حَدر النهر يلعب شنطره وبلبل

جبار عودة الخطاط

الحوار المتمدن-العدد: 6185 - 2019 / 3 / 27 - 14:45
المحور: الادب والفن
    

١
عطشان الطفل
ويريد يشرب مي
بس خايف يگرّب للنهر يغرك
طلع مي النهر يم الطفل روّاه
والنهر ارتوى شاف الطفل يضحك

٢
مو ميّت
ولا غرگان ذاك الطفل
لا تسألْ
نزل للماي
نص روج النهر
طير بشجن يهدل
فقاعات النهر
صارت بچفّه ألعاب
بالخنصر يطگها تنگلب دعبل
لأن طبعه شمع من ماي
وسرّه بالنهر مشمور
بغير النده ما يقبل
گيعان البشر
ضاجت بحلمه الآه
دغش
تتماوج وكل لحظه تتبدّل
هاي الناس
غرگانه بِتِراب الگاع
وروجات السموم
براسها تصهل
كتب آخر رساله
بدفتره الكشكول
و ركب عبّارة الموصل
صاح بحرگه دجله إهناه
اريد الحگ أبوي
السبّكروه ظلّام
وأحضن
لوعته بگلب النهر أنزل
ومن انضوج آني وياه
حدر النهر
نلعب شنطره وبلبل
أبوي سبايكر
چانت إله عنوان
ومو بس داعش
بروج النهر يسحـل
نسخه معدّله
نحرت أحلام الناس
باگتني بطمع وجيوبها تكتل
.......
مو ميّت
ولا غرگان لا تجفل
ميّت مَن رضه
بالعايبه تتلامض وتحبل
.
شرح المفردات الدارجة لغير العراقيين:
مو: ليس
يگرّب: يقترب
شاف: رأى
روج: موج
يهدل: يغني والهديل صوت أو غناء الحمام
يطگها: يضربها
مشمور: مرمي
دغش: زيف
هاي: هذه
ألحگ: ألحق
السبكروه: الذي أرتكبوا بحقه جريمة سبايكر حيث قتل تنظيم داعش الارهابي حوالي ٣٠٠٠ عراقي وألقى بهم في نهر دجلة في قاعدة سبايكر في صلاح الدين
شنطرة وبلبل: لعبة فولكلورية يلعبها الصبيان في الأزقة
باگتني: سرقتني
العايبة: صاحبة السوء

#جبار_عودة_الخطاط (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل