أنا و إنجيل بوذا

أيمن غالى

الحوار المتمدن-العدد: 5746 - 2018 / 1 / 3 - 20:48
المحور: كتابات ساخرة
    

من طفولتى و أنا بأشترى كتب حسب إمكاناتى و مصروفى الذى لم يكن يتعدى البضعة قروش, الأطفال كانوا بيشتروا بمصروفهم حلويات و بسكوتات و شيكولاتات, و أنا كنت الفقرى إللى فيهم و أروح أشترى بمصروفى كتيبات و قصص و مجلات, و لما إزداد نهمى للقراءة بما تعارض و تخطى حدود إمكاناتى و قروشى القليلة خرجت للبحث عن المكتبات العامة بحثا عما تفتقر إليه مكتبات المدارس إللى كنت مشترك فيها و بأستعير منها الكتب ..
و هوباااا .. و إتعرفت على أول منجم دهب بالنسبة لى و كانت مكتبة البلدية العامة بالإسكندرية .. و أول كتاب لفت نظرى كان بعنوان " إنجيل بوذا " ..
و إنجيل بوذا - كتاب البوذية المقدس, و إللى إختار له مترجمة لفظة إنجيل - ده حدوته و حكاية إنسانية لذيذة جدا ..
لكن أهم ما لفت نظرى فى إنجيل بوذا هى الميثولوجيا البوذية و الفكر البوذى للحياة الأخروية ما بعد الموت و فكر الثواب و العقاب للإنسان حسب المعتقد البوذي ..
و أنا شايف إن الفكر البوذى؛ هو الوحيد من المعتقدات إللى جاوب إجابات شافية و مقنعة لأتباعه فى السؤال إللى حاولت كل الأديان و المعتقدات الرد عليه و هو " ليه إنسان يتولد فقير و غيره غنى ؟؛ ليه واحد يتولد فى بلد متحضر و التانى فى بيئة متخلفة ؟, و ليه واحد يتولد بإعاقات جسمانية و بأمراض و عيوب خلقية و غيرة يتولد صاغ سليم و بصحة ممتازة " " و غيرها من الأسئلة ..
البوذية - و من بعدها ديانة الهندوس - تؤمن بتناسخ الأرواح, و بتقول أن الخالق قام بخلق عدد من البشر و لشرورهم فسدوا و لما ماتوا - و لشرورهم و خطاياهم - أُعيد بعثهم للحياة من جديد و إتخذت أرواحهم أجسام كائنات دنيئة للتطهير و كل واحد و حسب شروره؛ يعنى إللى شروره كتيرة يعاد بعثه فى كائن أكثر دناءة, و إللى شروره أقل يُبعث فى كائن أكثر رقيا, و لَمَّا الكائن يموت ترتقى روحه و تُبعث للحياة مرة تانية فى كائن أرقى و هكذا حتى يتم تطهيره, و يُبعث أخيرا فى صورة إنسان مرة أخرى, و يا يبقى محترم و يعيش إنسانيته كاملة و يوصل لحالة الرقى الروحى " النيرفانا " و يدخل الجنة أو يعيش بما يتناقض مع الإنسانية و يعيش عيشة منيلة بستين نيلة و يرجع تانى للمرمطة و تدخل روحه فى كائن دنئ و يدخل تانى فى مرحلة تطهير تانية طويلة فى كائنات دنيئة إللى يهشها و إللى ينشها و إللى يضربها بشبشب و إللى يخبطها و إللى يجرجرها و إللى يعملها كوفتة و غيره ..
الخلاصة حسب الفكر البوذى:
حا تعيش إنسانيتك؛ حا تدخل الجنة .. حا تعيش عيشة البهايم حا يتحط عليك و تعيش عيشتهم بحق و حقيقى بقرون و ودان طويلة و ديل كمان ..

كيف تدعم-ين الحوار المتمدن واليسار والعلمانية على الانترنت؟

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات