تدري اشكثرعانينه .. ؟

ميسون نعيم الرومي

الحوار المتمدن-العدد: 7143 - 2022 / 1 / 22 - 17:27
المحور: الادب والفن
    

احنه الطشنه الوكت
احنه التاهت مراسينه
احنه النموت ابسكته وبلا حس ..
والعشنه غرب ..
اوبين المگابر غرب .. والزمن ناسينه
احنه الهـِـمـْـنـَه بين الدول .. والمحـَّـد علينه سأل
تدري اشكثر عانينه ..؟
***
احنه الكتبنه ع الزمن .. قصص واسوالف حزينه
نضحك بالچذب .. من حرگة البينه
احنه العشگنه النخل .. والوادي ويه الجبل
والهور ابگصبه والبردي .. احنه الندري .. بس ما ندري !
احنه الحبينه السمه والگمر وانجومه
وابدمنه عاش الوطن واهمومه
اودجله اوفرات الغنه غناوينه
تدري اشكثرعانينه .. ؟
***
احنه انخلقنه ابوطن ماشاف راحه ابيوم
يحكمه رعاع اوصغار القوم
بي تنهش دول واتبوگ ثرواته
عايش ع الكفاف اشكثر عازاته
امحسر يشعبه بالفگر والموت والينه
احنه الخطيه المانعرف خطايانه
تدري اشكثرعانينه .. ؟
***
احنه البـَـيـَّـن علينه الكبر
احنه الضاع من عدنه العمر
احنه الخلص بينه الصبر
احنه البـِـلـَعـْـنه البحر
احنه البينه ضاگ السفر
احنه الماعدنه جوازات
احنه الوگفنه ع السفارات
احنه البلدنه باگته الجارات ..
واتسيد الجاهل والغبي والعارات
احنه الولدنه مساكين .. احنه الماعدنه عناوين
احنه العراقيين
احنه خطيه اومانعرف خطايانه ..!
-----------------------------------------------------
22 / كانون الثاني / 2022
ســـــــــــــتوكهولم

#ميسون_نعيم_الرومي (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل