سكتش مسرح ( ام الشهيد )

عمر قاسم أسعد

الحوار المتمدن-العدد: 6025 - 2018 / 10 / 16 - 17:01
المحور: الارهاب, الحرب والسلام
    

أم الشهيد
تأليف واخراج: عمر قاسم أسعد


الشخصيات ( أبو خالد / ام خالد / ام باسل / عسكري رقم 1 / عسكري رقم 2 )

منظر ( بيت يحتوي علي أثاث بسيط وام خالد تعمل في تنظيف البيت )
( تسمع ام خالد دقات على الباب مع صوت جارتها أم باسل وهي تدخل البيت )

ام باسل : هذا أنا يا خالد ، كيفك يا جارتي
ام خالد : اهلا وسهلا ام باسل شرفتينا والله تفضلي يختي
ام باسل : ما قولتيلي شو صار معكم ، يعني ما حد اتصل فيكم من الجيش عشان اولادك
ام خالد : لا والله ما حد اتصل ولا حتى خالد ولا اخوه اتصلو
ام باسل : الله يرجعهم بالسلامة ، الله يكون بعون هالعسكر يلي بحرسو الحدود
ام خالد : اه والله الله يكون بعونهم ويكون بعون امياتهم وأهاليهم
( يسمع صوت ابو خالد وهو يدخل البيت )
ابو خالد : بعد ان يتنحنح ، السلام عليكم هاي جارتنا ام باسل هون ، اهلا اهلا يا ام باسل
ام باسل : اهلا يخوي كيف حالك ، والله جيت اطمن على اختي ام خالد
ابو خالد : ولو يختي البيت بيتك
ام باسل : ما في عندك اخبار عن الاولاد
ابو خالد : لا والله ما في اخبار ،ـ بس مبارح سمعت انه الوضع ما بطمن وصار صعب شوي وفي ناس سمعت صوت قنابل واطلاق نار كثيف
ام خالد : الله يستر ، والله يحمي هالوطن واولاد الوطن ، ويرجعلي اولادي بالسلامة يا رب
ابو خالد : الله يسمع منك يا ام خالد
ام باسل : ولو يا جار طيب المحروس خالد بعدو عريس وما طبق الشهر ليش ما اخذتلو اجازة مهاي اخوه بسد عنو
ام خالد : شايفه يا ام باسل حكيتلو هالحكي من اول وما رظي قال حدود البلد اهم من العريس والعروس
ابو خالد : اه والا يا ام خالد ولا بدك تعارظيني وظلك مدلعة الاولاد
يعني لو كل واحد متجوز وبدو يظل عريس عند عروستو لعاد مين بدو يحمي البلد ، ولا ليكون هالبلد مش النا
ام خالد : ولو يا حج ، والله مش قصدي مثل ما بتحكي ، بس يعني الولد لساتو عريس وبعدو ما تهنى ، لما راح اخوه ما حكينا
ابو خالد : يا حجة الله يرضى عليكي ، البلد أغلى منو ومن عروستو
ام باسل : اه والله يا يخوي هاي بلدنا ونحميها برموش العيون ، وما في احلي من الشهادة علي تراب الوطن آه يا ابو باسل الله يرحمك يا شهيد الوطن هاي صرلك مستشهد ثلاث سنوات والله صبرني علي غيابك واللي خلف ما مات
ابو خالد : الله يرحمك يا خوي وجاري وحبيبي ابو باسل ، يلا عقبال عند اولادك يا ام خالد الله يطعمهم الشهادة
ام خالد : الله يرجعهم سالمين وغانمين
ابو خالد : يلا بدكم اشي أنا بدي اطلع للسوق
ام خالد : الله يسهك امرك مع السلامة
ابو خالد : يلا السلام عليكم ، ادعولنا
( يخرج ابو خالد وتسود لحظات صمت ثم تتنهد ام باسل بشعور المرأة المخنوقة التي تفتقد زوجها الشهيد )
ام باسل : آآآآآآآآآآه الله يرحمك يا ابو باسل الله يرحمك يا شهيد والله الحياة صعبة وقاسية بدونك ،
ام خالد : الله يصبرك يختي وهاي ما شاء الله اولادك رجال الله يحماهم همي سندك وعزوتك
ام باسل : وانتي يختي يا ام خالد والله انو جوزك رجال وقلبو قوي وعندو البلد اهم من اولادو

( يدخل ابو خالد متثاقلا وبرفقته شخصين بملابس عسكرية ، تنظر اليه ام خالد وام باسل بدهشة واستغراب ، لحظات صمت تشد الجميع )
ام خالد : خير شو في ، ومين اللي معك
ابو خالد : بتعرفي تزغردي يا ام خالد ، وانتي يا ام باسل يلا زغردن ، زغردن باعلي الصوت وخلي كل الناس تسمع ، يلا خلي الناس تعرف انه رح نزف الولد للجنة ،
( ام خالد تبدو عليها علامات الانهيار وتتكلم بكلمات غير مفهومة ، تقترب منها ام باسل وتحضنها
ام باسل : ولو يا ام خالد هسة كنتي تواسيني بجوزي الشهيد ، وانا هسة بحكيلك نيالك يا ام الشهيد
انا رح ازغرد
( تزغرد ام باسل ثم تلتفت لام خالد لتشجعها علي ان تزغرد ، تبدأ ام خالد بالزغردة مع بكاء ثم تستمر الزغرؤدة بشكل طبيعي )
( يتقدم عسكري من ام خالد وينحني امامها ويقبل يدها )
عسكري رقم 1 : ابنك رجال من ظهر رجال يمه ، والوطن بدو رجال يحموه ، وابنك كان يحمي الوطن واستشهد وهو بحمي الوطن
عسكري رقم 2 : يا حجة انا سمعت صوت ابنك كان صوتو يرج الارض مثل المدفع ، وكل طلقة تطلع من بندقيتو يقول الله اكبر هاي من خالد لصدر العدا ، كان يتمني يستشهد ويسيل دمو علي تراب الوطن ، ابنك وصاني يا يمة احكيلك تحملي صورتو وتضحكيلو وتزغردي باعلي الصوت ، ابنك وصاني يمه احكيلك ضلك زغردي قد ما تقدري عشان يسمع صوتك واوعي تنزل دمعاتك ، واذا ولا بد بدك تعيطي يمة سكري الباب عليكي لحالك وعيطي بس اوعي حد يشوفك ويشوف دمعاتك يمة
يا يمة الشهيد بدو زغرودة وعرس الشهيد بدو ينلف بعلم الوطن ، الشهيد بيدو يندفن تحت تراب الوطن ، الشهيد بدو نزرع على قبرو ورد وشجر ، الشهيد بدو غيوم السما تنزل مطر تروي القبر ليكبر الشجر فوق القبر ويثمر
ابو خالد : آآآآآآآه يا ام خالد هسه انتي ام الشهيد ، ارفعي فوق راسك وامشي على روس اصابعك واحكي لكل الناس أنا ام الشهيد

انتهت

#عمر_قاسم_أسعد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل