عوف حسين

محمد باني أل فالح

الحوار المتمدن-العدد: 4624 - 2014 / 11 / 4 - 07:37
المحور: الادب والفن
    

كالولي عوف حسين وأشرب ماي من زمزم
عوف الاربعين والبجي والنوح وعوف الحزن وتبسم
وعوف اللطم بمصابة دين الله الفلاح البيه أذا ما كو ماي نتيمم
لاتشرك بحب حسين تخلصها بجي وبمصابة تتألم
شنهو الطف شنهو كربلا وعباس يصير العبد عالوالي يتحكم
بالحق يزيد الحارب حسينك ياثار التريده وبيه تتوسم
يزيد الله السلطة حاكم ويروم الرياسة حسين بس شلون ما يعلم
عمت عين الزمن ياحسين تبقى بظلاله تعيش هاي الناس ما تفهم
درب الحق مشيته وياك لأن شفت أيمان بيه للموت تتحزم
حي على الصلاة ياحسين بغير طفك دين الله ما أتمم
أدم أبونا والنبي خاتم وحسين السبط بدماه الدين يترجم
تريد أصلاح دين الله مو نشوة حكم وتريد تتحكم
مدرسة الوفاء ياحسين تظل أجيال بيها دوم تتعلم
ويظل جف العاضدك ياحسين درس للخوة بيه الناس تتكلم
وتظل وكفة أبو فاضل بذاك اليوم يمها أعداك تتقزم
ويظل دم الرضيع بوجه السما لليوم لا ينزل ولا يلم
وتظل وكفة أصحابك ميامين ويمها أعداك تتهزم
وهم شايف وهب هم جون وشلون التضحية بكربلا تلتم
ملحمة الطفوف شلون أعوفنها وظلن حاير وأبكم
نظل ماشين على درب حسين شما تهدم ترى كل يوم يترمم
تعال وشوف قبر حسين كبل سنين كبة وبابها مهدم
ضحينا على دربه سنين مشايه ولغدر امية أبد ما نهتم
رادونا نعوف حسين ونتبع حاكم بالجهالة ونترك الأعلم
نترك من وصى بيه المصطفى المختار وجبرائيل طاف على جثته صلى وسلم
مشايه على درب أجينا زحوف ما همنا البرد والحر ولافد يوم نتألم
يصدونا بكل وكت رادو بلا حجة ودليل وبرايه يتلعثم
بذاك الوكت رادو ذهب ياحسن حسباله نتأخر عالزحف وبهاي يتوهم
رد وطلب ميه ألف حك زيارتك ياحسين جبناهن وخلصنا العمر بل لم
رد وطلب منا جفوف لليهواك كصينا الجفوف وحسباله نتندم
رد وطلب منا نوقع أنعوفك وقعنا وجينا زحوف كالو هاي ما ترهم
يزيد الحاربك ياحسين طلع مثله يزيد وحارب المأتم
ويمحي ذكرك وطرواك ويمنع ركضة طويريج بس الراد أله ما تم
وجينا أفواج نمشي أنوب نكصدها المنايا وموتنا محتم
وما همنا الذبح لا والخطف والموت صرنا بالشهادة نرغب ونحلم
زادو بينا القتل ياحسين رادونا نعوفك مادرو حبك صرنا بيه كبار نتيتم
وعابس حق يتجنن عليك حسين لأن شاف النبوة بيك تتحتم
تعال وشوف خدام أبو الاحرار هم شايف خدم بعزة تتنعم
شكلك يل تريد أعوف حسين وتحجيها بشماته وبيها ملزم
أدري ما عندك سبط مثل حسين بس جدك يزيد بكفره محزم
ويبقى حسين أمامنا المعصوم ويبقى أنت يزيد أمامك الأعظم
وتظل بينا طول العمر محتار لأن بحب أبو الأحرار من الزغر نلهم
ويظل حب حسين بينا يزيد وفعال الطغاة على دربه تتهدم

#محمد_باني_أل_فالح (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل