قفشات سورية خالدة

نضال نعيسة
كاتب وإعلامي سوري ومقدم برامج سابق خارج سوريا(سوريا ممنوع من العمل)..
(Nedal Naisseh)

الحوار المتمدن-العدد: 5660 - 2017 / 10 / 5 - 13:00
المحور: كتابات ساخرة
    

قفشات سورية خالدة

(قصة متخيلة مروية بس بتصير...باللهجة العامية المحكية)

سوري معتر عايف ربه، طلع مع هالعالم اللي طلعوا، وصل ع بريطانيا، وقف جنب قصر ويندسور تبع الملكة، ومن جوعه يا حرام، بلش يرعى بها العشب الإنكليزي اللي بيشهي القلب متل قطفة الحبق، قام أجوا جماعة الإم آي سيكس (المخابرات تبع بريطانيا)، لقطوه لها المشحر مغضوب الوالدين وسألوه:

ليش مترعي بها العشب يا MR.؟

قلن فقير معتر مهاجر ومنتوف والحشا ع الحديدة وما معي نكلة واللي بيرن (أي الذي يرن كالعملات المعدنية ويصدر صوت الرنين)..

وجعهم قلبهم عليه فقاموا عطوه ورقة وكتبوا له فيها يصرف لحامل هذه الورقة 5000 باوند وبيت وسيارة... رجع عسوريا طاير من الفرح وما مصدق حاله...قبر الفقر ...ويا أرض اشتدي ما حدا قدّي....وصار زلمة محترم معبى تيابه ووبعد ما فقع صندويسة شاورما اشترى باكيت مارلبورو وقعد يأركل بالقهوة وووو

وصار يحكي قصته لها العالم، ولمين ما شاف، واللرايح والجاي، وشو صار معه، ومن الجملة حكى لرفيقه القديم المعتر التاني متله، من أيام الشحتفة والنشح والتعتير، بتعرفوا نحن كلنا شعب من المعترين المنتوفين ونشتهر بالفقر وتصدير الفقراء والمعترين للخارج وكله بفضل الرسالة الخالدة وحلم الوحدة مع جيبوتي وجزر القمر، قام رفيقه خطرت له فكرة، وع أساس فهمان وعبقري، وقال العمى ليش لحتى روح لبعيد وأرعى بآخر الدني، ليش ما بتروح يا ولد لقدام مبنى القيادة القطرية والرسالة الخالدة، أو لقدام مجلس الوزراء تبع الرفيق أبو خميس ما غيره، وهو عم يقول لحاله خيو ما بيحن ع العود غير قشره (يبدو الأخ ما عنده خبرة بالقشر)..

قام راح وبلش يرعى هونيك وما رفع راسه من الأرض

ولسه ما قضم أول جرزة حشيش، ولا أجت لك دورية مؤللة من الجوية اللي ماسكه الباب ولقطوه، وعينكم ما تشوف إلا النور، نزلوه لتحت، وحققوا معه وسألوه شبك ولك كـ... شو قصتك شو متسوي هون؟ ولك لأي جهاز معادي عم تتجسس ع الرفاق الوزراء وتعطلهم عن شغلهم وهم يتصدون للصهيونية والإمبريالية وللشعب الفقير وعم يخططوا ليوحدوك مع موريتانيا ومدغشقر العظمى وشو علاقتك بالفيسبوك وتويتر وهل عندك حساب ع الأنستغرام؟ ومعك براءة ذمة ماء وكهرباء؟ ووينه دفتر خدمة العلم هاتوا لتكون مطلوب احتياط ولك بغــ...؟

قلن واشحاري شو هالأنستغرام والتوتر؟ والله ما لي بكل هالقصص انا زلمة فقير معتر....

وبعد التحقيق و"ضيافة القهوة" قياما وقعودا تأكدوا أنه زلمة ع باب الله، فراحوا رفعوا لرئيس الفرع وكتبوا له "شرح وضع" وتقرير طويل عريض بالحادثة، قام كتب لهم رئيس الفرع حاشية، وأصدر قرار تاريخي يقول فيه:

إلى دوريات الجوية

يسمح للمذكور بالرعي في كافة الأراضي السورية ...

يحيا البعث...

#نضال_نعيسة (هاشتاغ)       Nedal_Naisseh#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل