محمد جلاب البديري
الحوار المتمدن-العدد: 4169 - 2013 / 7 / 30 - 06:03
المحور:
الادب والفن
اللوحة الأولى
..
يلّي ليلك نطر
صبحك
وي حلاتك طعم
ملحك
ياسفر گطرة مطر
كل محبّه تزيد
عمرك
ياورد مشتول بينه
عطره نابع من حنينه
يافرح روحي الحزينه
وماشفت بالدنيه
طبعك
ساكن بروحي ومهجتي
وانه أدَوِر وين
گلبك
سافرت حلمان فرحه
إبَحر عينك
ردت أشوفن يمته وصلك
وينه حُبك
....
..
اللوحة الثانية
....
شلون تخلص من عذابك
والحزن عايش إبابك
المحبه فياض عندك
ياحضن يشبگ شبابك
ياحلاته الوفه بگلبك
والعشگ رسمه بكتابك
عُمر تتنطّر نصيبك
والوكت عارف أسبابك
ساكن بديره غريبه
ومنتظر شوفة أحبابك
....
..
اللوحة الثالثة
....
هاك أخذني وياك
مابعد الشمس
هاك رِد أيامنه
الچانت أمس
مثل نسمة صيف
نتناغه بهمس
وشلون چنّه إندغدغ
الفرحه بحلم
ونكحّل الحب
بعرس
#محمد_جلاب_البديري (هاشتاغ)
كيف تدعم-ين الحوار المتمدن واليسار والعلمانية
على الانترنت؟