مش مهم

مصطفى يوسف عبد العزيز

الحوار المتمدن-العدد: 3776 - 2012 / 7 / 2 - 11:24
المحور: الادب والفن
    

.مش مهم

ان ابنك متفطمش من تراب الارض

ولم يعرف حرارة الشمس

مش مهم انه اصلا عمرو ما حمل على الارض

وانا ابني بعد المدرسة يسرح بصندوق ورنيش





مش مهم

ان اولادك في العطلة

محتارين

بين شرم ومارينا

ومختلفين على شراء ملابسهم

بين لندن وباريس

وانا ولادي محتارين

مين عليه الدور في طبور العيش



مش مهم اسكن في عشه فوق السطوح

بحارة مجهوله العنوان

بحي منسي من زمان

وانت ساكن بقصر على الكورنيش

مش مهم

ان مراتي تموت

عشان مش قادر ادفع تمن العملية

وانت مراتك تسفرها المانيا

تتعالج من نزله معوية

ماهو الفقير في بلادي

ميسويش



مش مهم انك تبعت ابنك يكمل دراسته بامريكا

وانا ابعت ابني

يشتغل بالسعودية

ويرجع في سفينتك غريق

واخوك يقتل اخويا

وابن عمك يطمس الادله

واخوك يطلع بريء

مش مهم

مانت معاك المال والسلطان

والقاضي والبرلمان

وان اكبر اصحابي

عمي عبدو الشويش





مش مهم

ان اولادك عايشين في امريكا

وبتعلموا تعليم امريكا

ومعاهم جنسية امريكا

واقسموا يمين الولاء لامريكا

وانت طول الليل مصدعنا

عن مؤامرات امريكا

وكرهك لامريكا

وفي النهار بتقود الناس في الشارع

والميدان

وبتهتف بالصوت الحياني

تسقط امريكا

وكأننا طرابيش



مش

مهم ان اكلنا بنجيبوا من الزبالة

وملابسنا بنشتريها من الباله

مش مهم ان ابويا كان عتال

وامي كانت غساله

مش مهم انك تلبس حرير

وانا البس خيش



تعرف ايه المهم

اني لما اخرج من صمتي

واصرخ باعلى صوتي

واطالبك بحقوقي

سيبني اصرخ

افضفض

واوع تقول اني حاقد

او عدو النجاح

او عميل

بس تعرف إيه الأهم من ده كلوا

انك متكفرنيش

#مصطفى_يوسف_عبد_العزيز (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل