( يا صدر المضيف ) مهداة للحزب الشيوعي العراقي بعيده الواحد والثمانين

حامد كعيد الجبوري

الحوار المتمدن-العدد: 4768 - 2015 / 4 / 5 - 00:36
المحور: الادب والفن
    

المقدمة
أحنه الطيب والطيبه
وأحنه للمجد عامود
سوينه الفكر نبراس
حراس الوطن وجنود
المشانق بيها بصمتنه
وتاريخ الحزب موجود
شيوعي أموقع أبدمه
واضح ما يريد شهود
ثقافتنه ابفكر موسيف
ومرات الحزم مريود
عمرك ( واحد ثمانين)
وجناتك حمر وخدود
ننطر عيدك الميه
عزمك عالشباب يزود
بناتك هلهن نشوه
ورفاقك نخوتك وزنود
باجر نحصد الفرحه
ونذب الثياب السود
ونطش الفرح بوسات
على راس الوطن وورود
أهدي الكل محب بوسه
وبوسه الخد ( أبو داوود) 1
***

القصيدة
هد عنان صبرك وأرسم النيشان
وشل عطاب جرحك جرحك أشكبره
يالطولك عراق وحزنك النهرين
شك زيج الظلام وثوب اليستره
هواديدك زلم وحزام فوك حزام
بس تومي أبيمينك تركض الفقره
شتالك مو صباخه ترابك الحري
حصادك هذا أوانه وراجت البذره
ذرينه السنابل والبيادر خير
وعيون الرفاق أتحرسه وتنطره
ذمه للمساحي وللفلح حوبه
والخالف حقيقه التعبك أينكره
شلت دجله وفرات ابجود للعطشان
وبجفك منحته وطيبتك نهره
يا صدر المضيف وهيبة الديوان
يمهوال العشاير هوسته وشعره
أنسد باب الضمير وسودوها كلوب
وعراقك بالجحيم وغضوا النظره
أعد سنين عمرك ( واحد ثمانين )
وبعد حيلك شباب أوجنتك حمره
*
يا راية عراضه وبيرغ الثوار
وفريضه للرجال الترتوي أبفكره
يكتاب النضال ومدرسة أجيال
اليحط أيده أبيمينك يربح السفره
سنينك مو ترافه والسنين أعجاف
أشما تاكل أبولدك تنفتح زهره
سلام وحازم وسعدون تاريخك
يا صبر العراق الما جزع صبره
يحفرولك غدر يردون بيها أتطيح
والينوي يغدرك طاح بالحفره
جم دجال عايش عالسحر والفال
يطش الخرز دربك رد عليه سحره
مقفول الفرج والناس تاكل ناس
ولا شمعة أمل بالهندس أنطره
وزعوها فجج وتقاسموها أفخاذ
وبثياب النزاهه أيفرهد ويقره
حملنه جبال هم من الأمس لليوم
وكلوب التحبك تلتهب جمره
وّج بركان عزمك حشم النهران
زلك كل الشرايع من هنا العبره
*
آذارك ربيع وبلبلك غريد
وجويريد وله وطكت الشجره
دم ( صويحب) وحك المناجل ثار
بخيت ( صويحب )ودم الفلح حضره
مطارق للغضب نزل على السندان
وبوجه المعامل تضحك أتسره
هد عنان صبرك فرح المحزون
الشمس جيب بيمينك يسرتك كمره
ومراجيح العراق أتلعب الأطفال
وهلاهل من بناتك هلهلن بشره
*

#حامد_كعيد_الجبوري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل