جهاد علاونه
الحوار المتمدن-العدد: 2903 - 2010 / 1 / 30 - 08:48
المحور:
كتابات ساخرة
والشيء اللي بسطح الواحد من جوى بس يجي على الموظف ويلاقيه مش في مكتبه وبس نسأل عنه بحكولنا : راح يتوضأ أو راح يصلي , وهات حتى يجي يرجع على مكتبه وغالباً بس يرجع بحكيلك هذه المعامله مش عندي وأحياناً بلمحلك وبحكيلك : اتلحلح اشوي كلك نظر وزوق من تحت إلى فوق .
كلشي بده واسطه , حتى الشغله الفارطه أو التافهه , والروتين الوظيفي في تقديم المعاملات زهقنا حياتنا , والترهل الإداري موجود وبجننوك الموظفين وهم يقولون لك روح وتعال وبعدين تعال وروح وروح وقعها من عند هذاك وبس اتخلص من عنده هو بحكيلك و وين اتروح وقبل ما حدى يقلك روح على المدير بتيجي عندي عشان أشيك عليها وآخر شغله بقولولك إياها : روح أقعد إهناك حتى يجيك دورك , وإذا بدك تجري على معامله حكومية أولاً بدك تعرف اسم الموظف من أي عشيرة أو قبيلة وبعدين اتصير تحسب في مخك وتبحث عن حدى من قرايبك ما خذ عروس منهم أو حدى من قرايبه ما خذ عروس من قرايبك أو واحد من قرايبك كاين في زمناته داعس بسيارته واحد منهم أو واحد من قرايبه كاين داعس واحد من قرايبك أو من قرايب أمك أو واحد من أخوالك ماخذ عروس منهم أو واحد منهم ماخذ عروس من أخوالك , سبحان الله!! والله الموت في الدول العربيه نعمة من الله .
وإذا ما عرفت بتروح على حارتك وبتسأل الناس وبتقول : يا جماعة الخير في حدى منكوا بعرف حدى من دار كذا وكذا , بدنا واحد يمون لينا على واحد منهم بشتغل كذا وكذا لينا عنده معامله امعصلجه , وبذكر مره أنني دخت السبع دوخات في دائرة الأراضي والمساحه حتى اقتربت من موظف مكتوب أمامه على مكتبه اسمه واسم قبيلته وحين تحدثت معه خرجنا أنا وهو عن الخط العام ودخلنا في مواضيع الخلفه والإنجاب وصارت سوالفنا كلها سوالف نسوان وحسيت نفسي إني زي الوحده اللي دايره على الحبل والخلفه , وأنا نسيت معاملتي وهو نسي وظيفته الرسمية حتى نهاية الدوام فاقتربت منه قائلاً:
- انت من ...احنا ويّاكوا نسايب.
-نسايب؟
-من وين انت ؟
-انا من العلاونه.
-هلا حياك الله , انا عمي مرته (زوجته) من العلاونه.
-ما هو هذا اللي كنت بدي أسألك إياه , بالله عليك هو عمك ؟
-آه والله عمي , مش عمي بالضبط بس ابن عم أبوي وعشانه زلمه اكبير بنحكيله عمي .
- أي والله إنه محترم , بنته كمان متزوجه مع واحد من (...) شو صار معاها جابت أولاد ولاّ بعدها ؟
-والله المسكينه اتجوز عليها , بس شوف سبحان الله , الثنتين , الجديدة والعتيقه خلفن مع بعضهن البعض.
-والله ؟
- آه والله , يا سبحان الله !!.
- والله وحنا صارت مع ابن عمي , هو مش ابن عمي بس أبوه بصير لأبوي الله يرحمه ابن عمه , وعشانه زلمه كبير بنحترمه وبنقله يا عمي , هذا يا سيدي العزيز بنته اتجوزت مع ابن خالتها والمسكين والمسكينه 10 سنوات من الزواج وهي مش امخلفه , والدكاتره يحكولهم ما فيش أي سبب يمنع الخلفه لا هي عندها مانع ولا هو عنده مانع .
- لعاد شو السبب ؟.
- هيك ...من الله .
- والنعم بالله , كلشي بارادته .
- والله كلشيء بارادته .
- سبحانه .
- أي والله كله بإرادته , وشو بدك في طولة السولافه المسكينه بس زهق منها راح اتجوز عليها وحده من سوريا , وفي ناس بحكوا كان بحبها من أول بس كان يقرا بالشام وكان بده اياها بس ما صارش نصيب على شان أوبوه الله يرحمه ما قبلش وحده من الشام .
- يا خي زلم زمان قبل عقولهم غريبه , وكائنه هو اللي بده يتجوزها مش ابنه , في نفس القصه صارت مع واحد صاحب ابن عمي , اتجوز وحده سعوديه كان يشتغل عند أبوها في (القريات) وبعدين حب عليها وحده مغربيه وشو بدك بطولة السولافه وبعدين شو صار معاه؟
- وشو بدك بطولة السولافه بدي اختصر عليك الموضوع بسرعه على شان احنا في دوام رسمي , من بعد ما تجوزها تبين انه هو اللي ما بخلفش , شُفت؟ يا سبحان الله .
-والله يا سبحان الله هذي بتصير في أحسن العائلات , بنت خالتي إتجوزت ابن خالتها بعدين حب عليها وحده فلبينيه , الله لا يوفقه ولا يوفقها كيف خطفت الزلمه عينك عينك وهي فلبينيه , يا خي في نسوان متخصصات بالخطف وخصوصاً خطف المتزوجين بلفن عليه وبوخذنه وبخلنه يطلق القديمه , يا سيدي العزيز بنت خالتي في كانت وحده جاره ليها وكانت دايمن تتردد عليها وكان في مشاكل بينها وبين جوزها ودايمن تزعل وترجع وتزعل وترجع وبعدين زعلت آخر مره وبس رجعت على الدار مدت ايدها على شنطتها على شان أطول المفتاح وتفتح الباب وإذا في وحده فتحت ليها الشباك وحكتلها نعم؟ وإذا فيها جارتها تجوزت جوزها , شُفت؟
- يا سيدي هذيك كانت موظفه معه في أبو ظبي , وأخوها زوجته من مصر أكثر من عشر 10 سنوات من الزواج وهم بدون خلفه بعدين في كانت بنت عم ليه إمجوزينها أهلها لواحد هامل بسكر وبضربها وما بشتغلش يعني جوز كنادر أحسن منه ومن اللي خلفوه, بعدين اتفقوا يطلقوها ويجوزوه اياها على شان يخلف منها , وفعلاً طلقوها من الهامل وتركت أولادها وتزوجت ابن عمها وحبلت هي وذرتها مع بعضهن البعض , الجديدة اللي بتخلف ومجربه بالخلفه جابت بنت وماتت والقديمه يا سبحان الله جابت توم أولاد واحد سماه على أسم أبوه وواحد على اسم أبوها .
يا سيدي هذا احنا وانتوا اطلعنا نسايب , وزي ما بحكي المثل (كون نسيب ولا اتكون ابن عم ) وكمان النسب بينا وبينكم مش من اليوم , النسب من زمان زمان زمان ,الناس المليحه بتكرر معاهم النسب أكثر من عدة مرات ,عمتي كمان متزوجه عندكوا في الطيبه مع العلاونه .
-عمتك متزوجه مع العلاونه؟
-آه يا رجل أكيد انت ما ابتعرفها بس أكيد انك ابتعرف اولادها , محمد وابراهيم , وخليل .
-خليل اللي بسلاح الجو ؟الرفيع الطويل , زمان بالمدرسه بقينا نحكيله (أبو طويله)
-أيوه خليل , أيوه هو بالضبط ومعاه باص (هونداي).
- الله يقطعه ويقطع باصه , قديش نصحناه لا تشتريهوش وقلناله الباص هذا بده واحد طويل روح.
-لا هو ماله طويل روح .
-آه والله هو طويل روح بس بزهق ابسرعه.
-آه والله بزهق ابسرعه .
-الله يقطعه , بالله عليك يا رجل أم خليل عمتك؟
-آه يا زلمه عمتي , هي مش عمتي اللزم بس أبوي بحكيلها يا عمه وعشانها ست كبيره بنحترمها وبنحكيلها يا عمه .
-والله أم خليل انها على راسي من فوق والله انها ست بيت أكابريه , هذي شيخاويه وانتوا كلكوا اشيوخ .
-يا سيدي كلشي بالدنيا نصيب , هاي عمتي أو عمة أبوي كانوا اهلها معطينها لابن عمها وما خلفتش منها نهائيا أكثر من عشره أو خمس طعشر سنه وهي معاه وكذب ما خلفتش منه , وإيام زمان ما كان في فحص يفحصوا ت يعرفوا السبب المهم راح اتجوز عليها وعشانها شيخاويه ما قبلت تقعد مع ذره طلبت الطلاق طلقوها أهلها وجوزوها بالطيبه مع قرابتك كان كبير بالعمر وزوجته متوفيه من جديد.
-آه صحيح خليل ليه أخوه من أبوه , والله هي كمان محترمه ربتهم وكأنهم أولادها وكانت اتحن عليهم .
-لا تقلي زي أولادها (نزار) طفش على المانيا من وراها قد ما هي قويه وشاطره وملعونة حرسي .
-يا سيدي الله يرحمها وهي بس اتزوجت عندكوا كانت فتيه كان عمرها 31 سنه فتيه وسبحان الله , قرابتك أخذها وهو ما بدهوش الخلفه عشان عنده اولاد اكثير بس الله أعطاه منها خليل ومحمد وابراهيم وتحسين اللي اسع ببني ناطحات سحاب في (دُبي) , سبحان الله , وقرابتي ابن عمها اللي طلقها كمان زوجته الجديدة جاب منها 4 بنات وأربع أولاد وبنتها تزوجت مع واحد من عمان دكتور في المدينه الطبيه في مركز فرح تاع القلب .
-أيوه أيوه , لا يروح انه الدكتور عماد .
-آه والله الدكتور عماد انت بتعرفه ؟يا رجل بدنا واحد يمون عليه , هسع بدنا واسطه منك عنده .
-كيف ما بعرفه هذا ابن عمتي , ابّشْر يا رجل , وبديش أحكيلك إنه مش ابن عمتي لا هذا ابن عمتي اللزم , وبنمون عليه شو ما بدك منّه أنا جاهز , زراعة قلب , زراعة مصارين , زراعة كبد , زراعه صيفيه , زراعة اطفال انابيب , زراعة رئة , أي شيء بنزرع أو ما بنزرع احنا جاهزين ,شو ما بدك لا تخجل والله بزعل منك رقبتي سداده ومش بس بمون عليه , لا بفرض عليه رأيي بالقوة , وبمون عليه وعلى كل قرايبه, والله ما بقدر يرفع راسه ويقول لأه , عشان بفضحه وهو بعرف هذا الحكي.
-لا والله ما بديش منه أي إشي أكثير بس بعدين بتصل فيك وبشوف السولافه إذا قرابتنا ما ضبطش حاله عنده بعود أتصل فيك ,بس الله يسامحه , 10 سنين حب وبعدين تزوج عليها أوكرانيه.
-يا سيدي ما علينا, هسع وين اروح ؟ بدهم مني قوشان أرض جديد.
-بلا جديد بلا عتيق, هاته , كله مع الغسيل بسيل .
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
