الآكل العمد مع سبك الأصرار والترصد

رشا نور

الحوار المتمدن-العدد: 3911 - 2012 / 11 / 14 - 09:57
المحور: حقوق المراة ومساواتها الكاملة في كافة المجالات
    

وقف عم هلال الرجل الهادئ الوديع يصرخ ويبكى بحرقة ويلطم خدوده والناس حوله يستعيذون بالله ويستغفرون العلى العظيم ..
لاحول الله يارب ... أدى حال الدنيا .. !
رمضان أبنه.. معقول .. بالسكتة القلبية .. مات بالسكتة القلبية .. ده حتى لسه شباب .. ياساتر أستر يارب.. ده حتى أبنه الكبير ماكملش خمس سنين ..إنّا لله وإنّا إليه راجعون ..
وبينما الحزن يخيم على وجوه الناس وصراخ وعويل يملئ الحارة .. تقرع الست أم محمد صدرها .. وتقول لجارتها أم سيد ..
- و.. وبعدين يآم سيد .. ده سابع راجل فى الحارة يموت السنة دى فى عز شبابه ..!
= ده يادوب لسه ماكملش أربعين سنه ..
- باينها شوطة وجت على الرجالة .. ياساتر يارب ..
= بيقولوا .. أتغدى ودخل نام .. وهى النومه ..
- ياحفيظ يارب ياساتر أستر مايكونش الآكل كبس على مراوح أنفاسه .. دى حتى مراته ست نظيفه وعايقه ..
= ومين سامعك .. دا طبيخها ريحته بتوصل لآخر الشارع .. هاتقوليلى على طبيخ ولا تسبيكة الست أم صيام مراته .. الله يرحمه ..
- آه يآختي ريحة التسبيكه بتاعتها ملهاش حل ..
= ما يكونش المسبك هو السبب ؟
- يوه دى الأعمار بيد الله يآم السيد ..
= ده حتى المرحوم كان دايما بيفتخر بنَفس أم صيام فى الطبيخ ..
- تتصورى يوم فرحه كان عامل غضنفر .. والفرقة بتزفه كانوا مشغلين موسيقى الست أم كلثوم فى أغنية .. واثق الخطوة يمشى ملكا ..
= ما هو كان طول بعرض الله يرحمه كان معجب بجسمه .. وكان بيشيل حديد فى الجيم بتاع الحاج حنوفه ..
- عارفه يأم محمد .. ما قصفش عمره إلا أم صيام والمسبك بتاعها ..
= يالهوى.. آتارى الراجل ياولداه كان يآكل من هنا ويدخل يلحق السرير على طول و يتخمد ..
- مايقومش آلا على المسلسل العربى .. وبعدها يتعشى وهو بيسمع نشرة تسعه وينام تانى .. مايكنش كان بعفيه ولا عنده فيرس سي وهو مشعارف ؟
= بقولك المسبك بتعها هو السبب !!
- أم صيام مراته ليها حق .. ما هو كان فيه الطمع .. وبعدين هو مره زَعل منها الله يرحمه بقى .. وهددها أنه هايتجوز عليها لو ماسمعتش كلامه تانى ..
= مالرجاله كلهم كده .. مالهمش أمان .. وبعدين ذيلهم نجس .. تقيدى صوابعك شمع ولما نتعب يدور على الرخصة الشرعية .. قال أيه ربنا محلله أربعة نساوين وأحنا نترمى زى الكلاب الضاله بعيالنا ..
- ماهو شرع ربنا يام السيد؟
= شرع .. جاتهم شرع يكسر مانخيرهم ..
- يعنى قصدك تقولى أن أم صيام قاصده تخلص من المرحوم ؟
= وماله يآختى مش أحسن مايروح يتسرمح بره على حل شعره يدور على ضره لأم صيام .. كده طلع عند الحوريات يطلعوا النكاح على جتته بالالوان ..كل حوريه مقعدتها ميل.. قال شرع قال ..
- وهو كان ممكن يلوف على بنت مايصه ويضيع مستقبل العيال ويخرب البيت .. بس كده حرام علينا نخلص عليهم بدري .
= ومش حرام لما البيوت تتخرب وأهلك يقولولك ده شرع الله .. هو يتمرمغ فى الشرع وأحنا ننداس بالإبتلاء ..
- على رأيك يأم محمد .. كده المعاش أحسن من قلة الآصل ياأختى .. وبعدين لازم نحافظ على بيوتنا ومستقبل أولادنا .
= هئ هئ وقال أيه المرحوم كان دايما يقول أن طبيخ ام صيام يخلى الميت يقوم ويجرى على المطبخ ويغرف له طبقين علشان يأكل .. يبقى يورينا هايغرف أزاى !!
- الله يرحمه .. مايجوزش عليه غير الرحمة الأن .
= ربنا يخلى أبله فاضيله وكتابها ولا برامج الطبيخ .. علمونا نطبخ الطبخة اللى تجيب بوذ الرجاله الارض ..
- رجالتنا كده .. كل واحد فيهم .. إلهه فى بطنه وفخروه بخزيه .. عموماً المعاش أفضل من قلة الآصل ..
= الله يرحمهم ....

#رشا_نور (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل