انتخابات الهيونطة

فرات المحسن

الحوار المتمدن-العدد: 7029 - 2021 / 9 / 24 - 15:15
المحور: كتابات ساخرة
    

في الطرف القصي من مقهى أبو شلش جلست استظل من سعير الصيف الذي اجتاح المدينة، بسعفات مروحة بالكاد تحرك الهواء الثقيل المشبع بالرطوبة.
مو خوش، إذا أبقه أسولف بالفصحى ما تجي السالفة حلوه، وطعمه يصير باهت حيل.
دخلت لكهوة أبو شلش، شارد من اللاهث ألي يسمط سمط، وجلست تحت بنكة السقف التعبانه، وجانت تفر نفسه فحطانه، وتدفع هوه رطب ولافح. جنت حيل مكتئب، ومخي رايح بعيد، والضغط صاعد لأبو موزه، فطلبت جاي حامض، بلجي يعدل مزاجي. أبو شلش جاب الجاي، وجان فرحان يجقجق بالستكان والماعون. ما جذبت خبر، رأسا جريته ساده، وبالعكس جان تصعد الحموضة على أفادي ووصلت البلعومي.
فجأة دخل صاحبي الورواري أبو شامل، كصير مدعبل جنه حيدر العبادي بعد ما خرط بنطرونه وسميناه أبو سوف. أبو شامل هم مثلي صلعته تلمع بالحر. وجماله أقجم، وكصته مفلطحه جنهه كشر ركي. وحواجبه بيض معكودات مثل جبن مشلله.
ــ ها حبي أبو الشباب شنو أخبارك.
ــ أولا انه صار عمري فوك السبعين بنص أوكَيه، فخلي الشباب ألك، ولو انته أدرد ولا سن باقي بحلكَك. ثانيا شنو أخباري، هذا بالله سؤال، شنو تشاقه مو أنت تعرف السالفه صعبه ومخربطه ولاكفه طين.
ــ ليش داد مو بعد جم يوم عيد ميلادك حسب علمي.
ــ يابعد جم يوم . بعد هوايه.انه مواليدي بشهر أكتوبر يوم عشرة .
ــ أي والله نسيت شلون صدفه حلوه يعني بيوم الانتخابات العراقية.
ــ أي نعم بيوم رفعة العلم الله يجرم، راح أتنافس ويه المالكي والحلبوسي وخميس الخنجر وكاكه مسعود وهادي العامري ومقتدى وباقي شلة الحواسم من المشاركين بالروليت العراقي، والسحبه راح تكون تحت أشراف الهولندية جينين بل سختات، صديقة أبو فدك، ألي راتبه هيه وعيشته ويه ربعه بالمكتب ألأممي من ضلوع العراقيين.
ــ هاي شنو أبو فريته ليش ما مكيف، راح عيد ميلادك يتخلد ويه يوم الانتخابات العراقية.
ــ والله ساعة السوده على هذا اليوم ألي يتنافس ويصادف عيد ميلادي ويه انتخابات شعيط ومعيط وجرار الخيط.
ــ يابه سمي بسم الرحمن، أنت اليوم عصبي وضايج وطافره روحك.
ــ ليش ما أضوج وأنه أتذكر هذا اليوم بي أحداث هوايه حلوه، بس هذوله القشامر سودوه وصخموه .فعشرة أكتوبر، أي يوم عشرة من الشهر العاشر تشرين الأول، ما يبقه وراه غير شهرين ونص، لو شويه أكثر على رأس السنة الجديدة، والعالم تستقبله عام جديد بالأفراح والليالي الملاح، بس العراقيين، من عزه إلى صخام ولطام، وبجي ونوح. والعلمك أبو شامل، باليوم العاشر يصادف ولادة الرسام الفرنسي أنطوان واتو عام 1684 ، وولادة جوسبي فردي الموسيقار الأيطالي عام 1813 ،والكاتب الروائي والمسرحي الفنلندي الكسيس كيفي عام 1834 . هذولة الواحد يفتخر يصادف عيد ميلاده وياهم .
ــ أيباه، وانت شنو من هذوله، عمامك، خوالك، لو من حمولتهم، لتتعيقل براسي على أساس هذوله همه ربعك، ويشاركوك مناسبة عيد ميلادك.
ــ أي هذوله أريد عيد ميلادي يطبك وياهم، ويكون بنفس يومهم، مو بيوم انتخابات لتدوير النفايات.
ــ بروح ذاك ألما أريد أجيب طاريه، عود شنو تدوير النفايات ؟
ــ تعال فهمه شنو تدوير النفايات. أبو شامل، النفايات يعني الزبالة، والانتخابات هذي مثل سابقته، راح ترجع نفس الوجوه ألي شاركت بالحكم، وهم نشوف رئيس وزراء ما يصير أله شيعي ، وتكوم فحول التوث تتعارك حتى تجيب فحل اثول مدبغ بتأييد من ولاية الفقيه. ورئيس الجمهورية كردي، ونفس القوانه اتحادي لو ديمقراطي، بس هاي المرة ما تقبل غلط الرئيس مسعود يملخ اليتقرب للمنصب، وحاط واحد جوه أباطه. وكل عاده رئيس البرلمان سني وهاي المرة لو حلبوصي لو خنجوري وبوصاية أبو ميزن، وباقي مناصب الدولة تتوزيع مثل الطماطة والخيار والبتيته بين حرامية الحكم، وكلشي أملح وحار جوه يخيار.
ــ يمعود سمي بس الرحمان وخلينه نحتفل بيوم عيد ميلادك، وبهاي المناسبة دزلي على جاي يعدل الراس. وأسأل رب العباد، كون عيد ميلادك يجي بصف عيد ميلاد واحد مسنع وحباب، لو مناسبة حادث جبير هز العالم.
ــ أي هذا الحجي المعدل، مو يصادف عيد ميلادي بيوم انتخابات السلاح المنفلت فوك روس الناس والفشك يور ور، بعد أن شاركت الأحزاب المسلحة بالانتخابات، والفلوس عد الأحزاب ما ينعرف منين مصادره، وتلث ترباعه بوك من المال العام، وقانون يقسم البلد حصة لهذا الحزب وحصة لذاك، وأدير الانتخابات مفوضية مال شرطة، مو مفوضية مستقلة. أبو شامل لتكلي ليش ضايج، وأنت دائما بيوم عيد ميلادي تكرط المزة كرط وتلط البطل ولا جنك. وهذي السنة تره ماراح تشوف كلشي، يابسة وتمن وبح، وزردومك ما يحصل على دسم، لأن أغلق الموضوع وراح عيد الميلاد وماكو فرحه وجمبارات.
وبالمناسبة تدري شكد جنت فرحان لان عيد ميلادي يصادف بنفس شهر ثورة أكتوبر واسمع نشيد الأممية تغنيه فرقة الطريق وأوكَف رافع راسي وأعيط وياهم.
هبوا ضحايا الاضطهاد..ضحايا جوع الاضطرار .. هبوا لاح الظفر.....
وهماتين مكيف لأن هناك الاحتفال كل أول جمعه بشهر تشرين الأول أكتوبر بيوم الابتسامة، بلجي الله يفتحه بوجهك أبو شامل وتروح منه العقجات والطركات.
وهناك يوم يسمى اليوم العالمي اللاعنف ويصادف يوم 2 تشرين الأول وهو يوم ولادة المهاتما غاندي، ويكون هذا اليوم رسالة لتعليم طرق اللاعنف بالحياة، يعني ضد السلاح المنفلت والعنف ألي ينغص حياة العراقيين.
وهناك اليوم العالمي للصحة النفسية ويصادف في الأسبوع الأول من شهر أكتوبر وهو يوم خاص للتوعية والكشف عن الصحة العقلية، وبلجي الله ورسله وكتبه، يدزلنه واحد يكشف على خبالات هوايه من السياسيين بالعراق وأمراضهم وعقدهم النفسية، وبيا طوله يحشرهم.
وصراحه أنا كل سنه مكيف لأن عيد ميلادي يصادف ويه العيد الوطني الصيني، والناس تتجمع تحتفل بساحة تيانانمن.وهذا فرحنه واليحبنه يفرح ويانه.
ويكلي ليش ضايج أذا راح تكابلني بيوم عشرة أكتوبر، يعني بفرحتي بيوم عيد ميلادي الميمون، صور صخيل وأبو دريل وحرامي الليل.

#فرات_المحسن (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل