ياحسرة على البصرة!

رزاق عبود

الحوار المتمدن-العدد: 5995 - 2018 / 9 / 15 - 20:25
المحور: الادب والفن
    

يا گلبي، شبيك بس تبچي على البصرة؟!
انت على الربع تبچي، گلي، لوعلى البصرة؟!

يگلي انت من الكهف جابوك هاي منين هالاحلام والحسرة؟!
أظن تموت لو ترجع، تطگ روحك من القهرة

متگلي شنو البصرة؟!
لو شرجي، لو گيظ الظهر، وماي المج، لو ظلمة الغبرة؟

وك الشرجي يجيب وياه كل الخير، وبيه هم تستوي التمرة
اخلاق، وكرم، واداب، واحباب، معروفة بطيبة العشرة
ما تذكر كسلة النوروز، والخلان، وجمعة ناس، وصینیات متعمرة؟
شط العرب، والفانوس، والمده، والماطور، والابلام، ومحلى الطبگة بالعبرة
بيها الرطب، بيها الخير، والرمان، والنبگات، بيها لبة الجمرة
بيها فنان الشعب تومان، بيها الادب، بيها العلم، والثورة
بيها الرسم، والتمثيل، بيها الرقص، والسواح، بيها قصور متصورة
خشابة طرب تعزف للفرح، للعرسان، للسمار، دگاگات، والسهرة
بيها ساعة السورين، والبچاري، والمعسل، والطاگ ابو الشهرة
بلم عشار، وسفن الهنود، شناشيل، ورواشين، وچراديغ، وتجار بالف غترة
بيها ملعب الميناء، والعشار، والحمراء، وام بروم، والخندق بعد شمرة
بيها الغنا، بيها الطيب، بيها النخل، والاسواق مزدحمة بالف سمرة
بيها الاهل، والصحبان، والكورنيش، بستان الونس، بيها النهر، والطفرة
سوگ المغايز، وحنا الشيخ، والصياغ، والتجار، والعطار، واحلى اسواق للخضرة
بياع الثلج، والماي، والخصاف، والرطبات، جسر الامير، واسد بابل يحرس الگمرة
فلافل، سمبوسة، عطر ريحان، گعدات العصر، استكان الچاي، بالهيلات متعطرة
هيوتنه، وگهوتنه، وغناوي الليل، ولعب چعاب، والطوبة، وسليمان، والجفرة
بيها الخورة، والاسماك، والغزلان، والبرحي، وتغريد البلابل ببساتينهه الخضرة
بيها الگيمر، ورد الياس، والجوري، والقداح، صواني الخضر وسط الشط، والعبرة
صواني العرس، وكليجة، واليحيى، عود بخور، وعالي التين، والصفصاف، والنخلة
طالب الالحان، والمناوي، حميد البصري، بيادر خير، ورياض احمد يكسر العبرة
شاكرنه بدر سياب، والاخضر ابن يوسف، وفؤاد الغنه، والردات، وسوالف العشرة
سوابيط العنب، والعمال، والمسفن، بيها الفاو، حنة عرس، والاسماك، بيها البحر، والجزرة
كنائس حب، والصلبان، والاجراس، والاذان، والهندوس، والمندي يم الماي، والمجرى
رهبان، وشيوخ، وسادة، وحاخامات، والمندائيين اهل سومر بچفافيهم الحمرة
عرب، واكراد، بقايا اتراك، والاشور، والكلدان، والسريان، والارمن اجو هجرة
بيها زبيرنه، والاثار، والصحراء، وام قصر، وجبل صفوان، والگرنة بيها النبگ والسدرة
حتى ادم نزل بيها، جنة عدن، والاهوار، والثوار، والهوسات، والشطين، والشجرة
غزال البر، والزوار، والجامعة، والطلاب، والزراع، والتنومة هالخضرة
بيها العسل، والمعسل، والليمون، بيها التمر، والعمبة، ومي لگاح مومرة
بساتينك، لوفاتك، ازهارك، انهارك، ونخلاتك، واهاليك العذبة، وحلاوة خوز منتشرة
ابو خصيب يظل اسمك، تظل اهلك، تظل حمدان، تظل زهيان لو حفروا الف حفرة
جزيرة سندباد، وگبة الميناء، وبيوت الابله، واصمعي، والمعقل، والبيت ابو حجرة
سفرات الاثل، والصفگات، والطلاب، والكشافة، واغاني العرس بالباصات والسفرة

ويگلي بعد، بطران، شعندك تبچي على البصرة؟؟؟!!!

*وانا اهاتف احد الاصدقاء في البصرة، سالني مازحا"شعندك بالبصرة"؟! تالمت كثيرا من مزاحه الاستفزازي! وعدت ابحث في كتاباتي عن البصرة، فوجدت النص اعلاه منزويا منسيا، وكأنه رد على تساؤل صديقي، وآنية الحديث عن البصرة! بصرتنا!!!

#رزاق_عبود (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل