دايدا الطريق بعيد / زجل مهدى لروح عبد الكريم الخطابي

محمد نور الدين بن خديجة

الحوار المتمدن-العدد: 3796 - 2012 / 7 / 22 - 00:38
المحور: الادب والفن
    

دايدا ...* الطريق بعيد ...//
إلى عبد الكريم الخطابي في انتظار عودته إلى وطنه
إليه في ذكرى معركة أنوال الخالدة .













صلي وسلم
يا هذ الباكي
ولاش تبكي
ولاش تزيد لشوقك لهيب؟ .
ماعاد ليك حبيب
دمك ف الجبل
سال غريب ..
غناك مبحوح
ف سر مجروح
ودواك ف يديك
فك بسنيك
وكويها لاتنسى
أنت وحدك طبيب .

* * *

صلي وسلم
ولاش حريق
من كلام صديق
قدامك طريق بالخسارة
قدامك طريق بالبشارة
أنت اللي تعرف
مد لخطوة وزيد
كن حجر ..كن حديد
ولاتنسى
كن شجرة مخضرة
ف كل فرحة ..ف كل عيد .
لاش تقول الآه
لاش تغني ببكاه
لاش تزرع ف كل خطوة دمعة
لاش تجري ف كل ضبابة م وراه ؟ .

* * *

صلي وسلم
على زينو
على دمو
سال من فمو
وشعا نورو
ما ف واد
وشمس ف ماه ..
لا تقول توردر وتاه
لاش تغني ببكاه
واش تعرف من سلامو
واش تفهم من لغاه .
قدامك كباريات للقصارة
قدامك زناقي بالجوع
والموت ..
قدامك تبكي لبيوت
قدامك ترفع الصوت
او تبيعوا مغشوش
ومصبوغ بالحزارة ..
قدامك مول السيف
ومول الشكارة .
انت اللي تعرف
مد ليد
لول ليصانص والدولار
او للدراري الصغار
مرمدين ف الجوع
معريين ف لعيد..
انت اللي تعرف
مد الخطوة وزيد
ويلا طحت وقف حديد
ويلا عترثي عاون ب ليد
ويلا زلقتي وتوعت
تشفاوا فيك وتخلعت ..
مد لخطوة وزيد
مد الخطوة دايدا *
دايدا وحدة وحدة
دايدا زوج زوج
دايدا تشوف لغدا
دايدا اصبر تكبر
دايدا الطريق بعيد .

* * *

صلي وسلم
وافهم تتعلم
ولا تبكي
ولاتزيد لشوقك لهيب
الغايب راحل جوال
ف سيبة بلادي عوال
تناديه
ويناديه الريف :
عبد الكريم
ياعبد الكريم
ماشي مجروح
ف ليل غشيم
ضاحك مذبوح
ف عرس الضيم ..
جوال جوال
من سيبة لسيبة
من مخازنية وعساكر
وكنوس مغول تحتكر
من حراكي غريبة
وايام صعيبة
فيها يرني * والضريبة
فيها الكوم* وسانيكال *
وكلاب لالمان والنكليز
وشي معروف
وشي موصوف
وشي بالخوف
باقي ف الجوف
لابد يخرج
لابد يزيد
دايدا وحدة وحدة
دايدا جوج جوج
كن حجر ..كن حديد
ولاتنسى
كن وردة مفتحة
ف قلب مغروم
ف صباح جديد
ولاش تبكي
لاتبكي
مازال باقي ما يتقال
الدم سال
الدم سال
وعرف طريقو
ومد ايديه
يعانق الفرحة ف عينيه
من سبولة لسبولة
لوردة مكمولة
من الدالية للفولة
للساقية والبير
والجبل والطير
والكمنجة والبندير
ويغني :
"مغربي ..مغربي
يا بلاد السيبة ..ياحبيبي
وحبيبي ف لفدان
بالحنة وبلعمان
بشعر لبنات ولقفتان
يجري للشمس والما
يجري للمغرب ياحبيبي .." .
...
ياحبيبي وفين طبيبك
ياحبيبي وفين طبيبي
ياحبيبي الما ف قليبك
ياحبيبي الشمس ف قليبي
ياحبيبي شلا ما تحكي
ياحبيبي شلا ما تفهم
ياحبيبي صلي وسلم
على زينو
على دمو ياحبيبي غير تكلم .

* * *

جاية جاية
ذيك العودة *البركية
من سهول دكالة *
وعبدة والشاوية *
من سوس *الهم
بدمو مروية
...
جاية جاية
يامولاها يازين الخيالة
يا علام
سربة تابعة سرب
حربةة من النار
تشق السما والتراب
وتزغرد بعمارة لكلام
...
جاية جاية
حرك اللجام
دايدا وحدة وحدة
دايدا جوج جوج
دايدا شوف لغدا
وحرك ..بالي ياحفيظ
وحرك ...ها المكاحل *
وحرك
وعلى الزناد
بالي ياحفيظ
وحرك
وحرك
حرك وبدا ...







زجل : محمد نور الدين بن خديجة
غشت 1989.مراكش المغرب

* دايدا : من اهزوجة شعبية تقال للطفل لتشجيعه على الحبو.
*يرني : نبثة سامة كانت تطبخ جدورها لتأكل ايام المجاعة بالمغرب.
*الكوم : فرقة قوات قمعية استحدتثها فرنسا من مجندين سنغاليين بالمغرب.
دكالة /عبدة/الشاوية : موطن لقبائل بني هلال بالمغرب .
سوس : منطقة بالجنوب المغربي تضم قبائل أمازيغية وعربية.
*المكاحل : البنادق .

#محمد_نور_الدين_بن_خديجة (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل