ع جناح الطير الشادي(قصيدة غنائية باللهجة اللبنانية المحكية)

لبنى شرارة بزي

الحوار المتمدن-العدد: 6150 - 2019 / 2 / 19 - 09:48
المحور: الادب والفن
    

عَ جْناح الطير الشادي(قصيدة غنائية)

١---)(ع جْناحْ الطيرْ الشّادي
رحْ ابعثلَكْ آهاتي
بَلْكِي بتاخذها هالرّيح
بتخفّف عنّي التِجْريح)
الرّيح لْ من عندك جاية
وبْصوتا أحلى حكاية
رحْ دفّيها بدَيّاتي
زِيدْ عليها همسَاتي
وإبعثْلَكْ معْها مِرسَالْ
يحكِيلَك عن سرّ القلب
يشكيلك شو عِمل الحبّ
بقلبي وروحي وبْذاتي
******************
٢---)(ع جناح الطير الشادي
رح ابعثلك آهاتي
بلكي بتاخذها هالريح
بتخفّف عنّي التجريح)
يا طير لْ طاير بالجو
مرِقْلك من صوبو مرْقة
احكيلو كيف حالي اليوم
ذابوا عيوني من الفرقة
دمعاتي لْ كانوا بالأمس
خبيهن بين كْفُوفِي
صاروا دمعاتي شلال
يِجري عَ خْدودِي بْ حَرقة
************
٣---)(ع جناح الطير الشادي
رح ابعثلك آهاتي
بلكي بتاخذها هالريح
بتخفّف عنّي التجريح)
طَير الِي مْسابق هالغيم
بالله تِرسملو صورة
قلبي لْ عمْ يكتب أشعار
داير بِ ها لْمَعْمورَة
يِسْرُق أنغامْ والحانْ
يغنّي للعشق غْنَانِي
ولما يطلّ الفجر بضوّ
يمحي العتمة ويمحي النَوّ
بتشرُق بسمة من عيونو
ع جبين الشمس تلالي
*********

٤---)(ع جناح الطير الشادي
رح ابعثلك آهاتي
بلكي بتاخذها هالريح
بتخفّف عنّي التجريح)
يا غايم لْ حامل غيثكْ
إمرقْ من صوبو شويّة
خبي هالشمس بظلّك
تا يغفى ب هالفيّة
وخبّر نسمات الحارة
منك بَسْ بإشارة
تِتْرأَفْ بِمحبوبي
لْ بعدو ضيّعت دروبي
**********

٥---)(ع جناح الطير الشادي
رح ابعثلك آهاتي
بلكي بتاخذها هالريح
بتخفّف عنّي التجريح)
محبوبي مْفَارق داري
مْحَوّل ليلي لنهاري
روحي سارقها مني
دخلك عنو طمنّي
تَ يحسّ القلبْ بأمان
وتبطّل عينِي تِبكِي
تِرجَعْلِي هاك الأيام
تِرسُم بِعيونِي الضِّحكة

#لبنى_شرارة_بزي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات