الفن التشكيلي

حيدر الطائي

الحوار المتمدن-العدد: 4647 - 2014 / 11 / 29 - 10:47
المحور: كتابات ساخرة
    

ذولة الغربيين تفكيرهم مختلف ...جتني دعوة من قبل فنانيين تشكيلين يحاولون ان يستلهمون افكار الناس العاديين وجعلها منطلق لرسومهم…
وينمون المواهب الموجودة بهذا المجال ..هذا الي فهمتة من الدعوة الي جتي ..واني حديقة قررت اروح لان اني اصملة عليكم احب هاي السوالف من چنت صغير خوش ارسم وخاصة من ارسم منضر طبيعي الشمس والكوخ والمي…
وچنت اخذ كلهة عشرات بالرسم..
واشتري اصباغ باستيل مرات ومائية واصباغ زيتية هسة يسموها اكرلك بس هاي الزيتية جنت اكثر شي اصبغ هدومي بيها وانترس نفط من اخففها ..
لا وحتى بالقلم هذا ابو اربع الوان هم ارسم بس الهام الرسم ما يجيني بس بالدروس العلمية يعني من يشرح المدرس اني ارسم صاحبي الاجكم الي گبالي لو ارسم الكبد لو ارسم عيون ودائما يطلعن مال واحد احول مع العلم جنت هواية اتابع برنامج المرسم الصغير ..لكن اكثر مرة رسمت وگالولي حلو عاشت ايدك رسمت خشم استاذ محسن الله يرحمة جان عندة خشم ما يتعب دويرة جبيرة وبيها نقطتين ..
المهم نكرت سلف بالبايسكل وگاشخ كل قوتي ..
وصلنا للمكان واذ بالفنانيين موفريلنا لوحات بقياسات متعددة وانواع مختلفة من الالوان والحضور كبير حدايق هواية مثلي بس امهات السحورة اكثر من الزلم واني تعرفوني شوية گلبي رجيج ..
وبلشو يشرحولنا ويوضحولنا عدة نقاط..
بس اني شنو اكو وحدة مقابيلي مو طبيعية من جماعة العرق الاصفر اسيوية يعني يابان صين فيتنام عيون دگم والشعر حرير والخشم والحلك عبالك مسقول …
واهسي صار يمها وهي كلساع تندار وتتمضحك ..اني التهيت بيها ..وطارت كل الافكار من دماغي جنت جاي حامي من شفتها بردت ..
بلشنا نرسم واني طبت بدماغي بس هي گاعدة ترسم ..ما طولت خبر رحت يمها وسالتها هاي شنو راسمة وكامت تشرحلي .. البؤرة البصرية والانعكاس التكويني واني مركز بس الله وكيلكم هنة خطين واحد اصفر واحد ازرك و شخابيط هي تشرح واني اكلها بالعربي يا كذابة ..
وتشرح حطت ايدها بنص الخط الاصفر وگالت هذا مصدر القوة الذي يمد الفرس الذي يكسر القيد ويحطم الاغلال من اجل ان ينقذ الملك .. طبعا فرس ماكو لا وحتى اذان فرس ماكو ..واني اگلها ياچذابة.
سوتها مسلسل…
المهم همة اعطونا وقت ساعة ونص نكمل الاعمال .. شو المشرفة گالت باقي خمس دقايق حاولو تنهون الاعمال ..
زين اني بعدني الاصباغ ما فاتحهن وخالطهن رجعت لمكاني وفتحت اللون الاسود وخلطت شوية ومسكت الفرشة ..
اني ترتيبي الثاني بالتسلسل .. شو هاي الفنانة وصلت يم الاول وسالتة عن لوحتة وهو يشرحلها واني ملتهي بصخام الوجه .. اريد احضرلي عذر مرتب ..
مثل واحد غايب من امتحان الاحياء وهو ماخذ صفر باليومي ..
المهم كملت وصلت اليمي ..
اني لحگت احط نقطة بنص اللوحة البيضة سالتني ليش ما راسم شي طبعا الكل انتبه علية… !
گتلها لا رسمت ..!
گالت شنو رسمت ما جاي اشوف شي ..!
گتلها ركزي تشوفين هاي النقطة بالنص ؟
گالت اي ..!
كتلها هاي فيل ..!
گالت فيل ..؟
كتلها اي الله وكيلك فيل بس بعييييد كولش
هس يجي وتشوفيه
شو هاي كالت واو ..وتهز بيدها الكافرة
حيدر الطائي

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل