الخاروف يا ملك الزمان

رامي الابراهيم
كاتب، صحفي، مترجم، لغوي، سينمائي
(Rami Ibrahim)

الحوار المتمدن-العدد: 8155 - 2024 / 11 / 8 - 04:47
المحور: الادب والفن
    

قصة من الأدب المشرقي ( مكتوبة باللهجة/اللغة المشرقية السورية)

إجتنا بصف الرابع الابتدائي آنسة جدبة بس عامود من عواميد النفاق والكهن وسألتنا عن منجزات الحركة التصحيحيي فإجانا هالحكي عبري سنسكريتي ما فهمنا منو شي. شو يعني تصحيحية؟ وحركة وهيك شغلات؟ فلعنت سما اللي نفضنا بالبهادل! هلق نحنا كنا متعودين عالبهادل والضرب من الآنسات و المدرسين اللي قبلها، وما كان جديد علينا صراحة بس يعني البهادل اللي كنّا متعودين عليها كانت متل إنو نحنا قرباط نوَر وجلاميق لإن ماجبنالا للآنسة كتير هدايا بعيد المعلم وهي يا حرام عبرتلنا عن صدمتا وخيبة أملا فينا وهيي عم تقول: " شو عيني من عين باقي الآنسات اللي هدايا طلابهم معبايين الخزانة وطايفين من فوق الطاولة؟ مو متلكن يا نَوَر يا قرباط يا بهايم!" أو متل البهادل اللي منسمعها إذا تأخر واحد منا بدفع تعاون المازوت أو مشان مجلة الحائط أو تزيين الصف بوحدي من المناسبات وغيرو وغيراتو. بس هاي المرة يعني نحنا مافهمنا شو المطلوب! يعني نحنا لو كنا منعرف شو الحركة التصحيحية كنا أكيد أو أغلب الظن يعني منعرف شو منجزاتا، بس عتبك عاللي بيعرف بعمر تسع سنين مين صحح وشو تصحح وشو هالحركة اللي صارت قبل ما نخلق
...
المهم بعد ما بعتت ورا معاون المدير حتى يشوف بعينو أثر تقصير المدرسين السابقين في "بناء مجتمع عربي اشتراكي موحّد والدفاع عنه" فسألنا معاون المدير : "شو بيسموه لابن الغنمة؟" فصار هاد يقلو خاروف وهاد يقلو قرقور وهاد يقلو ماع ماع... و بعد ما اكتشفنا إنو معاون المدير متنّح صار هاد يقلو عجل وهاد يقلو جدي وهداك يقلو تيس أو ديك. بعدين عجزنا لإن ماوافق حضرة نائب المدير عأي تسمية، إجا راح قلنا انو ابن الغنمة هو "الحَمَل". هلق نحنا تخيلنا ابن الغنمة ويقال " النّعجة" وفهمنا عن شو كان عم يحكي وإنو "الحَمَل" هو نفسو الخاروف بس كمان اجانا هاد الاسم "حَمَل" بفتح فاء وعين الفعل عبري سنسكريتي! لك مين حَمَل مين؟
فقلها معاون المدير للآنسة الجديدة: "لك هدول أبيعرفوا شو اسم ابن النعجة بدك ياهن يعرفوا منجزات الحركة التصحيحية؟!" المهم هي الآنسة ذكرتلنا بعض منجزات الحركة التصحيحية متل بناء المدارس والجامعات وتزفيت الطرق ووصل الكهربا للضيع والأرياف وبناء السدود والمستشفيات... الخ الخ الخ وعطتنا وظيفة إنو نكتب موضوع تعبير إجباري (بالصرماي) عن منجزات الحركة التصحيحية وإنو لازم نعبّر عن مشاعر الإمتنان والفخر بهالمنجزات كمان ( بالصرماي) وياويلو اللي أبيعبر!
المهم رجعنا عالبيت وحسينا إنو نحنا نكرات و حشرات وبالفعل ما منعرف شي لك إذا حدث هام و كبير وكوني متل ما كان مبين من حكي الآنسة وأدى لاختراع الكهربا والشوارع والجامعات والمدارس ما منعرفوا فشو منعرف نحنا؟ فبلشنا نقتنع إنو فعلا نحنا نَوَر وقرباط وبهايم متل ما كانت تقول عنا الآنسة
...
أنا لمن رجعت عالبيت سألتو لأبي عن منجزات الحركة التصحيحية فقال إنو كلشي منشوفو حوالينا من منجزات الحركة التصحيحية! المشكلة إنو قال الحكي بطريقة ماعرفت إذا صحي عم يحكي أم كان عم يتمسخر فسألتو: "هلق جارنا هاد اللي بيحط المسدس على جنبو تحت البنطلون كمان من منجزات الحركة التصحيحية؟" إجا قلي: "إي هاد من أعظم إنجازات الحركة التصحيحية!"

#رامي_الابراهيم (هاشتاغ)       Rami_Ibrahim#          

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل