سعيدة مبارك و حنكور المِفَشْ

أيمن غالى

الحوار المتمدن-العدد: 5768 - 2018 / 1 / 25 - 17:03
المحور: كتابات ساخرة
    

لو تابعنا أفلامنا الإبيض و الإسود المصرية؛ حا نلاقى شخصيات الأفلام فى مقابلاتهم لبعض؛ واحد بيقول للتانى: سعيدة, و التانى بيرد عليه بـ: سعيدة مبارك ..
و ده كان حال الشارع المصرى فى الوقت ده ..
و لغاية النهاردة؛ ما حدش عارف حقيقة حكاية سعيدة مبارك دى تطلع إيه ؟!! ..
و الحكاية ببساطة إنه كان فيه واحدة كان إسمها سعيدة و كانت عاملة عاملة مهببة و مِنَّيِّلَة بستين نِيلَة و سيرتها كانت على كل لسان؛
يعنى كل واحد بدل ما كان بيحيى التانى بتحية اللقاء؛ كان يقصد يقوله: شوفت سعيدة عملت إيه ؟
و الرد كان: سعيدة مبارك
و مبارك ده إللى هو أبو سعيدة ..
يعنى كان عاوز يقول له: أيوة عارف إللى عملته سعيدة؛ إللى هى بنت مبارك
يعنى ما كانش ينفع الرد يكون: سعيدة عبحفيظ و لا سعيدة الشهبورى و لا سعيدة فتاكات؛ لأن سعيد مبارك ذات نفسها هى إللى كانت معنية بالشرشحة ..
و كان وقتها ممكن إستبدال حكاية سعيدة و سعيدة مبارك بأسامى ناس تانية؛ لو كانت عَمْلِتهم أسْخَّم من عَمْلِة سعيدة مبارك؛ يعنى لو كان فيه واحد إسمه حنكور المفش؛ و كان عمل جناية أو جريمة أو فعل مشين زلزل الشارع المصرى؛ كان المصريين وقتها شرشحوه, و كل واحد يقابل التانى يقول له: حنكور
و التانى يرد عليه بـ: حنكور المِفَشْ
لكن بعد عصر البترودولار و هبوب رياح الوهابية الجنوبية الشمالية الغربية؛ نزلت علينا الفتاوى من علماء التقوى و الورع و الفضيلة بحرمانية شرشحة سعيدة مبارك و أمثالها زى حنكور المِفَشْ ..
و قالوا بلاش نجيب فى سيرة الناس و نشرشحهم بالطريقة دى, و ضرورى نحيى بعض بتحية يُتفق عليها و نِرِْدم بيها الشارع المصرى؛
يعنى إللى يقابل واحد يقول له: سماعليكو
و التانى يرد عليه بـ: سماحتوبركاتو
و النهاردة ماتت حكاية سعيدة و إندفنت معاها و إختفت الكلمة من لسان الناس و إرتاح أبو سعيدة " مبارك " فى تُربته .. و عيشنا فى زمن سماعليكو ,و سماحتوبركاتو
و إللى فات مات و أذكروا محاسن موتاكم و إفتكروا أى حسنة لسعيدة و لأبوها مبارك ..

#أيمن_غالى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات