مقدمة كتاب سبع ليالي سلف علي لقهوة - محمد مختار قنديل -

محمد مختار قنديل

الحوار المتمدن-العدد: 3597 - 2012 / 1 / 4 - 07:23
المحور: مواضيع وابحاث سياسية
    

مصر قهوة
يمكن كتير يختلف معايا لما نقول إن الحياة أو الدنيا أو إن مصر قهوة بس لو بصينا شوية ممكن نلاقي الوضع غير كدا .
يعني ناس هناك بتعيط لناس وناس بتحكي فرحها ، ناس مشغوله في سماع الأغاني وناس مشغولة تقرأ الجرنال ، ناس بتتولد هناك وناس بتموت هناك ، ناس بتريح من سفرها وناس بتستعد للسفر ، ناس بتهرب من البيت وناس بتنزل عشان تشتاق للبيت ، ناس بتجهز عشان تثور وناس بتكتب اسماءهم ، ناس بتصلي علي جنب وناس بتقول ليه يصلوا هنا ، ناس مش ليها بيت والقهوة بيتهم وناس بتفتح بيت بيها ، ناس بتهرب من مشاكلها فيها وناس بتبدأ مشاكلها بيها .
علي القهوة مسلم ومسيحي وملحد ولا ديني ولا أدري وفي الاخر هما مصريين ، القهوة فيها شارح ومشروحله ، القهوة زمن ووقت مش بيضيع وخلاص يمكن وقتها عند ناس هو الخلاص الخلاص من دنيا مزيفه بره فيها فقير وغني ، القهوة الكرسي اللي فيها بيقعد عليه فقير وغني مفيش ركن للغني وركن للفقير مفيش مكان لمسلم ومكان لغيره .
القهوة حرية بتعمل اللي عايزه بتحس بوجودك مش بتلاقي حد يقولك لو سحمت صوتك لو سمحت مش تتكلم كدا لو سمحت مش تشرب اللي بتحبه ، بس بتلاقي إحترام .
القهوة بتعلمني أزاي احب البلد ، القهوة طلعت درويش وسرور وزغلول وكتير ، القهوة طلعت مجرم وحرامي وبلطجي .
القهوة فيها شاعر بيلاقي حد يسمعه ، القهوة فيها مطرب صوته مسموع ، القهوة فيها اللسان مش عليه رقابة ، القهوة فيها ماتش الأهلي وفيها ماتش الزمالك القهوة بتجمع اللي بيحبوا نفس الشئ سوي .
القهوة فيها مدير شركة وفيها عامل نظافة ، القهوة فيها واحد داخل يبيع منتجه وواحد بيشتري منه عشان حاسس بيه ، القهوة فيها أعمي وفيها مفتح فيها عاقل وفيها مجنون ، فيها ساكت دايما وفيها كتير الكلام ، فيها دكتور جامعة بيعمل دراسة وفيها ناس بتشده للدراسة ، فيها براكين غضب عايز تدرس مصر أنزل قهوة .
القهوة فيها صاحبي اللي مات وفيها عالم مليان حكايات فيها ولد بيكلم أمه وبيقولها أنا شغال دلوقتي وفيها ولد بيكلم أمه وبيقولها أدعيلي ، فيها ست كبيرة بتدخل تدعي للناس وفيها بنت صغيرة بتدخل تلعن الناس ، فيها أب وابنه وفيها أب داخل يدور علي أبنه وواحد قاعد بيفكر أمتي يتجوز ويجيب إبنه وفيها عقيم بيدور علي إبن يحس أنه أب ليه ، فيها شاب أبوه فاته وهو صغير بيدور علي حنان أب ، فيها واحد بيقول نفسي أشرب شاي ومش معايا وفيها ألف بيدفعوا فيها عامل بيأخد الامر من مديره عشان يعمل حاجه ، فيها مدير بيتسلط علي العمال فيها مدير بيتغدي مع العمال وفيها مدير بيتغدي علي العمال ، واحد بيهرب من حبيبته وواحد قاعد مع حبيبته ، القهوة فسحه وخروجه وبرده هروب من واقع ، بإختصار علي القهوة كل التناقضات .
وفي يوم من الايام وأنا قاعد علي القهوة جالي واحد من اللي بيشتغلوا فيها وجايبلي شاي وهو بيديني الشاي سمعنا مذيع في التلفيزيون نطق أسم سلفيين _ وده من سوء حظي _ ولقيت القهوجي بيقولي والنبي يابشمهندس محمد _ مش تستغربوا من لفظ يا بشمهندس أي حد لابس قميص وبنطلون يبقي بشمهندس _ هو يعني أيه سلفيين ؟؟ وبعد شوية سكوت كدا رحت قاليه : سالفيين دول ياسيدي عقبال أملتك ناس متدينة ويعرفوا ربنا كويس .
قالي اه اه عرفتهم هم دول اللي بيقولوا عليهم إخوان مسلمين وبيربوا دقنهم كدا ويلبسوا جلبية قصيرة وحاجات من دي .
قولتله _ طبعا عشان مش عندي خلفية كبيرة عنهم _ عليك نور بالظبط كدا أيه رايك فيهم ؟
رد عليا قالي : تصدق أن نفسي الأخوان دول _ اللي هما السلفيين _ يمسكوا الحكم حتي علي الأقل اللي ماشيين في الشارع مش لابسين هيلبسوا ، واللي بيسرقوا مش هيتقطع أيديهم هيتقطع أيد اللي يخليهم يسرقوا يعني أبوها_ابوها دي لانه شايف الستات اللي بيسرقوا بس ذكوري متسلط _ أو الحكومة ، وهيضربوا ولاد ..... العلمانيين وهيموتوهم .
رديت : هيقطعوا أيد الحكومة ياعم مين يقدر ، وبعدين هيقولولك في ديمقراطية .
رد : أه هو صحيح يعني أيه ديمقراطية ؟
قولتله : ديمقراطية _ وأنا واحد مش عارفها أصلا بس بافتي زي أي حد _ دي يعني تعمل اللي أنت عايزه وقت ما أنت عايز بمزاجك يعني بيقولوا ممكن تزني وقت ما أنت عايز .
وأنا باقول كدا سمعت صوت واحد بيقول : أيوه حلوة الديمقراطية دي يارب يطبقوها ورد المدير استغفر الله .
المهم اللي جابلي الشاي قال : لا ما هما لو طبقوا الديمقراطية كدا هيبقي غلط ده ربنا بيقول في حلال وحرام هم أيه كفرة شكلهم كدا زي اللي بيقولوا عليهم كفره وعلمانيين مش يعرفوا ربنا خالص كدا أستغفر الله العظيم .
وهو بيقول الإستغفار نده ريس القهوة _ المدير_ يله ياحبيبي شوف شغلك ومش تعطل البشمهندس عن شغله وشرب الشاي وفعلا مشي .
المهم بامسك كوبية الشاي لقيتها ice tea” “ ده شاي ساقع كانت عامله شركة ليبتون بتاعت الشاي .
قولت في سري ياربنا جنية ونص وضاعو علي الفاضي أدي اللي خدناه من السلفيين والعلمانيين والديمقراطيين .
المهم فلوسي خلصت مش قدرت أجيب كوبية شاي تاني قولت هاقوم بقي ، وانا قايم باحاسب فباقول كام الحساب يا .... .
قالي جنية ونص قول اتنين ونص .
قولتله : ليه ؟!؟!
قالي : ياعم فكك خليك ديمقراطي .
دفعت ومشيت ورحت أروح بيتي في فيصل وأنا راكب العربية سمعت الناس عماله تقول : يلعن ابو الثورة قال ديمقراطية قال هي الديمقراطية يسرقونا كدا والبلطجية تدخل بيوتنا يارب اللي بيقولوا عليهم السلفيين دول يمسكوا الحكم بقي ويريحونا من البلطجية والحرامية دول وكله يمشي علي الصراط المستقيم .
ضحكت وقولت في نفسي يارب .
المهم مشيت العربية وهما بيتكلموا عن السلفيين زهقت من الرغي قولت افتح الراديو وانا مشغل الراديو اسمع سلفيين ، بصيت من شباك العربية لقيت يافطه " المؤتمر السلفي الشعبي ".... وصلت البيت وكالعادة بطلع الفلوس اللي في جيبي احطها علي التلفزيون عشان اغسل البنطلون وأنزل بيه تاني يوم نظيف ، باطلع الفلوس لقيت وقعت مني عشرة جنية قولت ما هي ناقصة .
المهم جريت علي تاني مكان باروحله لما أوصل البيت وهو مكتبيتي _ مكتبتي دي حاجه كنا بنتعود نعملها واحنا طلبه عشان بقي نتثقف ولما نتخرج نجيب فلوس ولما اتخرجنا عرفنا ازاي نجيب من المكتبة فلوس بس مش من القراية فيها لا من استرداد الفلوس اللي دفعنها فيها _ المهم قولت أبص علي أي حاجه بتتكلم عن السفلية وعن الديمقراطية وعمال ادور بحرقة عشان الجنية ونص اللي راحو دول ولقيت ياعم الحج بقي أكتر من كتاب عنهم قولت في نفسي يله بقي أبدأ اقرأ " ماهو انا مش جايلي نوم بسبب الفلوس اللي راحت ".
المهم قولت طيب هو أنا عايز اقرأ ليه كدا وطبعا لقيت 500 سبب منها :
عشان اتمنظر قدام زمايلي اللي في القهوة واقول أني اعرف بقي معلومات .
عشان أفهم الناس اللي في القهوة يعني أيه الحاجات دي .
عشان أكتب بقي في الجرايد ويبقي ليا اسم حلو ويقولوا عليا مثقف وأفرح أهلي .
قولت طيب ما انا بدل ما أفرح أهلي بالكتابة في الجرايد افيد الناس و أكتب الكلام ده في كتاب.
وخدت قرار اني أكتب كتاب اعرف فيها الناس يعني أيه سلفية ويعني أيه ديمقراطية وعلمانية وليه الناس اللي بيقولوا عليهم ديمقراطين وعلمانيين الشيوخ بيقولوا عنهم أنهم كفرة وزنادقه ؟؟ وقولت بقي كل اللي اقرأه وأكتبه هاروح ليلة كتابته القهوة وأقول للقهوجي عليه .
و في الصفحات الجاية هتشوف أنا لقيت أيه في مكتبتي وهتتعرف علي السلفية وعلي الناس الوحشة _ الديمقراطيين والعلمانيين .
البشمهندس

#محمد_مختار_قنديل (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل