فى عيد الأم قصيدة – رسالة إلى روح أمى

مصطفى راشد

الحوار المتمدن-العدد: 5467 - 2017 / 3 / 21 - 16:42
المحور: مواضيع وابحاث سياسية
    

ياأمى قلبى حزين وعِّنَيِا فيها دموع
ليه ياأمى فراقك يكون قدر ومقسوم
من بَعدِك نَسيت السعادة وَبَقيِتْ حزين مهموم
عايش ميت لا بعرف فات أو باقى كم يوم
دا الدنيا من بعدك لا ليها طعم ولا ليها لون
يامه الدنيا من غيرك شبه حياة وشوية هموم
وفراقك سببلى جرح كبير وأحساس يتيم محروم
ولما تركتينى أصبحت وحيد حزين مكلوم
مشتاق لحبك ياأمى المليان حنين وشجون
ياللى كنتي ليا السند والمشورة والعيون
يامه أنت الصدق والطيبة والشرف والأمان
بَعدك ياحبيبة مفيش أحباب
أنتي أول اللى حبوني وأخر الأحباب
ياللي حبك من غير غرض أو غية أو حتى عتاب
ودايماً بتعطينى وما بتنتظرى أجر أو ثواب
وَياَمَاَ ضحيتى بروحك علشاني من غير أسباب
غير إنك أم بتفدى من غير حساب
ياأمى أنتِ فين علشان أجيلك ويتجمع الأحباب
علشان أُقُبِل إيدك الطاهرة والأعتاب
وأشوف فعينيكِى الأمان ورضا الرحمان التواب
وأسمع منك الدعا أللي يطمن النفس والأهداب
ياأمي الحياة من غيرك باهتة وسراب وعذاب
ياأمي حبك فى دمي أكبر من تَخَيِل كُل الشُعرا والكتاب
وأَسّما من كُل حُب حَكَي عنه فيلم أو كتاب
أو رَسَمُه فنان علي لوحة فوق حائط أو باب
ياأمي نفسي أشوفك وأسمع صوتك
لأنك وحشاني ونفسى أشوفك من تاني
ورغم إن الدنيا كلها محاوطانى
والآه فى غيابك محاوطانى
حاسس بَرّضُه بغيابك وأنيّ وحداني
بضحكلهم ياأمي لكنِ جوايا حزين
مهو أنتِ عارفاني وَهمَ مش عارفين
أنتِ بس اللى بتفهميني
ويفهمنى غيرك مين قبل مقول حرفين
ومش مصدق أنك رحلتى ولو حلفولى كل المسلمين
وتركتينى وحيد مذهول وحزين
وبنتظر صوتك يناديني زى زمان
وتقولى تعالى ياغالى
ليه شكلك حزين زعلان
مهو من بعدك ياأمى محدش سالنى
ولا حد فكر فيّا بجد أوحتى صبرنى
أاااااااه يامه أه
قد أيه قربك كان بيريحنى ويطمنى
وغم حبى للعب والكورة كنت بتفوق
وانجح علشان سعادتك ورضاكِ يا أمى
عايش مش قلقان علشان عندى أمى
كنت سعيد فرحان علشان عندى أمى
وأنتي أللى كنتي فى نجاحي بتسعدى وتهتمى
ياأمي طاااااال غيابك
وغصب عنى اتجوزت فى غيابك
وخلفت الواد اللى كان نفسك فيه
وحلمت انك جايه عشان تشوفيه
وأنتظرت كتير أأقدملك الواد تبوسيه
لكن طاااال إنتظارى
وخلفت التانى والتالت ولسة منتظرك يامه
علشان تيجي وتشوفي أحفادك وتجَمَعِي اللمة
وتعلميهم زى معلمتينى – أاااااه يامه
أنا لسه فاكر كلامك
ولمسة ايدك وحنانك
رغم مرور 30 سنة وشوية
وكلامك وتعليمك ليا محفور جوايا
لازم تكون يابني صادق وأمين
وتحب كل البني أدمين
من غير ما تسأل عن أصل أو دين
يابني كلنا بني أدمين
واخوات من أدم وحوا مؤمنينَ أو ملحدينَ
ومفيش حد من البشر يعرف الحقيقة عند مين
دا الكل قاصر حكام ومحكومين
وأحنا على الدنيا ضيوف ومسافرين
شوف التاريخ بيحكى عن ملايين
كانوا مفكرين انهم مخلدين
لكن دا وهم الموهومين الغافلين
ومفيش شىء فى الدنيا يستحق
منك لحظة تكون زعلان وحزين
وأوعي لصاحبك فى يوم تخون
أو تخالف يوم مبدأ أو ضمير أو قانون
أعترض أو ناقش بس يابنى بالأصول
وذاكر وأفهم قبل متتكلم وتقول
وأوعي فى يوم تضر إنسان أو حيوان
لأن ضرر الروح هو اللى يَحَرَم عليك جنة الرحمان
وخليك دايماً مُسالم لأن العنف من طِباع الشيطان
وسامح على قد ماتقدر لأخيك الإنسان
وأحمى الطير والحيوان من بنى الإنسان
الروح روح حتى لو كان حيوان
أاااااه يامه أاااه
كان نفسي تَعَلَمِي ولادي زي مَعَلَمّتِيِنى
يامه نفسي أبوس أيدك زي زمان
يامه قلبي حزين وعنيا فيها دموع
وقلبى كتير موجوع
أمتي تيجي ونجتمع زي زمان
ولادي بيسألوا عنك
عايزين يشوفوا أعظم إنسانة مَنَحْتنيِ الأمان
عَرَفَتُها الأرض عبر الزمان
أاااااااااه يامه غيابك طال
وأنا مازلت فى الانتظار
أمانة عليكى يامه متغيبي
----------
أبنك - مصطفى راشد

#مصطفى_راشد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل