شكرا علي الزمبه يا ريس مرددوه لك

جورج المصري

الحوار المتمدن-العدد: 1941 - 2007 / 6 / 9 - 08:03
المحور: حقوق الانسان
    

جلست تدقق في حجمها وشكلها وتقلبها بين أصابعها وصرخت وقالت يا ابني أنت واكل زمبه مظبوط . فصرخ الشاب وقال مش ممكن أنا ما أكلتش بقي لي يومين وانتي بتقولي أن واكل زمبه . انت أكيد عرافة غشاشة و لا أنتي بتعرفي تقري الفنجان و لا الكف و حتي القفا . فقالت له اصبر ياولدي دا الزمبه اللي انت واخدها طالعه من قفاك وأنت مش شايفها . قال لها يا خاله ارحميني زمبه ايه بس اللي طالعة من قفايا هو أنا لسه عندي قفا . دا حتي مش حاسس بية من الضرب اللي انضربته بقي لي يومين في القسم و اتغير علي ست ورادي وست ضباط أخرهم فحل كفة مثل خف الجمل وشلاضيمه زي السيد قشطة و صوابع ايديه زي الممبار ومناخيرة زي مدخنة قطر الفحم وصوته أه لو سمعتي صوته . قعدت يوم بحالة مش سامع من أول سؤال سأله. وياتري كان ايه السؤال يابني ؟ قال يا خالة مقدرش أقولك أصله فيه سب لي ولا أمي طيب كان سؤال طويل ولا قصير قال لها شوفي ياخاله سؤال بسيط جدا ... قال أعترف يا خـــــــ........ يا أبن الشـــــــــــــ..... ، مش معقول يعني من سؤال واحد تقعد ماتسمعش يوم بحالة . أيوه يا خالة أصل السؤال أذهلني ولما مكنتش مصدق وداني خرج غصب عني ومن غير قصد و الله كلمة واحدة. ياسلام أنت قلت كلمة واحدة طفحتك الدم يومين ؟ أيوه يا خالة .. دي لازم كلمة سب للضابط لا ياخاله كل اللي قلته "نعم" بأستفسار يعني مش نعم يعني موافق علي اللي قاله. طيب وبعدين بعيد عنك ياخاله لقيت خف الجمل اقصد كف سعادة الضابط بيطير في الهوا بعد كده مش فاكر حاجة لكن بعد شويه لما وعيت كنت بشوف الامناء و الشاويشيه بيحركوا شفايفهم وبيتكلموا معايا وقال ايه يستفتوني وانا مش سامع ومش فاهم حاجة وكل ما قول لهم "نعم" "نعم" "نعم" نعم" نعم" نعم" نعم"... أنضرب علي القفا من تاني .
أسمع يابني أنت واخد زمبة مغرية تمام .. فقال لها طيب يا خالة اشرحي لي بس يعني ايه زمبه.
اقولك بابني يعني إيه زمبه . أنت عارف المثل اللي بيقول " زمبة تفلق الحجر"؟ ايوة اسمع المثل ده ياخاله .
شوف بقي المثل ده من ايام الفراعنة كان أيام الحضارة معناه مفيد وهو كان أساس الحضارة العظيمة ولولا الزمبة ما أتبني الهرم و تقدر تقول ولا الاهرامات و المعابد الكبيرة. ياسلام يا خالة يعني أنا واخد زمبه فرعوني ؟ لا يا ابني انت واخد زمبه عربي .
طيب فهميني يا خاله؟
الزمبه دي الطريقة اللي كان الفراعنة بيقطعوا الحجارة الكبيرة بها بكل حرفنة ونظافة و كأنهم بيقطعوها بسكين . كلمة زمبة دي بتوصف خشب الزمبه دا نوع من الخشي بيتمدد بقوة شديدة جدا لو شرب شوية مياه ز الفراعنة كانوا بخرموا الحجر خروم صغيرة ورا بعضهم في خط مستقيم ويضعوا خشب الزمبة في الخروم دي . وبعدين ينقطوا المياه علي الخشب بانتظام في يوم واحد تنفلق الحجرة الضخمة بطريقة عجيبة . من حتت الخشب الصغيرة تفلق الحجر الضخم.

طيب ايه الفرق بين الزمبه الفرعونية و الزمبة العربية... يا سلام يأبني أنت الظاهر غبي جدا لدرجة أنك مش قادر تشوف الزمبه العربية اللي شعبنا المصري أخذها من يوم دخول العرب لمصر . حطوا زمبه بين الشعب تفلق وطنيتهم وتفلق في قلوبهم اللي كانت في حب مصر وبعضهم البعض في قوة الصخر و وخلت الدخيل علينا اللي لابس بدله الآمن وكأنه ضابط يضربك ويغيبك عن الوعي لدرجة أنك مش عارف أنت بتنضرب لبه.

ومصيبتك الأكبر يا أبني أنك جاي لعرافة تقول لك عن مصيبتك وهي واضحة وضوح الشمس وجاي تندب لي همك وأنت السبب فيه .

مش الطاغي هو السبب في طغيانه !! أنت اللي لازم تقف للطغيان وتشيل الزمبه اللي بينك وبين أخوك في الوطن. وسيبك من الغيبيات و اللي بيحشو بها عقلك ضد أخوك و اللي خلتك تساق مثل البهائم واشعر وحس بإنسانيتك و بآدميتك وخد بالك علي أخوك . لأن هو كمان من غيرك ما يبقاش آدمي.
قوم يا مصري مصر بتنادي عليك كفاية نوم وغفلة ومصر بتروح من بين أيديك. قولها عالية وبكل شموخ تحيا مصر فوق كل البدع و الخنوع.

#جورج_المصري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل