القرون وكمان سوقه ماشي ، بتعرف كل وقت الو بضاعته يا عم ابو خالد ، ما ضل حد بدو يحزز ، الكل شبع من التحزيز وانحز كرشه ، هلا خلي العالم تجرب ابو القرون بلكي قرنت ، واذا تقرنت رح تترحم على أيام ما تحززت
هلا سوق القرون يا صاحبي ، اي اشي اسمه قرن صار محبوب عند اللي بالي بالك ، يعني قرن موز ، قرن فلفل ، قرن فجل ، قرن بصل ، هههههههه
ابو خالد : هههههههه يا رجل هلا البصل والفجل صار اسمه قرن
ابو ضياء : طلعت معي بالغلط ، بس بتعرف طول بالك ورح يجي موسم الروس ، راس البصل ، راس الفجل ، راس العبد ، راس الببور
أبو خالد : ههههه والله صدقت يا ابو ضياء ، بس انتا مش ملاحظ انك داخل بوز بالسياسة وكلامك صار احمر من قرن الفلفل
ابو ضياء : يصير أحمر متل قرن الفلفل ولا يصير أصفر متل قرن الموووووز ، مع انه الموز والفلفل مع انه الموز والفلفل يشتركو بصفقة القرن ، قصدجي ؤصفة القرن يعني الاثنين قرون
ابو خالد : يا رجل بلا اثنين بلا ثلاثاء ، خلص بلا ما نتبهدل من هالسواليف ، وزن ثلاثة كيلو موز خليني اتسهل ، بس اوعى تخربط الموز باكم قرن فلفل
ابو ضياء : يا حبيب قلبي أولا أنا ما رح أبيعك ، وثانيا أنا ما ببيع بالكيلو ، ببيع بالقرن يا غالي ويلي بشتري قرن بعطيه قرنين زيادة
ابو خالد : اوف اوف اوف ، وليش ما بدك تبيعني يا رجال !!!
ابو ضياء : والله يا ابو خالد انتا صاحبي وحبيبي وعشانك صاحبي وحبيبي ما رح أبيعك
أبو خالد : ولو يا رجال ، ليكون هاي القرون إلها شغل ثاني !!! لا يا عمي أنا بطلت اشتري ، بلا موز بلا فلفل بلا خيار وبلا بطيخ كمان

أبو ضياء : هههههههههه يا رجل والله ضحكتني ، ذكرتني بالخيار ، منيح يلي اسمها حبة خيارة مش قرن خيار ، ويمكن يجي يومها ويسموها تحميلة خيارة
أبو خالد : الله لا يجبرك يا ابو ضياء ، رح تودرنا اليوم
ابو ضياء : بتعرف يا رجال ، هاي القرون مستوردة من امريكا ، شايف كيف شكلها بتجنن ، اللهم صلي على سيدنا محمد ، بتلمع لمع من النضافة ، فعلا اشي فاخر مصقول وناعم ، ممممممم بس يا صاحبي طعمها مر وحاااااار يا ابو خالد ، التجار والسماسرة طول عمرهم يضحكو على الناس ، صارلهم فترة طويلة بحكو عن هاي القرون ودعايات في الفضائيات والجرايد ، وعم بطمعو الناس يشتروها ويوكلوها ، وفي ناس اكلتها يا صاحبي ، وطبعا اكل قرن الموز بختلف عن اكل قرن الفلفل فهمت ولا اشرحلك ؟
ابو خالد : لا فهمت فهمت ، الله يعين البوسرجيه يلي اكلوها
ابو ضياء : بتعرف يا ابو خالد انا اعجبني بالبلد هون ناس كثير شرفا وأحرار ما حد قدر من القرون يلعب عليهم ، روح امشي بالشارع وروح للسوق واسمع رأي الناس النضيفة الشريفة ، فعلا اشي برفع الراس
أبو خالد : آه والله انك صدقت يا ابو ضياء ، فعلا بهاي البلد ناس شريفة فاهمة وواعية وما حد بقدر يلعب عليهم لا بحز بطيخ ولا بقرن موز ، بتعرف يا ابو ضياء ، كمان يلي عاجبني ورافع راسي انه كل الناس ملتفة حول الموقف الرسمي
أبو ضياء : شو يا رجال ، بشوفك انتا هلاء بتحكي سياسة ، بس بتعرف ، كلامك صح وهاي صفقة القرن طلعت من واحد قرن ولبًسها لناس قرون مثله،
ابو خالد : الله المستعان يا ابو ضياء ، والله ينصر هالشعب يلي بعده صامدة وبعده بناضل
ابو ضياء : وحياتك طول ما احنا هيك موقفنا واحد وثابت ما حد بقدر يضحك علينا ، ولا حد بقدر يطعمينا لا حز بطيخ ولا قرن موز فلفل ، والله ينصر الأمة ، وصحة على يلي اكل قرن الموز


انتهت

#عمر_قاسم_أسعد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات