أغانى صلاح جاهين .. الوطنية والرومانسية

ديانا أحمد

الحوار المتمدن-العدد: 3541 - 2011 / 11 / 9 - 15:40
المحور: الادب والفن
    

عيون الحليوة

بـان عليـا حبــه
مـن أول مـا بـان
ياما كان فى نفسى والله أعشق من زمان
كـان الـحب حبـه
بان .. طـرحت محبه
وعيون الحليوة يا عينى بحر من الحنان


من أول ما شفت عيونـه
أنا قلت الليالى يهونوا
تحميه السما وتصونـه
أنا شفت اللى مستنينى
وعرفت اللى ح يهنينى
مـن أول مـا بـان
وعيون الحليوه ياعينى بحر من الحنان
من خـوفى عليه مـا بـانـامشى
وافرش لـه طريقـه بـرمشـى
هنانى وهـواه مـا رحـمشـى
... لـيـه لمـا نـده لبيتـه
لـيـه بيـن الضـلوع خبيتـه
مـن أول ما بـان.
... دى عيون الحليوة يا عينى بحر من الحنان


شبـاك الأمــل وفتحتــه
والدنيـا جنـايـن تحتــه
يا دموعى خلاص ارتحتـوا
من إمتى يا قلبـى فرحنـا
والـدنيـا بقت تشـرحنـا
مـن أول مـا بـان
عيون الحليوة يا عينى بحر من الحنان





***






عصفورة


أنا زى ما أكون عصفورة وعاوزة تطير
واقفة وخايفة على جناحها
م الهوا لما يطوحها
والهوا طـول عمره بينده للعصافيـر
وأنا لما هواك نده
رديت باللحن ده
أوصيك . .
أوصيك بيـا.


أنا شفت عيون حلوة ومتبسمـة
أتاريها عيون قادرة ومتحكمـة
يا حبيبى أمانة عليك قلبى وروحى
ده أنا لسه يا دوب على أول سلمة
وحياة ما سحرتنى
وف يوم غيرتنى
أوصيك . . .
أوصيك بيا


إعمل لى الحب جنينـة وفسحنـى
م الفجر اقطف لى الورود وفرحنـى
وإن قلت كفاية الشمس خلاص غابت
والنبـى نور لى السكـة وروحنـى
يا بـدر فى السمـا
عمر ما قلبى اترمى
أوصـيك . . .
أوصيك بيـا.









***








ح نحارب


ح نحـارب
ح نحـارب
كل الناس ح تحــارب
مش خـايفين
م الـجـايين
بـالمـلايين ح نحـارب
ح نـحـارب
حتى النصـر
تحيـا مصـر
تحيـا مصـر









***








ح نروح فين؟


ح نـروح فيـن ؟
كــفــايـــة
فرحنـا يوميــن
كــفــايـــة
يـامـا اتقابلنـا
ويـامـا قلنــا
يا حبيبى وياما اتهنينـا
لا يــوم غُلُبنـــا
م اللـى ف قلوبنـا
ولا دبنا من دمع عينينا

لكن اللى سهر على طـول
إحساس كان حارمنى النـوم
فى اللحظـة الجميلة يقـول
راح يخلص ده كله ف يـوم
ومفيش حكاية من غير نهاية

كفايـة كفايــة
ح نـروح فيـن ؟
مفيش حكايـة من غير نهايـة
يا هنايـا ودنيايـا وحبـى
ويـوم فـراقنـا
عارف طريقنـا
وح يجيلنـا مهمـا ح نخبـى
نتفـارق يا روحـى قـوام
وكفـايـة علينـا كــلام
أتألــم سنيـن وأيـام
أهـون لـى مـن اللــوام
ومفيش حكاية من غير نهاية
كـفـايـة.











***








حـدوتـة

لو كنتـى ست الحسن والجمـال
يكون أبو زيـد الهـلالى . . أنا
لكى أول الحـدوتة فى الـدلال
وأنا آخـر الحـدوتة ليا الهنا

دقيت عليكـى الباب كتيــر
رد الصـدى وقال يا أميـــر
ما بينكـم البحــر الكبيــر

دقيت على الباب بالإيــدين
رد الصــدى وقال لى يا زيـن
بينـك وبينــها بلـديـــن

أنا قلت لو بينى وبينـها السمـا
مغرم بها وهيـا كمان مغرمـة

آه من طـريقِك الطـويـل
ولا ليا غيـر قلبـى دليـل
عطشـان يا ميـه سلسبيـل

حالى يا ست الحسن حـال
إرخى شعـورك الطـوال
خدينـى من حر الجبـال

وإن مـا لقيت عنـدك لقلبـى دوا
لأعشق عيون الشمس وأهوى الهوا

صبـرت لمـا الـود بــان
عملت أنـا التختــروان
وحمـلت قلبـى شمعـدان

دَوّبت لك بـحـر الهـوى
فى كلمـة ح نقولهـا سوا
ونقـول ده عنقـود واستوى

والناس تشوفنا تقول يا ست البنات
حدوتـة آخرتها التبات والنبـات









***








إحنا جينـا آهـه

"أغنيـة للأطفـال"


إحنا جينـا آهـه

جينـا آهـه فـى مَعـادنـــــا .

نهتـف كِدَهُــه :

فلتعيــــــش بلــدنـــــا!

ونبـــوس أهلنـــا وأجـدادنــا

فـى الـوطـــــــن دهـــه

يــــــــــــالـلا

إحنا جينـا آهـه




كـل يـــوم فيه عيــد ميــلاد

والجميــــع جاية لـــه دعــوة

علـى قــد الاجتهــــــــاد

كلـه ياخـــد حاجــة حلـــوة

البـنــات ... والــولاد

القـــدام ... والجــداد

نشتـرك ســوا فـى غنـــــوة

ونقـول هنـا آهـه

إحنـا جينـا آهـه




كـل يـوم يطلــع صـــــباح

أحلـى م اليـــــوم اللـى قبلـه

نبتسم له بارتيـاح

كلنا ونقـوم نقابلـه

بالإيمــــان

والصــــلاح


..


والجهــــاد

والكفـــــاح


..




الأمــــــل ما نسيبــش حبلـه

ونقـول هنـا هـه

إحنا جينـا آهـه




يـا ســــلام ع الابتســـــام

اللـى مليــان بالعـــــزيمــة

تحـت أعــــلام الســـــلام

تتعمــل حاجـــات عظيمــــة



..


باهتمـــــام

وانسجــــام



..


تشتغـــــل

فى نظــــام


الحيــــــاة يبقى لهـــا قيمــة

ونقـول هنـا هـه

إحنا جينـا آهـه









***








أجـازة فـى البحـر الأحمـر


يا بحـر يا . . أحمــر وبعيـد ،


وجينالك أهه فى أجازة العيــد . .


أتوبيسنا يزمر: ديـد ديـد ديـد ،


فرحـان بالبحـر الأحمــر! . .


ـ والبحـــر الأحمــــر . .


ـ مـــالــــــــــه ؟


ـ سمـــك الفسقيـــــة . .


ـ جــالــــــه .


ـ يفــرح لــه شـويــة . .


ـ ومـــالـــــه ؟


ـ والبحـــر الأحمـــــر ،



ـ أحمــــــر ليــــه ؟


ـ إكمنـــه اتهنــــــى ،


ـ وحنــــى إيــديـــه .


ـ عينــه سخنـة وعيننـا . .


ـ بــــاردة عليـــــــه


ـ و "عتاقـــة" أهـو راح له


ـ وحــــن إليــــــه ،


ـ قــرب علــى سـاحلــه ،


ـ غســـــل رجليـــه . . .


يا ترى يا جبـل فيه بعـدك إيه ،


فى طـريق البحـر الأحمـر؟ . .






سمكايـة ، لابسة هـدوم العــيد ،

وأشكال ، وألوان ، وجديد فى جديد . .

سـبـحـانـك يا فنـان يا مجـيد ،

كـل ده فـى البـحـر الأحمر ؟ . .


أهو كـده أهـو كده تبقى الأجازات ،

شـطبـنـا وقفـلنـا الدوسيـهات ،

وفتـحـنـا القمصـان والبلوزات ،

لنـسـيـم البـحـر الأحـمـر . .


أهو كده أهو كده تـبـقى الأعيـاد ،

عَيِّـدوا، ولا تـتقـيدوا يــا ولاد ،

الـضـحـك ، مـاهـواش بالعداد ،

عـلى شـط البحـر الأحـمر !! . .









***






الله معك

يا صـابـر الصبـر الجميل الله معـك
ما أروعـك يا شعبـنا ومـا أشجعـك
جرحك فلسطـين يِوْجَعك تزداد وجـود
وتحول الأحـزان بـارود فى مصنعـك
والله مـعـك .. الله معـك .. الله معـك

دلوقت فى البساتين أوان عطر الزهـور
لهفـى عليـه هناك مفيـش من يعشقـه
إحنا ورا الأشـواك وسبعين ألف سـور
والعطـر مـا يرضـى بسوانـا ينشقـه
تطلع زهـور البرتقـان
تشبه عيون فتيان عرب
تبـص للأرض بحنـان
وتبص للجانى بغضـب
يغضب نسيم البحـر والأمـواج تثـور
يا شعب يا منصـور تعـالى بمدفعـك
الله مـعـك .. الله معـك .. الله معـك

يا أرضنا المسجونة سجنك راح يـزول
شعبـك على الأبـواب مسـلح بالأمـل
كلمـة فلسطيـن زى دقـات الطـبـول
بتـدوِّى وتحمِّـس وتـدفـع للـعـمـل
راجـعـيـن بـقـوة الـسـلاح
راجـعـيـن فـى بحـر مـن الـدِما
راجـعـيـن كمـا رجـع الصـبـاح
مـن بـعـد لـيـلة مُعـتِـمـة
راجعين سيول .. من الصحارى للسهول
زى الرسول يـا شعـب نازل ينفعـك
الله معـك .. الله مـعـك .. الله معـك

يافا .. وشباك انفتـح يـوم الرجـوع
طَلُّوا من الشباك جميـع أهـل الوطـن
إحنا هنا يا شمـس يا طيـر يا ربـوع
عُدنا وخَـدْنا التـار من عـار الزمـن
ده حلم .. لكن له معاد
شعب العروبة يحققـه
وعدوِّنا لو زاد وعـاد
قوة سـلاحنا تسحقـه
الفجـر طالع مين يحوشه من الطلـوع
ويا شعب يا ممنوع يا ويل من يمنعـك
الله مـعـك .. الله معـك .. الله معـك









***






الأرض


الفاس بيجرحنى
الأرض قالت آه
رديت وأنا محنى
آه منك انتـى آه

الأرض قـالـت حـنّ
طـيرّتنـى فـتـافـيت
رديـت وقـلبـى يئـنّ
وأنا مين يجيب لى مُغيت
منـك ومـن عشقـك
يـا اللى عشـان رزقـك
عمـرى فى يوم ما بَوِنّ

عينـى عليكـى سنين
مَحْنـى عليكـى أب
عَبِّيت فى بطـنى طيـن
ولغيرى عَبِّيـت حـب
أنا حـالى مـن حـالك
عَتَـبـك عـلى مـالك
يـا أرض يـا فـدادين

خليك جمل يا جـدع خليك يا خـلى
متباع ومَشْرى بحق رغيف يا تمـلى
الأرض أبـعد عليك ولا السما قـل لى
قالوا السما للملايكة وإحنا لينا الأرض
يا ريتها تصبـح لنا والـهم ده يولـى

واسيـنـى واسيـنـى
يـا أرض يا عروستى
عمـرك ما تنسـينـى
ولا حضنى ولا بوستى
دانا يوم مـا أنول يدك
وأختـم عـلى عقـدِك
الريـح يَرِّسـينـى







***






البيانولا


أنـا دُبـت وجزمتى نعلـها داب
مـن كُتـر التـدوير ع الأحباب
يـا سلمـلم لو أَعْتَر فى حبيـب
ده أنا أرقـص من كتر الإعجاب
كـدهـه! كـدهـه! كـدهـه!

أنـا قلـبى مزيـكـة بمفـاتيح
مـن لمسـة يغـنى لك تفـاريح
مع إنـى مـا فطرتـش وجـعان
ومـعـذب ومتـيـم وجـريـح
باتنطط واتعفرت واترقص كدهه
كـدهـه! كـدهـه! كـدهـه!

بيـانولا وألابنضـة وحركـات
اطلعى بقى يا نصاص يا فرنكات
أنـا عازمك يا حبيبى لما ألاقيك
عـلى فسحة فى جميع الطرقات
نتـنطط نتعفرت نترقص كدهـه
كـدهـه! كـدهـه! كـدهـه!









***






الدنيا …

هـيـلا هيـلا،
ع النـبى صلى،
عـلى كتـفـى،
هـات وحمل لى،
عـلى راسـى،
هـات وكمل لى،
عـلى زنـدى،
هـات وتلتل لى،

هـيـلا هـوبة،
يـاللا يـا خِلى
الـدنـيــا …
حـلوة، وتمللى
لابـسـة لـى…
توب حرير تللى.
واخـطـبـها...
تـجرى وتولى.
خـزيـانـة …
وإلا عثمـاللى،

يـا لـمونـى…
يـا اللى متدلى،
راح أطـولـك،
وانـت متعـلى،
هـيـلا هـيلا،
قـايـم بالشيلة،
وحـمـولـى…
أردب وكيـلـة،
هـيـلا هيـلا،
من غير هُليـلة،
فـى المَـلَقَـة،
من غير ضُليلة،

هـيـلا هـيلا،
ع النـبى صلى
يـا صـديقـى،
والنبـى قول لى
أنـا مـاشـى،
ولا فى محلى؟







***








الجنة هى بلادنا


الجـنـة هى بـلادنـا
وجـهنـم هى حـدودنا
اللـى يـخــطـيها
راح يهـلـك فـيـها
ويدوق الموت على إيدنا


اليـوم ده بعـده مفيـش
غير مجـد عز وحـرية
لو متـنا ولادنـا تعيـش
ونعيش فى الأجيال الجاية





ح نعيش ونشوف مصر سعيدة
نعيش ونشوف دنيا جديدة

وكفاحنا يكون بكـرة قصيـدة
توصف أيام ثورة مجيـدة

يا شباب اليوم ده كفـاح
اتسـلح وامشـى ويانـا
وإن كان ما معاكش سلاح
قاتل بإيديك العـريانـة


دافـع عـن شمـس الحـرية
عن شرف الراية المصرية

وشعـوب الأمـة العـربـية
انـت وهى وحـدة قويـة


فليحيا كفـاح الشعـب
فليحيا كفاح المصـريين
موت يا استعمار بالرعب
الشعب بيزحف بالملايين


الشعب الثايـر أهو جـالك
تلاقيه فى يمينك وشمالك

وبـفـاسه بيـهد آمـالك
بيقطـع لـك كـل حبـالك







***






المـكـن
"صورة غنائية"


أصـــوات مجاميــع





(1) :

إحـــنا كــفــر الـمقـاتـــة

عــاوزيــن بــوابيــر حـراتـة





(2) :

إحــنــا مِــنيــة مــليـــج

عـــاوزيـــن بــوابيـر حليـج





(3) :

إحــنــا شـــبرا العـــلاوى

عــاوزيــن مصــنع كيمـــاوى




(4) :

إحــنــا مــحلــة شــديــد

عـــاوزيـــن مصــنع حـديـد





الجميع :

إحــنــا أهــل الــوطــن


إحــنــا الريـف والمــــدن


كــلنـا عــاوزيـن مصـانـع


كــلنـا عــاوزيـن مــكــن


مـكـن .. مـكـن .. مـكـن


مــعلــوم .. لازم مــكـن



فى البـحـر





الصياد :

يــا حميــدو طــل وشــوف

جــايـة فى البـحـر صـفـوف





حميدو :

أيـوووه يــابــا ع الـبـواخـر

عــلى مــدد الشــوف ألــوف



عـمـال الـتـركـيـب :

خـلـع مســامير خـلـع خـلـع


افتـح صـنـاديق يــاللا وطـلـع




وضــب رتب نضــف ركــب


افتـح مصــنع وكـمـان مصـنع


وكمـان وكمـان وكمـان وكمـان


وكمـان وكمـان وكمـان مصـنع !


وكمـان وكمـان وكمـان وكمـان


وكمـان وكمـان وكمـان مصــنع


خلــع !




عامـل :

مليون براوه يا ناس على دى تروس


دى سـواقى دايرة شـايلة بحر فلوس


تسـقيفة للمـكـن الـلى جـاى لنـا


مـن بره يدى فى الشطـارة دروس


تسـقيفة للمـكـن الـلى جـاى لنـا


يزاملنـا يا ولاد جيلنـا ف نضالنـا


قابلوا المـكـن بالحضن والزغاريط


عقبـال مـا تعمـل زيه عمالنـا . .



دار المـكـن وبقالـه صـوت جبار


سـال العرق جنب المـكـن أنهـار


مـداخننـا كتبت عنـا فوق الـريح


مـا بقاش هنا استغلال ولا استعمـار


احصد غيطـان الصـلب يا عثمـان


الشـعب مسـتنظـر كنوز أسـوان


بـكـره مـكـن بـره يجيب مواليد


ومـكـن جديد عـربى يوماتى يبان





رجـال :

عايـزيـن نصنـع مـكـنـنـا

بـإيديـن عمـال وطـنـنــا




نسـاء :

عـايـزيـن نصـنـع مـكـنـنـا

بـإيـديـن عـمـال وطـنـنــا



أطفـال :

عـايـزيـن نصـنـع مـكـنـنـا

بـإيـديـن عـمـال وطـنـنــا





شبـاب :

عــنــدنـــا أســـوان

يـــاللا يـا جـدعــــان


ده زمـانـنـا وده أوانـنــا

أنـا كـنـت عمرى لم رأيت أسوان


يــا فـرحتى رأيتهـا بعـينيـا ..


أسـوان على مجد الـعـرب عنوان


منجم عـزيمـة حـديد وحـريـة



وأنـا كـنـت عمرى لم رأيت منجم


يـا فـرحتى وأنا وسـط عُمـاله


رعـد المطـارق فى الجبل دمـدم


بنغـم مفيـش أنغـام فى جمـالـه


غـنـى الــعـمـل


رقــص الأمـــل


وبـقـيـت سـعـيـد نـشــوان

وأنا كنت عمـرى لم رأيت أسـوان



وأنا كنت عمـرى لم رأيت مطـرقة


يـا فـرحتى والمطـرقة ف إيـدى


حسـيت فى دمـى بشمسنا المشرقة


وبالحـديـد مصـهور فى وريـدى


دمـى اشـتعل


قلـبى اشـتغل


وبـقــيـت ســعيـد نشــوان


وأَنا كنت عمـرى لم رأيت أسـوان






رجـال :

يـا صــلـب يـا مصــهـور

سـحـرك عجـيب مـشــهـور





نسـاء :

يـا صــلـب يـا ســايـح

صـــيـتــك بـعـيـد رايـح




الجميع :

إعـمــل لـنـا مـسـمـــار

واعـمــل لـنـا أجـنــــة


إعـمــل لـنـا مــزمـــار


واعـمــل لـنـا مـكـنـــة


إعـمــل لـنـا يــا صـلـب


صـاروخ يـجـيـب الشـمـس


تـسـطـع فـى إيـد الشـعـب


والـغــد يصــبـح أمــس


يـا صـلـب ، يـا مـصـهـور




أصوات حالمة :

وإتــقـــدم يــا زمـــان


واتــقـــدم يــا وطـــن


واصــنـع انـت المـصـانـع


واصــنـع انـت المـكـــن


(1) :

احـنــا كـفـر الـمـقـاتــة

عـنـدنـا بـوابـيـر حـراتـة




(2) :

إحـنــا مـنـيـة مـلـيــج

عـنـدنـا بـوابـيـر حـليـج


(3) :

إحـنــا شـبــرا الـعـلاوى

عـنـدنـا مـصـنـع كيـماوى
(4) :

إحـنــا مـحـلـة شـديـــد


عـنـدنـا مـصـنـع حـديـد





واتـقــدم يـــا زمـــان


واتـقــدم يـــا زمـــان


واتـقــدم يـــا زمـــان


واتـقــدم يـــا زمـــان


واتـقــدم يـــا زمـــان











***








المســــألـة


هـى ديه المســـــــــــألـة

والمـأســـاة والمهــــزلـة

مشكلـــة مــش مشكلـــة .

معضلـــة مــــش معضلـــة

إنمـــــــا ولكنمـــــــا

هـى ديـه المســـألة




الأصـيل مالهوش فى الدنيا دى حـظ

والسعــادة لكـل قـاسى قلبـه فـظ

يا تـرى نركع له واللا نقول له طـظ

حتى لو دماغنـا تحت المقصلــة . .

هـى ديـه المســـألة




إمتى يبقى الخيــر طالع له خرابيش

تيجى هابشـة المفتـرى ما يفتــريش

أيوه أصـل الدنيــا عركة ما تنتهيش

واللى راحـوا سـابوها زى المزبلة. .

هـى ديـه المســـألة






واللـــه لولا الحـب كانت تبقى غم

والشـوارع تتملـى مجـاريــح ودم

أيوه أصـل الحــب يمحى كل هـم

والحبيــب يدفــع حبيبـه للعلا. .

هـى ديـه المســـألة




روق القنـاتـى شـامـى يا لارنــج

النعـاس مـلا العيــون كأنه بنــج

وابتـدوا الأحــلام يقـولوا تنجا لنج

يا تــرى ح تحققــوهم واللا لا. .

هـى ديـه المســـألة









***










المسـئـولـيــة


- آديـك أهـه خـــدت العضـــويــة ،


وصـبحــت فـى اللجـنـة الأسـاسيــة ،


أبـو زيـد زمـانــك ، وحصــــانـك :


الكلمـــة ، والخـدمــة الـوطنيــــة. .


ودى مسـئـوليــة






- دى مسئــوليــة عـزيـزة عـليـــا ،


معــزة الـــروح ، والـحـــريـــة ،


معــزة العســــكرى لســـلاحـــه ،


وأكتـــر ، لكـــن أنـا إيه وحـديــا ؟


مفيـش أنـا ، فيـه إحنا يـا صـاحبـــى


أنـا وانـت ، وانـت ، وهــو ، وهيــه ،


علينـــا نعمــــل الاشتـــراكيــــة


مــن كلمــة حلــوة ، للقمــة حلــوة ،


وبيــت وكســوة ، ونــاس عايشيـــن،


آدى القضيـــة .






- مفيـش محــال ، والعـــزم معـانـا ،


والعـلـــــــم بينــــور دنيـانـا ،


والفكــــــــر بيجســم أحلامنـــا


قـدامنـــا ، شـايفينهـا ، وشـايفانــا . .


شـايفيـن رايتنـــا ف حضــن النسمـة ،


مـرفـرفــة بستـاشــــر نجـمـــة ،


علـى مـدينــــــة عـربيــــــة ،


معـرفــش مـن أى الأقـطـــــــار .


. . حريــــة ، واشتراكيـــة ، ووحــدة ،


مكتــوب حروفهـــا بمليــــون وردة ،


علـى صـــدر بلـــدة عربيـــــة ،


معــرفـــش مـن أى الأقطــــــار ،


صنـــاعة كبـــرى ، ملاعـب خضـرا ،


تمـاثيـل رخـام ، ع الترعــة ، وأوبـرا ،


فــى كــل قريـــــة عربيـــــة ،


دى مـاهيــش أمـانـى ، وكـلام أغانـى ،


ده بـر تانــى ، قصــادنـا ، قــريـب ،


يـا معـداويـة






ريسنـــا مــــلاح ، ومعــدينـــا ،


عامــــل وفـــلاح ، مـن أهالينـــا ،


ومنــا فينــا المــوج ، والمـركـــب ،


والصحبـــة ، والــريس والزينــــة ،


نفـوت علـى الصحــرا ، تخضــــر ..


نشقـــى ، خــدود النــاس تحمـــر ..


والمسئــوليـــة مـا بين أحضـاننـــا ،


مقاديـــف ، تقــربنـــا مـن البــر ،


أصغــر مهمــــة ، برضـك مهمــة ،


دى الثــورة همــة ، وذمــة ، وديــن ،


وإنســانيـــة ..






أحلــف بقـرآنـــــى ، وإنجيلـــى ،


بهــدف عظيـــم ، دايمــا ينادي لـــى ،


بالمعــــركــــــة ، وسهــرهـا ،


بالقــــــاهـــــرة ، وقمــرهـا ..


بالقـــاهــرة اللـى مـا حـد قهـرهـا ..


أحلــف بكــل بطـــل فــى عمــل ،


بالفــلاحيـــــــن ، بالعمـــــل ،


بالفـــن اللــى بيدينـــا أمـــــل ،


وبالجنـــــود علــى كـل حـــدود ،


وبالميثـــاق ، اللى جعلته منـارى ودليلـى..


أحلــف بكــل صبـــى ، وصبيـــة ،


بعيــونهـــم الحلـــوة العربيــــة ،


بجمــال ، وجــرح قديــم فى جبينــه .


أحلــف وأعاهــد ، أعيــش مجاهــد ،


والــــرب شـاهــد إنــى أميــــن


ع المسـئـولـيـــة .






- نحـلف يميــن بالـلـــــه تعـالـى ،


نحـلف بقــوتنـــــا الفعـــالـــة ،


الاتحـــاد الاشتــراكــى العـربــى .


نختــاره مبــــدأ ، ورســـالـــة ،


ومسـئـولـيــة









***










المغـنـى المـتـجـول


مغنواتـى . . مغنواتـى
عواد . . قانونجى . . رقاق . . ناياتى
الفن عنـدى هـو حياتـى
سفـر يـومـاتـى
سهـر ليـلاتـى
أنشــد آهاتـى
وقهقهـاتــــى
وأقـول يا دنيـا
خـدى وهاتـى
ده أنا المغنـى المغنـواتـى









***










الـنـيـل



النـيـــــــــــــل ،

العمــــلاق الجميــــل ،


فايــــت علـى البلــدان ،

نـشـــــــــــوان ..


ويـمـــــيـــــــل ،

ينعـــس تحت النخيـــل ،


وينـادى علـى أســــوان ،

بـحـنـــــــــان …


" كليوباتـرة .. كليوباتـرة " ..

يـا حمـــــام رخــام .


وحدى جاى من قلب صــحرا ،

وعطشـــــان كـلام …


عطشــان يا صــبيـــة ،

وأنـا ميــه ســلسبيــل .




ويـفــــــــــــوت ،

لابـس لولــى ، وياقــوت ،


النيـــل أبــو صـولجـان ،

سـلـطـــــــــان . . .


ويــــــــــــــروح

الأقصــر ، وينـوح ، ويبـوح


بكـلام ما قالـوش إنســـان ،

ولا جــــــــــان . . .


" نفرتـارى .. نفرتـارى " .

يـا بنــــت الإلـــه ،


وحـدى جـاى وسـط البـرارى

وعطشــــان حيـــاة . . .


عطشــــان يا صبيـــة ،

وأنـا ميــه سـلسبيـــــل .




أســيـــــــــــوط ،

أم النبــــق زغنطــــوط ،


ومنفلـــــوط رمــــان ،

حـــــــــــــران . . .


وهنـــــــــــــاك ،

ملـــوى فـى الشبــــاك ،


والنيــل فايت ، غضبـــان ،

فيضــــــــــــــان . .



" نفـرتيتـى .. نفـرتيتـى " ..

فينــــك مــن زمـــان ،


رحتـى فيـن ، وفيـن مشيتـى

ده أنا جـاى لك عطشـــان . .


.

عطشـــان يـا صبيـــة ،

وأنا ميـــه ســلسبيـــل .









***








النجــوم


حضـنت عـودى باغنّـِى
عـود الحبيبـة فتننــى
أَغنى غنـــوة حزيـنة
والاَّ ح تبعــدها عـنى

يا لحـن عاشــق وحالـم
طالــع سلالــم سلالـم
إمتــى أطـول النجـوم

عاشــق دواه المحبــة
حـرام يا شابـة ده عاشق
سافـروا له يامـا أطــبا
ورجعــوا والسهـم راشق

والحـلم يلمس فــؤادى
يهمس . . يغنـى . . ينادى
آه لـو أطـول النجــوم









***






الشوارع


الشـــوارع حـــواديــت ،

حواداية العشق فيهـا ، وحواداية العفـاريـت ،

وحـــدوا الله …


الشـارع ده كنـا ساكنين فيـه زمـان ،

كل يوم يضيق زيادة عــن مــا كــان ،

أصـبــح الآن ،

زى بطـن الأم . مالناش فيه مـكــان …


والشـارع ده رحنـا فيـه المــدرسـة

اللى باقى منه باقى ، واللى مش باقى اتنسى ،

كنسوه الكناسين بالمكنسة ،

ويا أوراق الخريف سنة تلاتة وأربعين وخمسة وستة وأربعين



والشـارع ده كل شئ فيه للمبيـع …

والشـارع ده وحل زى ما هوه ، بس بـاسـم تانى …

والشـارع ده أوله عمـارات ، وآخـره حيطـة سد ...

والشارع ده مـــــاشــى مـن تـحت البــلد …

والشـارع ده جـديـد ، ومـا حـضــرتـش بنـايـتــه.



الشارع ده والشارع ده كلهم حواديت طوال وقصيرين

والـشارع ده . . . .

مـاشـى فيـه ، وف قلبـى رعــــــدة ،

بـس برضك ماشى ، لـجـل مـا أجيب نهـايتـه …

أنا طفل قــديــم ، يـحب الحــواديــــت .







***







الـوحـدة


إحنا الوحدة وأمتها
إحنا زُراع كرمتها
إحنا كتاب كلمتها
إحنا الأمة العربية

كلنا روح واحدة ما بتفْرق شماليه من جنوبيه
وحـده أُمـال إيـه يـا حـبيــبى
وحـده شـولـكـان* يـا بـيـا

يا مرفرف على شمالى
يـا قلبى قل لى مـالى
نسـمة هـوا الشـمالى
هـزتنى هـزة قـوية

تسـلم يا حب الأوطـان
يا مجـمع شمل الخـلان
من طنطا وحِمْص وأسوان
والسـلـوم والـلاذقـيـة

كلنا روح واحدة ما بتفرق شمالية من جنوبية
وحــده أُمــال إيــه يـا حـبيــبى
وحــده شــولــكـان يــا بــيَّــا

يا ليل يا عينى أوف يابا وأوف يا خى
عرب الشمـال والجنوب اتجمعم فى حى
دقة قلوبهم غـنا ونظرة عيونهم ضَـىّ
اليـد فى اليـد زى السـد فى القـوة
متوحـدين بالأُخـوَّة وياما غيرهم جَىّ

وحدة وإحنا صناعها
وراية واحدة بنرفعها
وقلعة بتحميها سباعها
وتحمى العزة القومية
وحدة وأفراح وأغانى
يهنـالِك يا أوطـانى
جيشـنا الأول والثانى
بحـدود الجمـهوريـة

كلنا روح ما بتفرِق شمالية من جنوبية
وحــدة أُمــال إيـه يـا حبـيـبى
وحــدة شــولــكـان يـا بـيـا

((* شولكان باللهجة السورية معناها الحرفى "أمّال إيه"))








***






أول مايو



مـن بيـن إيـديـك ، خـدت الدوايـة والقـلم ،

مـن بيـن إيـديـك ، خـدت الـورق ،



والمكتب اللـى قصـادى ، وأنا باكـتب إليـك ،

صـــــــنعة إيـديـــــــك ،



كل اللـى عينـى تشوفـه ، من صـنعة إيديـك ،

فســـــتان حبيبتـــى ، والهـرم ،



حـديـد كبــارى النيــل ، وأسفلت الطـريق ،

أوتـــــار كمنجــــات النغــم ،



سيجارتى ، والأتــوبيس ، وســارية العـلـم ،

وكل نجمـة فى العـلـم ، وكل لون …



غزلتهم ، نسجتهـم ، صبغتهـم نور من عينيـك ،

الله عــلــــيـــــــــــك



تسـلم إيـديــك ، يـا أبـو الايديـن الشغـالين ،

يـا أبـو الايـديــن الحـمــاليــن ،



يـا أبـو الايـديــــن البنـــاييــــــن ،

يـا أبـو الايـديــن السقايين ، الخبازين ،



الخــلاقيــــن مــــن العــــــدم ،

مــــــايــــو ابـتـــــدا ،



يـا أبـو الايـديـن الـورد ، عرقـانيـن نـدى ،

دورت عجــــلات الـزمـــــان ،



يـا أبـو الايـديــــن المغــاويــــــر ،

تنباس إيديـك ؟ .. والا يلفوها ف حرير ؟



أنــا بـاقــول لأ .. تمســـك القــلـــم.











***








أيامنا الحلوة


هناك قدام عينـينا
جايب معاه مصانع


أيامنا الحلوة جاية
السد العـالى طالع

جايب معاه مزارع
جايب الاشتراكـية
وجاية فى الطريق
وبقى بحق وحقيق
الشغل ف قلبه شُعلة
يملا العـيون بريق

يوم ما نسفت الجبال
لتـأمـيم القـنـال
فى كـل قلب قايمة
تحـمِّس الرجـال

ونـور فى كل بيت
ولا محتاجة لياريت
جـاهد واسهر ليالى
راح تبلغ ما اشتهيت

أيامنا الحلوة هلت
والحلم ظنونه ولت
السد آهه .. بيعلى
الشغل لمـا يحلى

فـجرت فجر بـكره
وجعلت اليوم ده ذكرى
الثـورة ثـورة دايمـة
حـوالين السـد هايمة

عاوزين غيطان جديدة
أحـلام ماهيش بعيدة
يا اللى تريـد المـعالى
وابـنى لك سد عـالى











***








باحب السلام


باحب الســلام
باحـبه . . كأنه وليـدى
وباصحـى وانـام
وغصن الزتون مَلوْ إيدى
وقلـبى مُنــاه
ما يبقـى على الأرض شـر
باحب الحيــاة
باحب جميـع البشـر

باحب السـلام وباحبك يا شابـة
وباحلـم كتيـر بحياتنــا سـوا
لكــن فيه سحابـة على الدنـيا هابّة
ما نقـدرش منهـا نشـم الهــوا
ولو قلنـا بكـره
ما نعرفش بكـره ح يجرى لـنا إيـه
وياما ح يجــرى
ما دام فيه خطـر وإحنا ساكتين عليه

تعالـوا يا كل الشعوب قرّبـوا
تعالـوا نقف صف واحد منيع
عشـان الـربيع . .
عشان شابة حلوة بيعشقها شاب
عشان يبقى للطفل أب
عشان يبقى للأم طفل رضيع












***












بالأحضـــــان


بالأحضـان . . بالأحضـان . . بالأحضـان . .

بالأحضـان يا بلادنـا يا حلوة بالأحضـان ،

فى معــــادك ، يتلمـــــوا ولادك ،

يا بلادنــــا ، وتعــود أعيـــادك ،

والغـايب مـا يطيقــش بعــــادك ،

يرجــع ياخـــدك بالأحضـــان



- بالأحضـــان يـا حبيبتــى يــا أمــى ،

يـا بـــلادى يـا غنيــوة ف دمــــى ،

علــى صـــدرك أرتــاح من همـــى ،

وبـأمـــرك أشـــعلهــا نيــــران . .



ـ يامــــا لفيــت ســــواح متغــــرب ،

وأنــا دمـــى بحبـــك مــتشــــرب ،

أبعـــــد عنــــــك ، قلبــى يقــرب ،

ويــرفـــرف ع النيـــل عطشــــان …



- يامـــا شفتـــك ع البعـــد عظيمــــة ،

يا بـــلادى يا حـــــرة يا كــريمــــة

وزعيمـــــك خــــلاكـى زعيمــــة ،

فى طــريــق الخيــــر والعمـــران…

اتقـــــويـت ورفعــــت الــــــراس

وبكيــت فرحـــة وشـــوق وحمـــاس ،

وبقيــت ماشـــــى ف وســـط النـاس ،

متبــــاهى بوطنــــــــى فرحــان…



بالأحضــان يـا مصـــانع . . يـامــزارع ...

بالأحضـــــان …

يا حصـــاد الثـــورة يا حـلـم وعـلــم ...

بالأحضـــان يا جنـــايـن .. يا مـــدايـن ..

بالأحضـــــان …



يا اللـى انـت بترفــــع رايـــة السلـــم …

نـور عينـى وحبايبـى ،

وعزاز قوى على قلبـى ،

يا اللـى علـى الجـرار ، وقصــاد لهاليب الصــلب

يا سـواعـد عربيــة ،

ونفـوس حـرة أبيــة ،

يحميكـم ، وتدوم الهمــة ، ويحيــا الشعــــب !

وبالأحضـــــان ! ..









***








بستـان الاشتراكيـــة


افتــح . . افتــاح . .
اقفــل . . حــول . .
نقعــد نرتــاح ؟ . .
لأ ، ح نكمــــل ،


ده السد العالى ، شهل ..



- علـى راس بستـــان الاشتـراكيــة ،


واقفيـــن بنهنـــدز ع الميـــــه ،


أمـة أبطــال ، عُلمـــا ، وعمـــال ،


ومعـــانـــا جـــمــــــال :


بنغنــى غنـــوة فـرايحيـــــة ..


ننده كلنا ، ندهة فلاح لاخواته ، ساعة الرى .


حاكم أرضنا ملكنا كلنا م السـد العالى وجى .


ننــده كلنـا نــدهــة قويـــــة .


افتــــــح …



- افتح، على حوض الورد، أبو تمانين مليون شجراية


الورد العربـى ، ورد السهـل ، وورد الصحرايـة ..


أهو كده ، وافتح صفحة ما تشبـع فيها الدنيـا قرايـة


يا فاتح فى الصخر ده للجيل ، ويا النيـل ، مجرايـة ..



- اقفــــل …



- واقفل ع الحيـرة السيـرة وهـات شربـات للكل .


اقفل عينـك ، وافتحهـا ، تـلاقـى الشـوك بقى فل ..


وزهور ليمـون ، صابحـة ف يافا بتضحـك وتطـل .


تقول : افتح صندوق العيــد ، وإدى الحلــوة مرايـة



مــوال



" يا حلــم ، يا حلــم ، يا أبو الليــل ، يا متزوق .


ليلـك سهـرنــاه ، ونـورنـــاه .. بالمبـــدأ ،


فيه نـاس تقـول فى الصبـاح : حلمنـا والله خيـر .


وإحنا ، الصبــاح ييجى يلقـى الحلــم متحقـق ..



- حــول …



- حـول ، وافرش منديلك الأخضــر ، ع الرملــة ،


حولها جــداول ، ومعامــل ، وحيــاة كاملــة ،


حولنا ، وطـولنـا أملنــا بإيـدنـا العاملــــة ..


حول علـى فوق ، زى السـد ما طالـع على فـوق ،


الخيـر بيجيب الخيــر ، والفرحـة دى كانت شوق ..


الشعـب العربى رمـى قيـوده ، وخـرج م الطـوق ،


طالـع ، طالـع للقمـة ، وبيـزرع فيهـا الرايــة ،


قولــوا ورايــا ..



- افتـح . . افتــح …


اقفــل . . حــول . .


نقعـد نرتــاح ؟ . .


لأ ، ح نكمـــل ! . .


ح نكمـــــل ! . .


* تحويل مجرى النيل مايو 1964










***










إحنا الشعب


إحنا الشعب
إحنا الشعب
اخترناك من قلب الشعب
يا فاتـح بـاب الحـرية
يا ريس يا كـبير القـلب

يا حلاوة الشعب وهوه بيهتف باسم حبيـبه
مبروك ع الشعب خلاص السعد هيبقى نصيبه
وإحنا اخترناك
وح نمشى وراك
إحنـا الشعب

إحنا حياتك وابتساماتك وانت حياتنا
إحنا بنفرح وأنت بتفرح من فرحتنا
كل ما نكـبر قلـبك يكـبر بمحبـتنا
وإحنا اخترنـاك وح نمـشى وراك
إحنا الشعب

يا اللى بتسهر لجل ما تظهر شمس هنانا
إحنا جنودك إيدنا فى ايدك مصر أمانة
بكره وطننا ح يصبح جنة وانت معانا
وإحنا اختـرناك وح نمـشى وراك
إحنا الشعب

يا اللى واعدنا بأيام عـيدنا هل هـلالك
بكرة يا بكرة مشتاق نظرة لسحر جمالك
بكرة بطلـنا بجـهد عمـلنا يحيى آمالك
وإحنا اخترنـاك
وح نمشى وراك
إحنا الشــعب.









***








اسكندرانى


إسـكندرانـى إسـكنـدرانـى
عيونــه حلــوة ومحـيرانـى
أنـا هـويتــه لـمـا لقـيتــه
عيـونـه خضـرا وهو أسمرانـى


يـا زمـرد يا فــاروز
يا بخت اللـى يفـــوز
فزنــا بنـظـرة عيـن
ودتــنا عـلى فيــن ؟
ودتــنا كــرمـــوز

البحـر هـادى . . والا إيـه ؟
باحـاول أفهــم من عينيـه
النـني الأخضــــــــر
يحكـــم ويقـــــدر
وأنـا اللــى ما أقـدرش عليه
الاسكنـــدرانــى

بحــر الحــب عميـق
كل شـويــة غـريــق
أنا خــدنـى التـــيار

تعـالى لى يـا بحـــار
لو فيــك قـلب رقيـق
لو قلبك أخضـر لون عينيك
لا أخاف علـيا ولا عليـك
وإن كـنت قـاســـى
يـا مـا ح اقـاســى
وأنا اللى روحـى بين إيديك
يـا اسـكنـدرانـى . .

آه يـا أطــبا
آه م اللـى بيّـَا
ضيعـت قلبـى فى اسـكندريـة
راحت هنـاوة البـال من حياتـى
ساعــة مـا سلَّط عينـيه علـيا
لـما انشـبك قلـبى . . ومــال
ما بقاش فى صدرى على الشمـال
بس المحـــــــبة
مالهــاش أطبـــــا
يشفونى من جـرح الجمال
الاســـكنـــدرانـى . .









***








اتنين


اتـنــين ولا قبـلـنا
ولا بـعد منــا اتنــين
فيــن زى حـبـى أنـا
وزى حـــبك فـيــن
اتـنـين ولا قبــلــنا
ولا بــعد منــا اتنـين

اتنـين روحيـن هيمـانين
قلبـيـن وشقــايـــق
تفـوت علـينـا السنــين
وكـأنـهـا دقــايــق
لايـق عليـنـا الــهنــا
وكـأنـه تـوب عـايـق
ولا فى القصـص والغنـا
فيـه زينـا حبـيبيـــن
اتـنـين ولا قبـلنـــا
ولا بعــد منــا اتـنين

قـالوا ما فيــش الهـوى
لكن إحـنـا قـلنا: فـيـه
يا نـاس شوفـونـا ســوا
راح تعـــرفوا معانـيه
الـحب ده ســرنـــا
لــكن ولا نـخبيـــه
أهــه أهــه حبنــــا
لا نخــاف حسـد ولا عين

اتنيـــن ولا قبـلنـــا
ولا بعــد منــا اتنيـن







***








كلام فى السياسة


ما ليش كتيـر فى السيـاسـة
لـكن بـافـكر
وماليش كتير فى الكــلام
لـكن بـاعبـَّر
من قلب مليـان حماســة
وباقـول كـلام فى السياسة

باحلـم تملـى بالسعـادة والأمــان
باحلم أعيش من غير ما أخاف غدر الزمان
وإن جـيت ونـلت المنـى
يصـعـب عـلـيا الهـنا
من غير ما يتهـنوا جمـيع الناس كـمان
ما أسعدش غير ف وطن سعـيد من حواليا
سمّـوا الشـعور ده حب والا اشتراكـية
ماليش كتـير فى السيـاسـة

أوقات أحس كأنى على مفـرق طريق
أحتار ويصبح قلبى فى الأفكار غريق
ولما أشور الجيــران
وأشاور الخــلان
رأى الصواب يظـهر جـرئ وله بـريق
وأحس رأى حبايبـى بينــور عينيــا
سموا الشعور ده حب والا ديمقـراطـية
ماليش كتيـر فى السيـاسـة

بينى وبين أيـامى حـرب ما تـنتهـيش
وزى كل الناس باموت علـشان أعـيش
أتــمــنـى أروح عنــدهـم
جــهــدى علــى جهــدهـم
يصبح وجودنا قوة بعد ما كـان مفـيش
وأنا إيش أكـون وحدى لولاش بلدى عليا
سـموا الشــعور ده حب والا تعاونـية
ما ليش كتيـر فى السيـاسـة

أنا قلبـى مليـان حـماسـة
لكـل شئ حُـر صـــادق
ما ليش كتيـر فى السياســة
لكـن باحـب المبـــادئ
وباحب صـاحب المبــادئ
الاشتراكــيـة
الديمقراطـيـة
التعاونــيـة











***








ليلة إمبارح


ليلة إمبارح ما جالـيش نــوم
وإحنا لـسـه ف أول يـوم

قبل مـا ترميـنى فى بحـورك
مـش كنـت تعلمـنى العـوم

أنا كـنت لوحـدى وف حـالى
شفتك ما اعرفش اللى جرى لى

راحة البـال راحـت من بالى
قـلت لها مع ألف سـلامـة

والحـيرة قلـت لـها تـعالـى
لا مـلامـة علـيا لا مـلامة

عمرى كوم والحب ده كوم

غابت شمس إمبـارح عـنى
خـدهـا اللـيل خـباها مـنى

بس انـت يا قـمر طمـنى
واوعـى تخاف من أى غيـامة

شـباكـى مـنور بيـغـنى
لا مـلامـة علـيا لا مـلامـة

عمرى كوم والحب ده كوم
وليلة إمبارح ما جاليش نوم









***








محـلا الغنـا


محـلا الغنـا بعـد الرصـاص مـا اتكلـــم

علـى الجـزايــر يـا ســلام وسـلـــم

سـلــم على المـدفـع وقـول لـه كفـايـة

مـاتـوا الأعـادى . . واللـى عـاش اتعلــم



يا جزايـر اللهــب اطرحـى ورد أبيــض

خلـى الجبـال تلبـس عروســة وتنهــض

أمـر البــلاد لابـن البــلاد اتفــــوض

يـا كبريـائــى وفـرحتــى وعيـونــى


جاكــــى الســــلام

عــــزة ومقـــــام


كـأن شعبــك عمــره يـوم مـا اتـألــم

محـلا الغنـا . . بعـد الرصـاص مـا اتكلـم



أحـب اشـوفــك يـا رايـات فى النسمــة

بتـرفـرفـى ع الـذكـريـات مبتسـمـــة

سبـع سنيـن دم الجـزايـــر فـايــــر

وألـف ألـف شـهيـد . . وهـى الكلمــــة


فيـه مـعـجـــــزات

زمـانـهــــا فـــات


ودى معجـزات الشعـــب لمـا يصمـــم

محـلا الغنـا . . بعـد الرصـاص ما اتكلــم



محـلا الغنـا والحـــب والمـلاغيــــة

ويـاكـى يـا جـزايــر أيـا عـربـيــة

ويـاكـى يـا شمـوســة فـى البـدريــة

طالعيـن شعـاع فـى شعـاع دراع فـى دراع

نهـدم قــلاع . . ونحــرر " الحـريــة "


نـهـزم طـغـــــاة . .

نـرفــع جـبــــاة . .


ونقيــم حيــاة . . إنسانها مـا يتظلــم

محـلا الغنــا بعـد الرصــاص ما اتكلــم









***








مهـرجـان مـوسـكـــو


النجـوم الحمـرا . سهـرانـة فـى موسكـو ،


زى قلــب المـوسـكـوفييــن ، الـودود ،


يـا حبـايبـى يامـا كـان نفسـى أبوسكـو ،


وإنتـو واقفيـن جنبنــا ، زى الأســود …


مـهـرجـانـكـم للسـلام ، وللصـداقــة ،


ابتــدا وانتـم مـعانـا ف بـورسـعيــد ،


والسـلام الروسـى فى إيـديـن الـرفـاقـة ،


كـل طــلقــة فيهـا كـل الأنـاشيــد . .





مهـرجـانكـم ، ابتـدا يـوم المظـاهرة . . .


" ارفـعـوا عـن مصــر يـد المعتـديـن ،


" مصـر حـرة . . وح تفضل مصـر حـرة "


يا حبـايبـى ، كنتوا إنـذار بـولجـانيـن . .





وإحنا كنا ف مصـر ، ناصـر جنب ناصـر ،


كـنـا قـلعــة ، كـنـا أرض مـلغمــة ،


أرض وعــرة ، والعـدو لو جالهـا طايـر ،


صـواريـخ المهـرجـان ، ملـو السمـا …


وانتصـــرنـا !





يـا حبـايبـى ، أنـا قلبـى وردة بيضــا ،


ليها فى صـدوركـو ميتيـن مليـون مكـان ،


أنا باشبك قلبـى فى صـدوركـو العريضـة . .


اشبكـوا لـى بدالـه شـارة المهـــرجــان


* موسكو 1957









***










مفتــرق الطــرق


ســاعـات أقـوم الصــبح قلبى حــزيـن

أطــل بـره البـاب ياخــدنـى الحنيــن



اللـى لقيتـــه ضـــاع

واللـى اشتـريته انبـــاع

واللـى قــابلتــه راح وفــات الأنيـــن



وأرجــــع وأقــــول

لسـه الطيـــور بتفــن

والنحــلايـات بتطـــن

والطفــل ضحكــه يـرن

مـع إن مــش كـل البشــر فــرحانيـن



حبيبــى سكــر مـــر طعـم الهـــوى

فـرق مـا بيننـا البيـن ما عـدنـاش ســوا

حـرام عليـك يـا عـذاب

نبقـى كـده أغـــــراب .

ده البعـد واللـــه جــرح مـن غيـر دوا



آدى اللى كـان وآدى القــدر والمصيـــر

نـودع الـمـاضـى وحلمــــه الكبيـــر

نـودع الأشبـاح

نـودع الأفـراح

راح اللـى راح ما عـدش فـاضــل كتيــر

إيه العمـل فـى الوقـت ده يـا صــديـق

غيـر إننـا عنـد افتــــراق الطــريـق

نبـــص قـــــدامنـا

على شمـس أحـــلامنـا

نلقـــاهـا بتشــق السحــاب الغميـــق

وأرجـــع وأقــــول

لسـه الطيــور بتفـــن

والنحــلايـات بتطـــن

والطفــل ضحكـة يــرن

مع إن مش كـل البشـــر فــــرحانين .







***










مقـاومــة مقـاومــة


مقـاومـــة مقـاومـــة مقـاومـــة

إصـــرار وعنـــاد ومــداومـــــة

الحـــــــق هـــو الحـــــــق

مـا عنــــــدنـاش مســـــاومــة

ويـا بخــت الشهيـــد



يـا بخــت الشهيــد . . شهيــد المقـاومـة

ح يعيــــش مـن جــــــــديــد

فـى كـل ضــــحكـة وبســمـــــة

فـى كـل غـنــــــوة عـيــــــد

فى الوطــن العربـى المتحـد الحـر السعيـد

ح يعيـــش مـن جـــديــد الشهيـــد



فى صــرخـة الوليـد من دهشـة الحيــاة

وطــرقـة الحــديـد ورفعــة الجبـــاه

لفـوق لفـوق لفـوق يـا أسماء الشهــداء

تـل الزعتــــــر وصــــــابــرا

وشـاتيـــــــلا وغيـرهـا بكــــره

مـن مــذبحــــــــة للأخــــرى

عـايشيـــــن بـلا انتهـــــــــاء

مقــاومــة مقــاومـــة مقــاومـــة

ويـا بخــت الشهيـــد









***








نجيـة


مــن صـــغــر ســـنــى


غـــاوى مــلاغـيــــة ،


وغصـب عـنـى بتقـول عينيـا ،


عــــاشــق يـا لـيــــل . .


يـا لـيـل وغــاوى سـهـــر ،


يـا لـيـل ، وبالـى طــويـل . .


للصــبـح ، يـا أبـو الـقـمــر ،


أنــا وانــت ، والمـواويــل . .



غــــازلـت نـســمــــة .


يــا لـيـل ، ونـجـمــة ...


وكلمــة كلمــة قصــدى البنيـة


يـا ريـتـهــا تـســـمـح ،


وتـقـــول لـى : صـــرح . .


بدال ما ألمح . . أنا أقول : نجيـة !









***








أحكم يا شعب


أُحكم يــا شعـــب
اُحكــم يـا شعـــب
وخـد بنفسـك مكـانـك
الأمـــر صعــــب
والنهــى صعــــب
إمسـك بِيــدَّك ميزانـك

أُحكــم وقــــول
يا بـلادى كونى سعيـدةْ
عيشـى فى أيـام مجيدةْ

وأحكــم وقـــول
يا بـلادى كونـى سعيـدةْ
عيشـى فى أيـام مجيـدةْ
وأحكــم يا شعـــب
ابن الغيطـان
أبو الغيطـان
كان حانى عوده على العيدان
رفـع قـوامـه
وقـال كلامـه
سمعنـا صوتـه فى البرلمـان
وأنـا أقـــول وأقــول
فى مجلس الأمــة قلبــى
هو اللى عارف مطالبـى
وأحـكـم يـا شعــب

إيديــن بتـزرع وتصنـع
وإيديـن بتبــنى وترفــــع
رفعت أسامــى أسامــــى
يا نـايب الشـعب يومــك
فى كلمتـك كل قــومــك
أخطب ودافــع وحامــى
ورِّينــا منــك عجــب
واحكـم على شمـس بـكره
تجمــع ولاد العـــرب
على كلمـة واحـدة وفـكرة
عيوننـا طالــة عليــك
وقلبنـا نِفسُـه يفـرح
وَرِّينـا قــوة إيديـك
وأحكم على الصخر يطرح
وأنا أشوف وأقول
فى مجلس الأمة قلبـى
هو اللى عارف مطالبى
وأحكـم يـا شعــب












***








أغنية إلى أسوان


يا فـلاح نفتح بيبـان الخـير

اعمل لنا مفتـاح يا صنايعى

ومـد الايـد ما تمدهاش للغير

أسـوان مـلانة حديد انهض

أسوان بنت بنـوت
المـجد خـاطـبها
لـها مـعاد مثبوت
تـوفى حبايـبـها

أسـوان نشـوانـة
وقـلـبـها بيـدق
بزنـود عـرقانـة
بين الصخور بتشق

النيل ما بين أسوان وبين حلوان
سافر وغـنى غـنوة المصـنع
آه يا سـما يـا مغيِّـمة دخـان
مـطرك عنـيد منه الحديد زرّع

ده مش حديد فى النار
ده عزمـنـا الجـبار
عـدو الاسـتعـمـار

ده مـش حديد مصهور
ده شعـبنا المنـصـور
بيـسـابـق التـيـار
بيطـير كأنـه شـرار
يبـعت سـلام م القلب
ويـا حـديد والصـلب









***








أغنية للقطن

يا معجبانى يا أبيـض يا معجبانـى
يا قطن يا اللى مبيض وش الغيطانى
يا معجبانى يا أبيض يسعد صبـاحك
يا قطن يا اللى مبـيض وش فـلاحك
وبعودة الأيام يا حـبايب فى سـلام

وبلدنا عروسة لابسة التوب أبيضـانى
يا معجبانـى يا أبيـض يا معجبـانى

سهروا الجدعـان ليالـى على المـراوى
مواويـلهم والليــالى تسقـى التقـاوى
كـل الغنـاوى فيها طبـيب مــداوى
والزرعـة لم ييجيها كـانى والاّ مانى

فى عينين كل الناس . . يقفوا لك حراس
يا قطـن لما تنـوّر عـلى العـيدانى
يا معجـبانى يا أبيـض يـا معجبانى

الحلـوة القطـن نـوّر ما بين إيديــها
والسـعد قمــر مصـوّر قـايل عليـها
شدت حـزامها ورنـت بخــلخاليـها
جَنِت المحصول وغنت أحلى الأغانـى
قطن يا قطن يا قطن . . تعالىَ لى بالحضن

ولا أحطك غير فى عبى من فيض حنانى
يا معجـبانى يـا أبيـض يـا معجـبانى .












***










أغنية من الشباك

أنـا هـنا يـا ابـن الحـلال
لا عايـزة جـاه ولا كتر مال
باحـلـم بـعش أمـلاه أنـا
سعد وهنا

ملـيت لـك القـلـة
عطـشان تعالى يا جمـيل ياللا
ملـيت لـك الأبريـق
عطشان تعالى والسلامة طريق
أنـا ورا الشـبـاك
سـهرانة باسـتـناك
علمِّت قلـبى هـواك
من قبل ما تجـينى ولا اتمـلَّى
وإن جيتـنى يا مهـنى
ندرن عليا العين والنِنِّى
وإن جيت تدق البـاب
ندرن عليا القـلب شيلُه حجاب
فرشـت لـك رمـشى
إخطر علـيه وامـشى
م الشـوق ما بانامـشى
باستنى . . حتى العمر مستِّـنى

فى الغيب أنا شايـفاك
قلبى انكشف عنه الحجاب ولقاك
فى الغـيب أنا شُفـتك
قلـبى شاور لى عليك وعرفـتك
انت أسمرانى جمـيل
لك غِيّة فى المـواويل
والقـلب لـك بيمـيل
من قبل ما يكون لى نصيب وياك
وأنا هنا . .











***










أغنية البنت أم ضفيرة

آه .. بدك تعمل حيلة وتاخد قلـبى؟
آه .. قلبى قليل الحيلة يانا يا غُلبى


دنيا الحب كبـيرة
وأنا لسه بضـفيرة
وإن حسيت بالحيرة
آه يـانا يـا غلـبى

أمى قالت لى: حسك عينك .. قلبك إوعيـله
ضمى على قلبك دراعينك .. لا الحب يجيله
مرت نسمة قوية شـوية
فيها قسـوة على حنـية
أعمل إيه فيك انت وهيا
ده أنا متوصيَّة
لا أكـلم حـد
هزار ولا جد
وطول السكة أمشى بمَّد
فاهم ؟
آه ...

قلبى اندارى وقال أنا خايف.. أمشى الناحية دى
والناحـية دى لمحت شفايـف .. تهم وتنـادى
تبكـى تتـنهد وتغـنى
وتقول لى كلام أكبر منى
لا فيه ولا كلمة تطمـننى
تبعد عنى
لا تتبـسِّم
ولا تسـلِّم
لا أحبك وأرجع أتألِم
فاهم ؟
آه ...



بدك تعمل حيلة ... وتاخد قلبى ؟











***








أغنية ولد صغير


ح أجـرى كـأنى فـوق حـصـان
وح أطــير كـأنـى بـأجـنـحـة
جـمـيـلـه جــدا الغـيــطـان
والـفـسـحـة فـيـهـا مـفـرحـة

لـو كـنـت رسـام كـنـت جـيت
ومـعـايـا شـنـطـة فـيها زيـت
ورسـمـت كـل غـيــط وبـيـت
لـو كـنـت شـاعـر كـنـت أقول
عــن الجـــداول والـحــقـول
قـصـيـدة فـيـهـا ألـف بـيـت

لــو كـــنـت ده أو كــنـت ده
مـش ح أفـرح أكـتـر مـن كــده
مـا فـيـش لـزوم أقـول يـا ريت

والـنسـمـة بـتـمــر بـحـنـان
والـشـمـس حـلـوة مصحـصـحة
جـمـيـلـة جــدا الـغـيـطـان
والـفـسـحـة فـيـهـا مـفرحــة













***








أغنية هزار


مـن أخسـن " رتســينـا " ، واسـقينـا ،

يا خبيبى يا بارمـان . . .

" كـريـاكـو " بـيـخـب " كاتـيـنــا " ،

و" استاورو " زعلان . . .

أنـا لازم يـيـجـى سكـران طـيـنــة ،

كلمتو عربى يـا أخينـا ،

أنـا عمـــرى مـا سافـرتـو " أتـيـنـا " ،

ولا رختو اليــونــان .











***










قطار الجنود


يـا وابــور الســاعــة حــداشــر ،


يـا مـــدنـــدش بـالــــــورود ،


مــن بــــــره ورد ، وجـــــوه


ورد بـلبـــــس الـجـنـــــــود



ورد ، وله عطـر تانـى ،


ورد مـعـطـر بـارود ،


ورد يـفـوح فى المعارك ،


ويـفـتـح ع الحــدود ،


ورد ربـيــع الـحـرية ،


مطــرح ما تقـوم يقـوم .


ورد ، وله شوكـة قـويـة .


تـجـرح وقـت اللـزوم .


ورد وشايـل مـدافـــع ،


ورد مكـتـل صفــوف .


يـا وابـــور السـاعـــة حـداشــر ،


مســتـنـظـــــراك ألـــــوف .




ألــــوف ، ألــــوف ، ألــــوف ..

فـى مـيــــدان بـــاب الحــديــد ،

مـالـيـيـنــــه ، ولســـه فـايــض

لحــــــــد بـورسـعـيــــــد ،

ودمــشــــق ، والـجــــزايـــر ،

والـمغــــرب ، وبـغـــــــداد …

زحــــام مـالهـــــش آخــــر ،

لــم جـمـيــــــع الـبـــــلاد ..


الكونجو ، إنـدونيسيــا ،

رأس الـرجـا الـشهيد ،

كل شـعوب أفـرو آسـيا ،

فى ميدان بـاب الحـديد

مستنظـرين وصـولـك ،

بيغـنـوا ويهـتـفوا لـك ،

وبيحلمــوا بـدخـولـك ،

فـى بـلاد كتيـر بعيــد ،

بـوردك العنيــــد …

يـا وابــور الســــاعـة حـداشــر ..

يـا صـــــفـارتـك زغـاريـــــد













***










رقص الغوازى


يا ابن النـاس الغلابــة
فرحك فى شـهر بابــة
انده لأبوك وجـيبــه
يحـضر ساعة الكتابـة
أصل اللى أبوه يسـيبـه
تطـمع فيـه الديـابــة
يا ابـن النـاس الغلابـة

يا ابن النـاس الغنـاى
فرحـك مأذونـه جـاى
ما تجيـبش أبوك وناسك
نـاسـك يا واد قـواى
واورث وهـات ميراثك
اشـترى سـكر وشـاى
يا ابـن الناس الغنـاى









***










راية العرب

عجـبى عـلى راية العـرب فى الريح
فى الأرض ثابـتة وفى السـما تـفاريح
والنجمتـيـن الخـضر بيبـصـوا لـنا
وبـيـقـولوا لنـا بكل عربـى فصـيح
الوحـدة الوحدة الوحدة
مجد العرب فى الوحدة

الوحـدة رايـة ونجمتـينـها صبـايـا
علـشان عـيونهم ياما راحوا ضـحايـا
شجـعان زمـان فرسان حروب الوحدة
مـن دمـهم نبـتـت وصبحـت رايـة
وكـم شهـيد وسـط المـيدان وجـريح
هتـف وقـال بكـل عـربى فصـيـح
الوحـدة الوحدة الوحدة
مجد العرب فى الوحدة

يا نجمتـين يا خُضـْر يا عـيون بـلدى
بـاحبـكـم حـبى لبـنـتـى وولـدى
حبـى لأبويـا وأمـى يا نجـوم رايتـى
بـاحـبـكم حبـى لـعزى ومـجـدى
وزى مـا العـربـى كـلامـه صريـح
أنـا أقـول بـكـل عربـى فـصـيـح
الوحـدة الوحدة الوحدة
مجد العرب فى الوحدة

زى الربيـع مـا لابـد يـوفى بـوعـده
لابـد يـوم كـل العــرب يـتـحـدوا
ونجـمة خضـرا بعـد نجـمة حاييجوا
يتـقابلوا فى الرايـة مكـان ما اتواعدوا
ويرفـرفـوا فى العيد عـلى المراجـيح
وهنـاك يقـولوا بكـل عربـى فصـيح
الوحـدة الوحدة الوحدة
مجد العرب فى الوحدة
عجبى على راية العرب
عجبى ! !












***










شـــوف


شـــوف ..


لا تقــول مقـــدر ومكتـــوب


ولا تشتكـــى مـــر كـاســك


عقــلك فـى راســك يـا حبـوب


هـو اللـى يعــرف خـلاصــك




شـــوف ..


أيـام وعشنـــاهــا بالعــرض


وكلـــه مــردود الينــا


ما فى خطـوة نمشيهـا فى الأرض


إلا وتمنهــا علينــا




شـــوف ..


ما حـد يعمـل عمـل خيـر


إلا ويلقـاه بــذاتـه


ولا شـر بيمر مـن غيــر


ما صـاحبـه ياخـد جزاتـه




شـــوف ..


الشـر والخيـر فرستين


طايـرين يسابقهـم بهمــة


روح قل لهـم همـا الاتنيــن


المــــوت فـى آخــر المتمـة.













***










صورة

صــــورة صــــورة صــــورة

كلنــا كــده عايـــــزيـن صـــورة

صـــورة للشعـــب الفـرحـــــان

تحـــت الـرايــــــة المنصـــورة

يا زمـان صــورنـا

صــورنا يـا زمــان



ح نقـــــرب مـن بعــض كمــــان

واللـى ح يبعـــــد م الميـــــــدان

عمـــره مـا ح يبـان فـى الصــــورة


خضـــرة وميـــه وشمـــس عفيــة

وقبـة سمــــا زرقــــا مصــفيــة

ونســــايـم سلـــــم وحــــريـة

ومعــــالـم فـــــن ومـدنيـــــة

ومـــدايــن صـــاحيـة الفجـــريـة

علـى أشـــــرف نــــــدهـة وأدان

دى بلــــدنـا مصــــر العـــربيـة

صــــورة منــورهـا الإيمــــــان

صـــور يـا زمــان



على مــدد الشــوف مــدنـة ومــدنـة

دى لصــــــلاتنـا ودى لجهــــادنـا

مـدخنـــة قـايــدة قلـــوب حسـادنـا

تحتهــا صـــلب كأنــه عنــــادنـا

وقــــدامـه مـن أغلـى ولادنــــــا

عامـــــل ومهنــــــدس عـرقـان

شبـــان والشبـــان فـى بلـــــدنـا

فـى الصـــــورة فـى أهــــم مكـان

صـــور يـا زمــان



كلنـا هنـا فـى الصــــــورة زمـايـل

نوفـى اللـى ميثــــاقنـا عليـه قــايـل

مـن أصـــغر طفلــــة بجــــدايـل

علـى زرع ودرس بتتمـــــــايـل

للفــــــلاح أبـو خيــر وجمـــايـل

للـواعــــــظ حـافظ القــــــرآن

للجنــــدى الأســــد اللـى شــايـل

علـى كتفــــه درع الأوطــــــــان



وبعيـد عن العيـن لكين فى الصـورة أوضـح

ناس تحت حر الجبـال والقلـب كله حمــاس

بتفجـر الـرمــل أنهـار من دهـب إسـود

وناس بتكسيـه بخضـرة وكل لـون لـه ناس



وأسـاتــذة وعلمــــا ومعـامـــــل

ودكاتـــرة من الشعـــب العـامــــل

ورجـال سكـــر علـى مكـاتبهــــــا

تخـدم بالـــــروح لمـا تعـامـــــل

والصــــورة ما فيهاش الخـامــــــل

والهـامـــــل واجبـــه ونعســــان

مـا فيهـاش الا الثــــــورى الكامــل

المصـــــرى العـــربـى الإنســـان

صـــور يـا زمــان













***










توسيع القنال





نـداء :

انـت مـيــن .. ؟

رد :

ابـن ابـنـه .. يـعـنـى حـفـيده




نـداء :

هــو مـيــن ..؟



رد :

الــلــى حـفـرهــا بـإيــده





نـداء :

وجــمـــال .. ؟


رد :

أممِّـهـا .. أممِّـهـا .. أممِّـهـا





مجموعة:


وســـع يــا جــدع وســـع

للـشــبـــان الـمـجـــدع


وســع يــا جــدع وســـع

ده قـنـالـنـــا بـيـتـوســع


الــريـــس قـــال يـــاللا

كل الشــعب اتطـــــوع



قـوم . . شيـل . . هـات . . خُـد . . إرفـع


تتابع :

علـمــك . . خـدمــك . . إدفـــع


ديـنــك . . فـيـنـك . . إطـلــع


مـجـــدك . . بـلــدك . . إنـفــع


وسـع يا جـدع وسـع


للـشبان الـمـجـــدع



المجموع : المفرد

يـامــا : يـامــا يـامــا ويـامــا

يـامــا : مـيــن عـنـده شـهـامـة

يـامــا : مـيــن عـنـده كـرامــة

يـامــا : كـــام نـفــر اتـطــوع

يـامــا : كـــام قـلــب مـولــع

يـامــا : كـــام إيــــد بـتوسـع

يـامــا : فـيـه كـام عيـن شـايـفـة

يـامــا : مـن حـمـص لـحـيــفـا

يـامــا : يـامــا يـامــا ويـامــا

يـامــا : يـامــا بـكـرة ح نـفـرح

يـامــا : والـشـجــرة ح تـطـرح

يـامــا : والأمــلــة ح تـصـبـح

يـامــا : والـخـيـر ح يـجـيـنــا

يـامــا : عـلـى كــل سـفـيـنـة

يـامــا : يـامــا يـامــا ويـامــا

يـامــا : بـنـحـــب دراعـنـــا

يـامــا : الـلــى بـيـنـفـعـنــا

يـامــا : ونـقــول وسـَّـعـنـــا

يـامــا : غـلايـيــن ح تـعـــدى

يـامــا : وتـجـيــب وتـــــودى

يـامــا : يـامــا يـامــا ويـامــا











***










ثوار

ثـوار . . ولآخـر مــدى ، ثــــوار ..

مطـرح ما نمشــى ، يفتـح النــوار ،

ننهـض فى كل صـباح ، بـحلـم جديـد ،

ثـوار ، نعيـدك يا انتصـار ، ونـزيـد ،

وطول مـا إيد شـعب العـرب فـى الإيد ،

الثـورة قايمـة ، والكفـــــاح دوار



مــن أرضنا هل الايمـان ، والديــــن

عيســى ومحمـد ثورتـيـن خـالـدين ،

والعـلـم ثـورة ، ومن هنـا قـامـت ،

والفن والحـريـة ، والتمـديــــن

ثـوار ، نهـزك يا تـاريـخ ، تنطـلق ،

نحكم عليـك يـا مستحيــل تنخــلق ،

نؤمـر رحابـك يـا فضــا ، تمتــلئ ،

والخطـوة منـا . . تسبـق المـواعيــد .



الشـعـب قـام ، يسـأل علـى حقـوقـه ،

والثـورة زى النبـض فـى عروقــــه ،

اللـى الـنـهارده يحققـه ، ويـرضــاه ،

هــو اللـى بكـرة ، بهمتـه ، يفوقـه …

ثوار ، مـع البطـل اللـى جـابـه القدر ،

رفعنـا راسنـا لفـوق لـمـا ظـهـــر ،

بـوسنـا السـمـا ويـاه ودوسنـا الخطر ،

والعـزم ثابـت والعـزيمــة حديـــد .



تعـالـوا يا أجيـال ، يـا رمـز الأمـل ،

مـن بعـد جيلنـا ، واحمـلوا ما حمــل ،

وافتكـروا فينـا ، واذكرونـا بخيـــر ،

مع كل غنـوة مـن أغـانـى العمـل …



هيـلا هيـلا ، ثورتنـا عمـل وجهــاد !

هيـلا هيـلا ، هبـوا ، واصنعـوا الأمجاد !

هيـلا هيـلا ، وابنـوا فـوق بنـا الأجداد .

أول طريقنـا بعيـد ! . . وآخـره بعيــد !

وطول ما إيـد شعب العـرب فى الايــد ،

الثـورة قايمـة ، والكفــــاح دوار ! …









***










والله زمان يا سلاحى



والله زمــان يـا سـلاحـى
اشـتقـت لـك فـى كـفاحى
انـطق وقـول أنـا صـاحى
يـا حــرب والله زمــان


والله زمــان ع الجـنــود
زاحفــة بـتـرعد رعـود
حالفـة تـروح لـم تـعـود
إلا بـنـصـر الـزمـــان

هـمـوا وضـمـوا الصفوف
شيـلوا الحـيـاة ع الكـفوف
يا مـا العـدو راح يشـوف
منـكـم فـى نـار المـيدان
يـا مـجـد يـا مـجـدنـا
يـا لـلى اتـبنـيـت عنـدنا
بـشـقـانـا وبـكــدنـا
عـمـرك مـا تبقــى هوان

الشعب جبال الشعب بحور
الشـعب بـيزحف زى النـور
زلزال بيشق لهم فى قـبور
بركان غضـبان بركان بيـفور


لجـل السـلام والأمل والحياة
شيـلنا السـلاح ورعانا الإله
نــنـاضـل نــنـاضـل
نـناضـل بـعـزم وإيـمان

أقـسـم بوحــدة بــلادى
وبـثــورتـى وجـهـادى
ما يعود على الأرض عـادى
مـا يـسود غير الإنــسان


* 1960













***










ولد وبنت


ولـــد وبـــنـت
ولـــد وبـــنـت
كـــل الجنــيـنـة
ولـــد وبـــنـت
يـا حب حاسب ده هنا
وردة ولـــــد
ووردة بـــنــت


كــان فــيه بِنَـَّـية
خــرجـت شـويــة
فــى المــغربيــة
قــابـلت وِلــيِّــد
بــص لــها حــوَد
وقــــال أهــيــا
ســلــم عـلـيـها
فـهـمـت إيـديـهـا
قــالــت عيـنـيها
خـــلاص آمـنــت


خـجــلانــة هـيـا
ومــسـتــحـيــة
لــكــن هــنـيـة
قــال كـلمـة هــوه
وف قــلــبـه جـوه
نـــاره الـقـويــة
قـــال يــا آمـالى
قــالــت يــا غالى
غــيـرت حـــالى
ســاعـــة مـا بنت


الوقـــت مــســا
وهـــى لــســـه
ولا هـــى حـاسـة


آدم وحـــــــوا
هـــى وهــــو
اتـنيـن فـى قــصة
لـكـن سـاعـتـهـا
شـافت سـاعـتـهـا
رجـعـت لـبـيـتـها
وأنـــا ..؟
حـزنـت ..


أنا اللى كاتب الغنوة ديا
أنــا الوَلــيِّــــد
صــاحب البِنــــيَّة
اللــى عــيـونـها
قـــالت آمـــنـت











***










يا أبو قلب وحيد


يا أبو قـلب وحيد .. أنا زيك تعــالى
لـنا عمر جديد نهايـته بعيد .. تعـالى
يا غريب الروح .. إليك الروح رسـالة
"تعالـى"

أنت من غيرى وأنـا من غير حـنان
ياما قلــبى من شـقاه دق البــيبان
كـل بـاب مقــفول على جنيـنة هَنا
وأبـو قـلب وحيد مالوش فيها مـكان

فيـن بـلاد الحب فين أرض الهــوى
اللى فيــها الـناس بتـتهنى ســوا
رد مـن قلــبى كـلام قال مش بعيد
يـا جريــح القـلب من إيديـك الدوا

يـا غريب .. قلـبى أنـا أرض المعاد
يـا صباح الخير عـلى أيامنا الجـداد
مـد إيـدك خـد بايـدى وابـتـسـم
خـد بإيد عـمرى وخد عـهد الوداد












***










يا هلا

ســـوريـــــون: يـا هـــلا يــا هـــلا

مــصـريـــــون: مـرحــب مـرحـــب

الــجـــمـــيـع: شربـات الوحـدة بنـشـرب

ســـوريـــــون: عـــــربــى زيــــى .. شــــرف خيـــّيـــى

مــصـريـــــون: تعالا لى يـا أخويـا قـوام قـرب


فـــــــرد:

نشـوة قلبـى ووردة ف إيـــدى
وأنا ماشى بـاغــنى يـوم عيدى
حواليا الناس فيـضـان إحسـاس
والوحـدة نشيــدهـم ونشيـدى
فى سورية ومصـر اتقابلوا عـرب
يا هلا يا هـلا مرحب مرحــب
الأمـة اتقابلـت بـالأحـضــان
م اللاذقيـة لـما لأســـــوان

حوالين فكرة
حوالين بكـرة
حوالـين ثــورة
حواليـن إنسان

والمنـصـورة قـالت لحـلــب
يا هلا يا هـلا مرحـب مـرحـب

قـدام قـدام خطـوة لقـــدام
عاوزين نفـرح ونعيـش فى سلام
هِمِّى يا جماهيـر عاوزين تعـمير
والوحدة طريـق كـل الأحــلام
والوحـدة نغمهـا حماس وطرب
يا هلا يا هلا مرحـب مرحــب

وحدتنــا يا غاليـــة أفديـكـى
وآخد مـن عمـــرى وآديكـى
وأحلـف بالعيـد زغاريد زغاريد
لأضرب على إيـد مـن يعاديكـى
واللـى يسالمـك أسالمه وأرحَّب
يا هـلا يا هـلا مرحب مرحب









***








يا أهــلا بالمعـــارك


يـا أهــلاً بـالمعــــارك ،

يـا بخـت ميـن يشــــارك ،

بنارهـــا نستبـــــارك ،

ونـطـلــع منصـوريــن ..

ملاييـن الشـعب ، تدق الكعـب ،

تقـول : كلنــا جاهــزيـن !



خــارج ساعــة الصبحيــة ،

والنـاس رايحيــن جاييــن ،

نظـــــرتهــم فكـرتنـى ،

بـأيـام ستـــة وخمسيــن . .

راجـع فـى المغـربيــــة ،

شفـت عيـون الثــــوار . .



نظـــرتهـم فكــرتنـــى ،

بالضبـــــاط الأحــرار . .

شفـت اجتمــاع سيــاســى ،

كلمـاتــه نغــم حمـاسـى ،

ولا فيـش على قـده كراسـى ،

من كتـر ما فيـه مـلايين …

وف لحظة نطـل . . ويهـدا الكل .

ونسـمــع فرحانييـــــن . .

عبـد النـاصـــر، حبيبنـــا

قـايـم بيننــا يخاطـبنــا ،



نجـاوبــه ويجــاوبنـا . .


قـائـــد ومجنـــديــن



"قــــول مـا بـــدالـك


إحـنــا رجــــالــك


ودراعــك اليميـــن . .




عبـد النـاصـــر يقـول :

" اللـــه أكبــر ، ويـوم الأزهــر فى وجدانـى ،

يـا شعــب ، قمنـا لقهــر الصعــب من تانـى ،

وعـــود معنـديـش ، مفيـش إلا النضــال عندى ،

وشقــا ومعــارك مـريـرة كتيـر يـا إخـوانـى "

" اطلــب تـلاقـى ، تـلاتيــن مليـون فـدائـى ،

فـى جـميـــــع الميـــــــــاديـــن "



عبـد النـاصــر يقـول :

" علـى كل بـاب فى الميثــاق ، مصبـاح يهـدينـا .

نشـوف جهـــادنـا العظيـم على فيـن مـودينـا .



للأفـراح والـرفـاهيـة ،
ح نمـد طريق ع النيـل ،


اسمه فى الاشـتـراكيـة ،
التصـــنيـع التقيــل ،



بس نضاعف إنتـاجنـا ،
أضعاف أضعاف أضعاف ،


وندبـر مهمـا احتجنـا ،

نتحـــدى الإســراف ،


وبقــرش الادخـــار ،

نتحـــدى الاستعمـار ،


ونقيــم جـدار جبـار ،

يحمـى حيـاة العامليـن ..


آدى نقطـــة بنقطـــة

جميــع الخطـــــة ،

وباللــه نسـتعيــن


خطتنـا خلاص فى إيدنا ،

وخلاص متشـمــريـن



وحزين يا اللى تعانـدنـا ،
بتعانــد جبــاريـن ..





جبـــل الجـــرانـيـت انشـــق ، انشـــال ،

وف بحــــر النيـــــل انــزق ، أمـــال ،

مـا فـى حـاجــة تقـــول لنـا لأ ، إيش حـــال

يــوم تحــــريــرنــا فلسـطيــــــن ..


والتوبـة التوبـة التوبـة ،

نصــبرعلى غـدارين ،


وحيـاة الـدم الغـالـى ،

وحيـاة عـرق الجبيـن ،





تـوبـــة مـا عــاد فيهـا مجـاملــة ، خـلاص..

ولا عـاد م الثـــــورة الشـاملــة ، منــاص ..

يـا ايـدينــا العـاملـــه ازرعـى إخــــلاص

واحصــــــدى والـــــــرب يعيــــن ..

احصـــدى وانقضــى

اكشفــى وارفضـــى

خـاينيـن وإنتهــازييـن

ح نشـــق طـريقنـا ،

بنــور مبـادئنــا ،

ولنـا النصـــر المبيـن



ويـا أهـلاً بالمعـــارك


يا بحر الثـورة يا هادر

خلى هـديـرك بنظـــام




من صوت المكـن الداير

عيـن العـدو مش حتنـام


وأنت يا شبابنـا اتقـدم ،

جه دورك فى التـاريـخ ،



بإيـديـك لازم تتقـدم ،

مصر ف عصر الصواريخ.


وشبابنا نهض يا حبايب ،

قال : جه دورى مانيش هايب


يسلم لى الشعر الشـايب

والنـاس المخلصـــين .





للمخلصـــــين .. ألـف ســـلام !

للاشتـراكييــــن .. ألـف ســـلام !

الحقيقييــــن .. ألـف ســــلام !

لجمــال وإخـوانـه .. ألـف ســـلام !

يحيــا لأوطانـه .. بألـف ســـلام !

وأنـا وأنت وهـو .. بخيــر وســلام !

وســلام مننـــا ، لمنــى قلبنـــا !

الـوحــــدة .. الكبـــــــرى ..

ونعيــش ، ونضــالنـا يحققهــا لنـا

ونقـــول .. كلنــا جـاهـــــزين ،


ويـا أهـلاً بالمعـــارك !









***






زفـة


محـلاك يـا مصـرى وإنت ع الدفـة
والنـصـرة عـاملة فى القنـال زفـة
يـا ولاد بـلدنـا تعـالـوا ع الضـفة
شـاوروا لهم
غنـوا لهــم
وقـولـوا لـهم
ريسـنا قــال .. مفــيش محــال
راح الدخـيـل وابـن الـبـلد كـفى



حيـوا الرجـال السُّـمر فوق السفيـنة
حيوا اللى جاهدوا عشان ما يفرح وادينا
نـظـرت لـنا الدنـيـا وشافت عملهم
مَدحِـتْ بكـل لـسان على كل ميـنا



أنا قلبى فاكر لسه مين اللى جـارحـه
ولـولا يـوم الـنصر ما اتلم جرحـه
شفت القنال فى إيدين رجال من بـلادى
رفـرف عليهم قلـبى من كتر فرحـه


حبايـبنا شرق وغرب جايـين بلـدنا
والورد والياسـمـيـن هديـة ولادنـا
ونسيـمـنا بالأحـضـان يقابل راياتهم
وقـنالنا يحكي لهم حكـايـة جهـادنـا

#ديانا_أحمد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات