مينا امين
الحوار المتمدن-العدد: 4366 - 2014 / 2 / 15 - 17:22
المحور:
الادب والفن
لو انت طيب يبقى عندك مشكلة !!
فى زمن تاهت مبادئه بقى عباره عن حاجه وحشه منيله !
هيتقال عنك مريض بداء السذاجه
اى حاجه هبله عبيطه يكون لها عندك الف اجابه
لا ليك فى الطور ولافى الطحين
على اى حاجه بتقول امين
ثرثار وكلامك كتير حتى لو الكل ساكتين
للأسف هى دى صورتك
للأسف هى دى صورتك
اصل راح خلاص زمن جدى وجدك الناس الطيبين
الناس اللى كانت الطيبه والحنيه عنوان ليهم
كانوا يمشوا يفتخروا بيها ومحدش اتهان فيهم
اصل زمن عمك احمد وعمك مينا اللى كانوا يكلموك
قى كل حاجه يسألوا عنك تحس انهم اخواتك امك و ابوك
تقريبا راحوا خلاص
وحل مكانهم زمن مفيهوش اخلاص
زمن لو انت طيب يبقى اصملى هتبقى فريسه
اللى هيأخد شرفك واللى هيأخد مالك ومش بعيد يحرموك من العيشه
ده اللى انا شوفته اه وحسيته
شوفت الطيب ممكن يتهان قدام ناسه واهل بيته
بس لما فكرت شويه ومسحت دمعة عينيا
وبدأت احكم عقلى واصالح احاسيسى عليا
قولت ازاى
ازاى يكون الزمن كله خلاص بقى كده
ازاى بس تكون الصوره كامله بالشكل ده
اكيد فى ناس تانى كويسين
لسه عندهم الطيبه شعار
لسه جواهم الليل بيطلعلوا الف نهار
بلقمه بسيطه عايشين بردانين او مدفيين
مبسوطين ولامحرومين تلاقيهم دايما شاكرين
يبقى زى مافى كده برده فى كده
والحكايه عمرها ماكانت ولاهتكون تتحسب بالشكل ده
وده مش كلامى ولا كلامك ده ربنا اللى قال وعمل كده !
#مينا_امين (هاشتاغ)
كيف تدعم-ين الحوار المتمدن واليسار والعلمانية
على الانترنت؟