جسر من طين (اليوم السابع حسب توقيت رحيل كزارحنتوش )1

رحيم الغالبي

الحوار المتمدن-العدد: 1787 - 2007 / 1 / 6 - 11:05
المحور: الادب والفن
    

= 1 =
احس روحك نهر للماي ....
ومشيت اوياك كل الكاع
طول الوطن ودروبه
اخاف اتبدل بلونك
اموتن فوك مايك
روجه
متعوبه
اجي اليا باب , اخاف الباب
بدّل حتى رقمه وعاف محبوبه ...!!!!؟؟
= 2 =
لاتعبيرين....
اخاف عليج
لتعبرين
احس روحي جسر من طين *
وجروحي :
حديقه متانيه تمطرين
مدينه متانيه تمطرين
جمر
بالماي
بيّ انتي
ولا تطفين.....!!!!
. . . .
و لو تدرين...؟
ليش الورد كله انتي
وصرت كل السواجي ...آنه
ولو تدرين :
ليش الغربه كلها آنه ؟؟
جا وجهج يذب لونه ,
. . . و اخذ من وجهي كل اوصافه ,
و ألوانه. . . .!!
= 3 =

مني تبدي احلامي ..كلها
ادروب يمك تنتهي
يمك اكدر اشتهي
وما اشتهي
ويمك اكدر , افتر بروحي
اسطوانه ..
اتغني حب ما ينتهي........!!؟
ويمك اكدر - ابجي و اسهر ....-
و اغفى يمك ....و التهي...
ويمك اكدر :
اشتهي وما ............. أشتهي ...!!
ويمك ابجي بكد حلاتك *
و أومي للنجمه ..
تجي
ت
ج
ي
....!!!
اومي للنجمه تجي
يمك ابجي
بكد
حلاتك
...!!!؟؟

و السواجي تنام يمك
(( حسبة عمر عطشان والماي حدره ايفوت يبنادم )) *
بس اكلك :
أسهر
اسهر
حيل احبك و انفتح بيديك : دفتر

= 4 =
بالضحكه ...
ترجّعلي الطفوله ايام
أغرك بالفرح ... وعيونك تنام
بمدينه مساهره بروحي
. . . . مدينه من المطر حن الشجر بيهه
. . . . مدينه من العطش حن الشجر بيهه
و على عيوني.. انطفت لذة عمرهه ......,
وكل اغانيها
فتت كل الدروب وما ..متت يمك ..؟؟
تبت لليوم ما جيها
تبت للدوم ما جيها
يكلبي...؟
اشعلمك ع الناس ؟؟
وتفوج بسواجيهه ؟؟؟؟
فتت كل الدروب وما متت يمك ؟

تفوت بكل حلم اسمر
رسمت الكمر عالغيره....!!؟
امطفه بأول لياليهه
و اماني الناس ما عرفت مجاريهه
جنوبي
وريحة البردي
عله ثيابك. . . .
تفيض بكل نفس حلوه
. . .
اماني , ألوانّه
بيهه
اغاني الماي.....
ما عافت مجاريهه
__________________________________
* تضمين للشاعراليساري ألمغيّب ابوسرحان

#رحيم_الغالبي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل