سوالف أبو تانيا .

صادق محمد عبدالكريم الدبش

الحوار المتمدن-العدد: 4889 - 2015 / 8 / 7 - 18:15
المحور: مواضيع وابحاث سياسية
    

سولف يا أبو تانيا !...ولا تخاف !...يعني صير مثل يحي قاف الله يرحمه ، ويرحم والديكم .
أنتو بس انطونه شوي فنتك وطولوا بالكم عليه ...ولا تستعجلون ، لأن السالفة تره خاشه ببعضها ...ويمكن كولت الله يرحمه ( ماوستونغ ...رب شرارة أحرقت سهل ) ...وتسارع الأمور رح يخلينه ندور ونفر بأذانه ...والله يجفيكم شر الأشرار ...والمصايب ماشاء الله معره تجي على شعبنا !..وعبالك ماكو غيرنا داتنزل عليه !...بس أحنه ...عبالك سابين العنب الأحمر ...لو دايسين على جني ونسينه نكول بسمالله الرحمن الرحيم ...لو عبالك أبليس أول ماربه غضب عليه كلله روح لأرض السواد ...لكن حسب علمي أحنه هواي عدنه سادة وأنبياء وصالحين ...همه أكيد يشفعونه من نمر بشده ...بس هم الشغله تريد صبر ....ولازم نطول بالنه ...حتى لو تمشي الدنيه ويانه عكرف لوي !...والله يجفينه ويجفيكم ...عكرف لوي الدنيا ...هي شلون دنيا ...أشو سوده مصخمه ...ونستجير بعفوي الله .
ياناس مصيبة مصيبتنه !!...نحجي تفضحنه قضيتنه ...نسكت تكتلنه علتنه ...وين نودي وجهنه ؟...حتى المرجعية اللي جنه نكول توكف ويه الحق ...نوب راحت ويه الحرامية !...ما أدري شو هو السبب ؟...لك ياعمي من الله يرضى عنكم سادتنا ..تره والله هذوله يورطوكم !! ها ...عود ليش تكلون ما كلتونه ...هذوله اللي اليوم وكفتوا وياهم ؟!...تره والله هذوله لادين ولا ديانه ...والله ياسادتنا هذوله يكلولكم ...يا مرجعيتنا ؟...تردون غزال ؟...أخذوا أرنب !,,,تردون أرنب ؟..أخذوا أرنب !...تره والله هذوله ما يشتروكم بزبانه ...ومصلحتهم فوك كل سئ ..وأذا صفيتوا وحدكم وما رح يكوفون وياكم أيام محنتكم لاسامح الله !!؟...تره اللي رح يوكف وياكم أحنه والملايين الي رح تطلع في المظاهرات !...أذا مو اليوم !...فباجر !...وأذا مو باجر !..فبعدها ...وأذا أنتم ما تصدكون بهذا الحجي .؟!!...أنتظروا وشوفوا الأيام شرح تكشفلكم المخبه والمستور ؟!!...وأنتم تره والله ألكم أرفع مكانه في نفوسنا ونفوس السواد الأعظم من شعبنا ...والله هو الشاهد على ذلك ..وأحنه ما عدنه مصلحة نغازلكم لو نجذب عليكم ...واللي على لسانه والله نكوله... ومن دون نفاق ولا رياء ولا ولا تحريف ...لأن المفلس بالقافله أمين ...ورحمه الوالديكم ...ونوصيكم من هذولة الملعونين ؟...بس رغم هذا نكول ألله يرحم والديهم وعلى البلوة اللي بلونه بولادهم هذوله ...أودعناكم ...وأنشاء الله نمسي على تظاهرات تزلزل الأرض تحت أقدام هؤلاء السراق الفاسدين والمفسدين وأن غدا لناظره قريب .

#صادق_محمد_عبدالكريم_الدبش (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات