آآآآآه.. يا رفاقة

إكرام يوسف

الحوار المتمدن-العدد: 4557 - 2014 / 8 / 28 - 08:35
المحور: الشهداء والمضحين من اجل التحرر والاشتراكية
    

"آه يارفاقة ياللي عملتوا الصلابة للحجر".. النهاردة حنتجمع مع بعض، زي ما كنا دايما بنتجمع!! وحنمشي مع بعض زي ما مشينا في كل المظاهرات من اربعين سنة!! وحيكون في وسطنا "سيف"، متشال على الاكتاف زي ما كان دايما.. وحيهتف بصوت ماحدش حيسمعه غيرنا.. ونردد وراه وهو سامعنا.. مش ناقصنا عير الرفاقة اللي سبقوه ـ وحيروح يبلغهم سلامنا، ويطمنهم علينا وعلى الحلم اللي حلمناه مع بعض وسابوه أمانة في رقبتناـ وناقصنا كمان ولادنا، زهر البساتين اللي في الزنازين.. ولادنا اللي اتعلمنا انهم مش بس أولادنا البيولوجيين اللي خلفناهم بنفسنا.. ولادنا اللي ورثوا الحلم.. وورثوا الزنازين على رأي سيف، وحيكملوا، لغاية ما يورثوا أولادهم وطن يليق بيهم، وبحلمنا وتضحيات أهلهم!
لكن برضه حنكون زايدين.."احنا اللي تهنا في الطريق من بعضنا".. حنزيد ولادنا/ ولاده، وتلامذته.. ورثة الحلم.. اللي استلموا الراية مرفوعة ما سقطتش عبر أجيال.. وحيسلموها لأولادهم منصورة.. دا وعد!!
يااااه يا سيف..ماقدرتش عليك سجون ولا قدر عليك تعذيب ولا مطاردات.. ولا حيقدروا خلاص.. في ايدهم ايه يعملوه؟ لاقدروا يحنوا راسك، ولا يكسروك، وانت وأولادك بين ايديهم.. والنهارده حترتاح.. من حقك..تعبت كتير وسبت اللي يقدر ولادك وتلامذتك يكملوا بيه..وحتى الرفاق.. اللي طول عمرنا بنختلف مرحليا، ونتفق ونرجع نختلف ونتفق.. لكن بتفضل الروابط بينا أقوى وأنبل من روابط الدم!! لأن اللي بينا رابطة قضية اخترنا نعيش عشانها كلنا، واتفاق على الهدف النهائي: مجتمع حر يتمتع فيه الجميع بالمساواة والعدالة والكرامة الإنسانية..
الذكريات؟ في قلوب كل الرفاقة ذكريات ومواقف وحكايات وطرائف تملا مجلدات.. حييجي وقت نحكيها..من أول يوم دخلت الجامعة في اكتوبر 1974، وكنت بالنسبة لي أكبر سنا ـ في اعتقادي ـ من ان اناديك باسمك المجرد.. فكنت أناديك "أبيه" وكانت التسمية مثار تندر الزملا!! لغاية رعايتك لكل الزملا ـ وكنت أتمتع بميزة اني اصغرهم ـ لغاية دخولي السجن في 77، وانت هربان ومطلوب القبض عليك.. لكن الجميع خارج السجن كان مكلف بطبع المحاضرات وعمل ملخصات لكل المواد توصلني في الزيارة.. وكنت عارفة انك واحد من المحركين لجهود توصيل المساعدات للمسجونين..لغاية خروجي من السجن ومقابلتك لي.. ولأول مرة ألاقيك بتكلمني باعتباري حد مهم، لدرجة اني فطست على روحي من الضحك لما قلت لي "بعد الي كان بيوصلنا على تصرفاتك في التحقيقات، وفي السجن لازم ننتقد نفسنا ذاتيا .. لأننا لم نقدر قدرات الزميلة حق قدرها"!! ..
كنت سبب تعرفي بأبو ولادي، رفيقك المناضل اللي سبقك في الرحيل من 28 سنة عبد الحميد العليمي (سلم عليه ياسيف، وعلى باقي الرفاقة اللي سبقونا: 113 رفيق من جيلنا ياسيف وانت بقيت 114).. ولأنك كنت في السجن وقت وفاته، ماكنتش متوقعة طبعا انك تعزيني.. فوجئت ببرقية العزاء جايالي من السجن!! وبعدما خرجت كان بيتك وبيتنا وبيت كمال خليل، المثلث اللي اتأسس فيه الولاد وكانوا بيروحوا نفس المدرسة.. ويروحوا يذاكروا عندك وعند كمال، ويلعبوا عندنا!! ولادنا زينا، ياسيف!! اختلفوا .. واتفقوا ورجعوا اختلفوا.. وبعدين اتجمعوا مع بعض في ثورة، كانوا قادتنا فيها .. ووقفنا وراهم نشوف بشائر تحقيق حلم عشنا عشانه عمرنا!!
حتوحشنا ياسيف، لدرجة مستحيل يتخليها ناس كتير، ما تقدرش تفهم يعني ايه روابط أقوى من روابط الدم!! ما تقدرش تفهم يعني ايه ممكن ناس ما تكونش بتشوفهم كل يوم ولا يجمعك بيهم بيت واحد وعيلة، لكن تبقى مطمن وحاسس بأمان طول ماهمه موجودين في الدنيا.. وعارف انهم اول ناس حيبقوا جنبك ويسندوك في اي محنة!! ما تقدرش تفهم يعني ايه كل واحد فينا بيبقى مطمن انه لو رحل، فمش حيسيب ولاده لوحدهم في الدنيا، لأن الرفاق حيكونوا قلبهم عليهم وحيراعوهم اكتر من الأهل!
ما تقلقش ياسيف .. ليلى بمليون راجل.. وعلا ومنى وسناء قدها وقدود..واولادك ـ أولادنا ـ وتلامذتك مذاكرين الدرس، وكل الرفاق عارفين السكة كويس،اطمن..بوصلتهم سليمة، مهما اختلفوا في الوسيلة، وطريقة التعبير، لكن السكة واضحة..ومكملين!! وماحدش حيقدر يقف في طريق ثورتهم/ حلمنا.. وكل يوم نفقد رفيق بيزيد إصرارنا.
وانت حافظ ياسيف زينا بالضبط، كلام عمنا نجم :"احنا النهارده فين وكام.. وبكره كام وبعده فين..وكل يوم بنزور مكان وكل يو بنزيد عدد.. وكل يوم نفتح بيبان وكل يوم بنزيل سدد".... "ملعونة قامة تنحني بالقهر من حاكم وخان .. ملعونة كلمة تنتني في الحلق تهرب م اللسان.. ملعونة ساعة تنحسب م العمر يطويها الخنوع. ملعونة لقمة مغمسة بالذل ملعون الجبان".. حتمشي رافع راسك زي ماعشت.. مع السلامة ياسيف.. وماتنساش السلام أمانة لغاية ما نتقابل

#إكرام_يوسف (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل