الدم المرصود/لروح الشهيدين مصطفى بلهواري وابوبكر الدريدي

محمد نور الدين بن خديجة

الحوار المتمدن-العدد: 3471 - 2011 / 8 / 29 - 22:55
المحور: الادب والفن
    

الدم
ثمن سنين
يا من ناداك ولاغاك
ف حديد بو لمهارز يناير
دكوا مسمار فحيطك
وما وصلك غدار
دمك ريح وعواصف نار
كون تعرف شحال
بينك وبين الخاين من ثار
كون تتكلم يناير
والزناقي بالعزاوي سهرات
رماوا العيط عليك
يا غشت
والمحروك * ف قلبو
من صهدك
ما عرف حساب لهذ الليلة
ما ظنها بالدم تساوات
...
...
هنا كان يمشي
وحباقي بين يدي
نرميه للعزارى وبنات

* * *

ثمن سنين
وانا راخي ظلي ع لقبور
ولقبور ع لمدينة زحفات
السكات صبغ الديور
لكن الكلمة الراكدة* ف الصدور
والجمرة اللاهبة ف الرماد
والطعنة لمخبية ف قصيدة
عرفات طريقها الجديدة
وقالت* لبوبكرنوض
وقالت* لمصطفى زيد
والنجوم تشطح ع لميزان
والكمرة* ف شعر لبنات نزلات
تحلوا لقبور
كول* الشمس بانت
كول لبحر بامواجو
وبالريح العاصف
تململ ف كرش لرض
ولرض بالدم حنات ..
ياك هي عروسة بكرة
ومن فرحتها غنات
...
...
هنا كان يمشي
والحومة تسلم على ظلو
وظلو علا..علا..
ولكمرة* باست جرحو
عنكاتو*
والنجوم من صدرو طلعات

* * *

ثمن سنين
وانا راخي ظلي ع لقبور
نتسناه مازال ماجا
نتمناه ف كل غناية يمسح
دموع اولاد القصدير
واولاد الطوب واتاي * والزيتون
ويسقي الف وردة ووردة
ومن الشمس مليون
لازم يفجر هذ الكون
وظلي يغطي البحور
ويغمم على فلسطين والسلفادور
ويصب شتا من دم
لازم كنوس* الدود تندم
وتخلص حساب اللي مات
واللي تولد وتردم
لازم تنوض يا بوبكر
لازم تزيد يا مصطفى
علاه اللي غاب
ودمو ع لحيط مرصود
وكلامو موزون
وشجرتو عالية ف سماها ع لقيود
علاه اللي صوتو برق ورعود
تنساه بحاير ودشورة
هذي ما كانت حبة قمح
مخزونة ف مطمورة
هذي دكة من بارود ف مكحلة
وعمارتها مستورة
يزغردوا ليها نسورة
تضرب ف سماها لاهبة منصورة
يوم تتكلم راية حمرا يناير
يوم تزكلم رعود عاصفة دجنبر
يوم تجي ونتسناك
والسعدية بالحناني تلقاك
والسعدية نوارة مارس
على صدرك سندات
ما ضحكات ..ما بكات
بالبرق وعرس الذيب دوات
وقالت* :
لازم تنوض يابوبكر
لازم تزيد يامصطفى
خطوة ..خطوة وارمي لكفن
هذي بلاد ما بغات الموت
هذي بلاد شبعت عفن
خطوة..خطوة وشق لقبؤ
لازم انت ولخر يهدر
كلمة وحدة وصف واحد
باللي محبوس
باللي مات
باللي تولد..باللي مازال
باقي الطريق طويلة
وباقي مايتقال*
لازم تنوض يابوبكر
لازم تزيد يا مصطفى
غير احنا ف هذ الدنيا
غير احنا ولا محال
غير احنا فهذ الدنيا
غير احنا ولا محال ...



شعر : محمد نور الدين بن خديجة
18غشت 1992

* : كل ماورد من علامات من* يدل على القاف المشددة ...على لهجة المراكشيين والجنوب المغربي ...التي لا تستسيغ جمالية القاف الا مشددة
*شاركت بهذه القصيدة في اطار تخليد ذكرى شهداء الشعب المغربي ومن ضمنهم الرفيقين الماركسيين اللينييين مصطفى وابو بكر ...والمنظمة من طرف حركة 20فبراير يوم 28 غشت 2011 بمقر الاتحاد المغربي للشغل.وقد سبق أن القيت هذه القصيدة في الذكرى الثامنة للشهيدين بمنزل أسرة الدريدي سنة 1992.

#محمد_نور_الدين_بن_خديجة (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات