الشعب شال البامبرز

لبنى حسن

الحوار المتمدن-العدد: 4427 - 2014 / 4 / 17 - 12:29
المحور: اليسار , الديمقراطية والعلمانية في مصر والسودان
    

معلش مابعرفش اطبل و اعوم مع التيار او امشي على هوا الرأى العام...اللى مش عاجبه فيلم يقاطعه فيفشل وماحدش يعمل زيه تانى مش يتمنع بقرار وزاري!

ماشفتش فيلم "حلاوة روح" بس لما رئيس وزراء دولة فى حجم مصر يهز طوله عشان يمنع فيلم معروض فى السينما كأننا شعب بريالة مايقدرش يختار يبقى ح شوفه عندا فى تخلفه لان حل الفن الهابط اننا نقدم فن بديل و ننشر الوعى و نطور الثقافة المجتمعية مش نمنعه والا كان منع أقدم مهنة فى التاريخ قضى علي وجودها!

إقرار مبدأ التدخل لمنع عمل فنى خطر لان اى رؤية تعتبر نسبية والمستهدف من العمل الجمهور اللى اتفطم و شال البامبرز الحمدلله و يقدر يختار مش مستنى محلب او غيره من اعضاء الحكومة ...ياريت السيد محلب يدينا أمثله بالدول اللى فيها رئيس الوزراء بيتدخل لسحب فيلم من السينما عشان نعرف احنا ماشيين على اى نموذج!

اللى بيحدفوا مولتوف ويشربوا مخدرات بيعملوا كده لان مافيش حكومة قوية وقانون رادع مش عشان فيلم و اللى بيروج لفكرة ان الفن الردىء سبب التحرش فى مصر ليته يستوعب ان سبب التحرش غياب القانون القوى النافذ لان نفس المتحرش المصرى بيمشى زى الكلب بره مع ان نساءهم احلى و متحررين اكتر..كفاية شماعات..

أدافع عن المبدأ مش عن فيلم لم اشاهده ولا يهمنى فى حد ذاته..الحكومة دورها القضاء على الفقر والامية والعشوائيات اما قوانين العرض والطلب فكفيلة بتطرد المنتج الردىء اما المنع فيزيد الطلب و يروج للمنتج أكثر...بالمناسبة ليه مش بتمنع التدخين خوفا على المدخن و من حوله كالاطفال و البيئة و الصحة العامة رغم ان الضرر على المدى البعيد اكبر من اى فيلم هابط بينزل المواطن من بيته و يركب مواصلات و يدفع تذكره بكامل ارادته عشان يشوفه؟

مش مسئولية الحكومة تربية الشعب لكن التعليم و نشر الفن الراقى عن طريق وزارة الثقافة وتوفير عمل وهدف وقانون رادع يحمى المجتمع.. أدرس يا محلب التاريخ و كيف تطورت الدول و كيف ارتقت الشعوب ستكتشف ان دول المنع دى اخرها تبقى زى بلاد فارس و كوريا الشمالية وأعلم ان فرنسا بلد النور فيها افلام فى منتهى الرقى و فيها افلام اسفاف رسمى و رغم كده الشعب الفرنسي لسه عايش و الحكومة مركزة فى شغلها بس والحياة زى الفل..

اذا كان فعلا مجتمع الفضيلة يرفض منتج ردىء سنرى محطات الأغانى والرقص و الافلام الهابطة تخسر فتفلس وتغلق مادامت لاتجد مشاهد او معلن دون الحاجة للمنع والصراخ والعويل, فلنتفرغ لقضيانا الأساسية ونترك الكليبات والأفلام فالمشاهدة مسؤولية المشاهد العاقل البالغ والأطفال مسؤولية الأهل وكفانا شغل للمجتمع بتفاهات الامور فرئيس وزراء دولة بحجم مصر و بحجم مشاكلها يستحق المحاكمة لو بيهدر وقته فى التدخل فى افلام السيما!

لبني حسن

#لبنى_حسن (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل