شباك خلفى فى الدور الأخرانى

حمدى عبد العزيز

الحوار المتمدن-العدد: 5885 - 2018 / 5 / 27 - 18:42
المحور: الادب والفن
    

حاضن بإيديه ، ورجليه ، وبكل ضوافره
ماسورة الصرف الصحي ..
وبيطلع بوتيرة انفاس متتاليه بسرعه
وفوضي ف ضربات القلب ..

الشباك الخلفى االمتوارب شيشه
ف الدور الأخراني ... مش شباك وخلاص
دا صليب الروح الموصوفله من عند بداية العمر
ومعراج ملهم لكيانه المجذوب ف الرحله
وعنيه العشمانه ف تفاحة مالهاش ذي
كبني آدم مغرم بقضاه
عمال يزحف أو يطلع
مش فارقه

الوش الطالل من شباك الدور الأخراني
نابض بابتسامه مزخرفه الكون بوعد عريض
مشاور بالإبتهاج والفرحه

عيونها مش خضرا
وموش عسليه
ولافنجان قهوه ،
ولاكوباية شاي
ولابستان ،
ولاملعب كوره
ولاعسل الرحمان
ولاحاجه من اللي اتقال من قبل

عنيها حقايق كونيه جديده
ماشفاهاش من قبل ..

لو يطول الوقت ف نهار المغامره
هاينحرق
ذي ورقة بافره مفروده ووحيده قدام اللهب
هايتلاشي
بدون دخان

ولو وصل أقرب مسافه ممكنه للمشتهي
يمكن ..
- بحكم تقل مؤخرة راسه ساعتها - يتلوي جسمه لورا
وتسيب إيديه مواسير البنايه
وتروح عنيه ف ضحكه صبوحه
عايمه ذي الورده فوق ميدان أحمر كبير
اترسم ع الأرض
بالحيويه والرعشه وبدرجة سخونه ونبض

لو مدت إيديها
البنت
هاتخطفه من بين زحام الإحتمالات
، تحطه
ف قلب احتمال جديد خالص
ماوردش علي باله
، ولا علي بالها

يمكن تلخص وجوده ف شفتين ساحبينه من ساسه لراسه
ف حضن رغوة كهربا ناعمه ، ولذيذه

يمكن تروح ويروح
ف بني آدم بينزل من حقيقه جديده خالص
علي أرض تانيه
طريه ..
كإنهم راحوا لآدميه جديده
وكهف أخضر
وسط أدغال مخلصه لصخب المطر
وعواصف النشوه المجيده

يا دين النبي !!!!
معقوله كل العالم الساحر ، والمجره الملهمه دي
عماله تطلع فوق حديده قديمه
، وكلاها بارومة الأكسده ؟

ــــــــــــــ
حمدى عبدالعزيز
مايو 2018

#حمدى_عبد_العزيز (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل