قصة واقعية ( 1 ) .. أنا خليت المتحرش يبات ليلة حلوة في القسم

بطرس رشدى جندى

الحوار المتمدن-العدد: 4063 - 2013 / 4 / 15 - 18:17
المحور: ملف التحرش الجنسي ضد المرأة في الدول العربية - بمناسبة 8 آذار/ مارت 2013 عيد المرأة العالمي
    

قصة واقعية ( 1 ) .. أنا خليت المتحرش يبات ليلة حلوة في القسم


بقلم بطرس رشدى جندى


فيه صفحة على الفيس بوك اسمها ( افضح متحرش – السجل الشعبى للمتحرشين ) وهدف الصفحة هو تصوير المتحرشين وفضحهم ... الصفحة بتقول لكل فتاة وسيدة مشتركة ( لو مش قادرة تضربيه ؟ مش قادرة تمسكيه ؟ صوريه وافضحيه ) ... الصفحة عرضت قصة حقيقية لفتاة واجهت التحرش بأنها عملت محضر للمتحرش وبقى ليه قضية فى المحكمة ... الفتاة بتحكى وبتقول : كنت راجعة من الجامعة و مروحة البيت - و للي هيسأل بعمل ايه في الجامعة يوم الجمعة ، هقوله عندي نموذج محاكاة تبع الجامعة .. أنا دايما وأنا مروحة بركب على الكرسي القلاب (اللي بيكون لوحده و مش لازق فيه ولا كرسي) عشان أكون مرتاحة و محدش يضايقني .. بس للأسف المرة دي الكرسي القلاب ده كان مكسور و خارج منه حديدة ، فــ مكانش هينفع .. اضطريت أتنقل للكنبة اللي جنبي (اللي هيّ الكنبة اللي قبل الأخيرة) .. كان في ولد قاعد ، فــ أول ما قعدت جنبه ، قام موسعلي مكان و كان محترم ..

جيه واحد قعد ورايا على آخر كنبة في الميكروباص - و العربية حمّلت و مشينا .. جالي تليفون من صاحبتي و كنت بتكلم معاها ، فجأة لقيت إيد بتتمد من تحت الكرسي - في الفارق اللي بين ضهر الكرسي و قعدته - .. فــ اضطريت أقفل المكالمة اللي كانت معايا و لفيتله و قلتله بكل أدب و احترام و بالنص "ممكن بعد إذن حضرتك ترجع ورا شوية ؟" بصلي بتعجب و متكلمش - مع العلم إنه كان ساند بإيده الشمال على ضهر الكرسي و إيد اليمين مادِدهالي من بين رجليه و حاطط جاكيت على حِجره و بالتالي محدش شايف هو بيعمل إيه -
اللي حصل إن صاحبتي كلمتني تاني و للأسف الموضوع اتكرر لتاني مرة .. اللي عملته إني قفلت المكالمة و لفيتله نفسي خالص و قمت واخدة الجاكيت من على رجله و رميته على الراجل اللي كان قاعد جنبي و قلتله بصوت عالي و بالنص بردو "لو انت راجل و مبتعملش حاجة غلط ، اعمل اللي بتعمله قدام الناس و متبقاش مكسوف من نفسك" قام باصصلي بنظرة البريء و بيبص حواليه و كأنه بيقولهم "أنا معملتلهاش حاجة" ..

المفاجأة بقى إن الموضوع اتكرر لتالت مرة ! كنت في نص الطريق بالظبط ، ندهت على السواق "لو سمحت بعد إذنك وقف الميكروباص على جنب" الناس بقى اللي معايا في الميكروباص و اللي كان كلهم رجالة - مع إن كلمة رجالة لا تنطبق على أي واحد فيهم - بدأو يقولولي كلام من قبيل "إيه يا آنسة مالك؟ ، في إيه يا أنسة؟" و بيقولوها بنبرة تعجب و استغراب مني و كأني أنا اللي بعمل الغلط مش هو ! قمت بصاله هو و قلت "أصل مفيش دم و أنا بصيتلك كذه مرة و حذرتك أكتر من مرة ، و انت ولا عندك ذرة دم" .. رد الفعل كان إن الناس اللي معايا كل اللي قدروا يعملوه إنهم يرموا كلام زي "طب محصلش حاجة ،طب تعالى اقعدي مكاني .. طب طب طب" لكن ولا حد فيهم بَص حتى للشخص القذر اللي كان بيضايقني ! و اتنقلت على كرسي تاني و ولا كأن حاجة حصلت !

اللي بعمله أو ما بقرب على الموقف إني بكلم حد من اخواتي ييجي ياخدني من الموقف ، و حصل و استناني أخويا و قلتله "الأستاذ اللي بيعدي الشارع ده كان بيعمل كذا" .. أخويا جابه و قاللي "هو ده ؟" قلتله "آه" .. مفيش داعي اتكلم عن اللي حصل أكتر من كده و ميهمنيش أصلًا .. بس من الحاجات اللي قهرتني إن الراجل اللي كان قاعد جنبي لما شاف أخويا قاله "أختك دي بــ100 راجل ، زعقت و اتكلمت و مرمطته و مسكتتش" و واحد تاني يقوله هو عمل كده فعلًا .. طب لما انتوا حلوين كده ، ليه سبتوني أنا أبقى ال100 راجل دول .. و مطلعش منكم نُص راجل حتى ؟!

-أنا - وبكل فخر- خليت الأستاذ المتحرش يبات ليلة حلوة في القسم و النهاردة الصبح اتعرض على النيابة و الكلبش في ايده و أنا واقفة قدامه و ببصله و هو كان بيبص في الأرض
- الأستاذ المتحرش شغال شغلانة محترمة و خريج أزهر !
- الأستاذ المتحرش أمه وكيل وزارة .. و جاتلي النهاردة الصبح النيابة بتقولي إنه كان بيتعالج نفسيا وورتني الأدوية اللي موصوفاله و في روشتة مكتوب عليها مركز طب نفسي !
-أم الأستاذ المتحرش فجعتني لما قالتلي إن عنده أخت في سني و بتدرس إعلام !
-أم الأستاذ المتحرش فضلت تعتذرلي و تقولي تِفي في وشه و اعملي كل اللي انتي عايزاه و اطلبي أي حاجة ترضيكي و أنا راضية !

- أنا مش مضطرة أقول إني بلبس جيبة و واسعة جدًا بقالي أكتر من سنة !
- أنا خدت حقى لما كنت ماشية في القسم و فخورة باللي عملته ..
- خدت حقي لما شوفته متكلبش و مش قادر يبص في عيني ، بس الحاجة الوحيدة اللي اتغيرت فيا إني كفرت بالبلد دي ... كفرت بالذل والإهانة ... كفرت بالشهام ... كفرت بالنخوة ...كفرت بالإنسانية !"


انا بتمنى ان كل بنت وست تعمل كده ... اوعى تسيبى حقك ... لو المتحرش اتعمل ليه قضية واخد عقوبة ... عمره ما هيعملها تانى

#بطرس_رشدى_جندى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات