تهانينا والف مبروك ..الاحتلال باقي (شكال بهلول ؟؟)

نوري جاسم المياحي

الحوار المتمدن-العدد: 3513 - 2011 / 10 / 11 - 08:45
المحور: اليسار ,الديمقراطية, العلمانية والتمدن في العراق
    

اكو عبارة عراقية يرددها العراقيون (شكال بهلول ؟؟؟ ) ...عندما يراد القول (احنا كلنالكم بس ما صدكتوا ) ... واليوم اكول لاهلنا ( شكال بهلول ؟؟ ) ...مو الف مرة ...كتبت وكلت يابه سادتنا وتاج راسنا الامريكان جوي يبقون وما راح يطلعون ...لو ينبعث ابونا ادم من جديد ...وحتى لو طلع ديقناووس ...بس محد يصدكني ويصدكون ساستنا ..
احنا جنا نعرف الاحتلال ...امريكي ...بس اليوم كشف الاستاذ نوري المالكي سر مجنت اعرفه وهو ان حلف الناتو ايضا هم موقع على اتفاقية مدربين (من جوة العباية وصنطاوي ) مع حكومة الشراكة اللاوطنية ...والمصيبة يريد الاستاذ نوري ان يدخل المدربين الامريكان جوه خيمة الناتو بحجة هاي الاتفاقية ...غريب من سياسينا يدهدروهه على علاتهه .. فيا استاذ نوري ...شنو شفتنه بلوشية وما نفهم ؟؟؟ المهم نرجع لسالفتنه الاصلية ..
ثبرونا الساسة الكباروالوطنين قادة الكتل السياسية والبالعين كلهم مسجلات تصيح وتبث ليل نهار ...ستنسحب القوات الامريكية المحتلة ولن يمدد لهم رغما عن اف الادارة الامريكية ولن يبقى جندي واحد على ارض العراق الحر المستقل ..والناس المساكين الفقرة واللي على نياتهم تصدك حجيهم ..مو همه ليل مع نهار كال اهل البيت وحجه اهل البيت وكال الخلفاء الراشدين والفقهاء التابعين ,,ووشعارات (هيهات منا الذلة) ...وكال المرجع الفلاني وحجه المرجع الفلتاني...المهم ..واخيرا انبرى قائد الامة المؤمن من اربيل ...ليعلن موقفا صريحا ..نحتاج بقاء قسم من القوات الامريكية ...ومن بغداد تضامن معه ..قائد العراق الاول ... ووكالعادة وحسب قواعد اللعبة احتج الزلم الاخرين من ذوي الاصول المصلاوية والانبارية والتكريتية والكربلائية زالنجفية والحلاوية وحتى البصراوية...يصرحون تصريحات ثورية ويلفون ويدورون ويصرخون ويعيطون ( أبدا لن يبقى جندي امريكي على ارض العراق ونحن احياء يلفطون ويرزقون) ..وخطية اهلنا العراقيين (عرب واكراد ) يصدكون ما يكولوه الزلم ..واحنا اللي لانحل ولا نربط ...نكوللهم ..يابه الامريكان جوي ليبقوا ...والله ما يطلعون ...بس محد يصدك بينا ... يالله شنكدر نسوي أحنا غير بس اللغوة والعربدة الفارغة ...اللي تضرنا وما تنفع الجياع من ابناء شعبنا ...
وفجأة وجرب سمعنا ان الرئيس جل جلاله راح يروح لامريكا ...واخذ مصرف جيب مليونين دولار ( جماله اليوم في مؤتمر رؤساء التحرير يصرح هاي المليونين ما كفت ...وجملهه وصرف من ميزانية الاتحاد الوطني ...يعني حزبه .. عمي هذا شلون حزب اللي يصرف ملايين الدولارات ...اكيد يشتغل تاجر نفط ؟؟) ...وكلنا يلله ..كل الملايين فدوة الك يا عراق !!!! وسمعنا الخطاب التاريخي من منبر الامم المتحدة ... الريس يطلب بقاء القوات الامريكية لتدريب العراقيين ...صدمة ووكعت على روسنا ...عبالك طاوة صفر وضربت راسي ... اخ هاي شنو ؟؟؟ وين المالكي ووينه علاوي والهاشمي والنجيفي والمطلك والحكيم والصدر والافغانستاني وينهم بقية الزلم ...تبين الجماعة فقاعات صابون ...أطك من ينتهي زمنها وتؤدي دورها ...واعلنوا من امريكا ان الرئيس عندما سيعود الى بغداد وسيجتمع برؤساء الكتل السياسية لتوحيد المواقف ... وفعلا عاد بالطائر الميمون الي بغداد سالما غانما يتهادى منتصرا كالطاووس ... وعقد في بيته اجتماع رؤساء الكتل للشراكة اللاوطنية ... وبعد التمصمص والقبلات وشرب الشرابت والقهوات واكل اللذيذ والطيبات من الاكلات والاستماع الى نتائج الاجتماعات والمباحثات صدر البيان التاريخي باسم رؤساء الكتل ووافقوا على بقاء مدربين وبشرط لايمنحون (حصانة ) ... أحم ...أحم ...وانتوا الصادكين ؟؟؟
من المفارقات المبكية المضحكة ...عندما كان الناطق يقرأ البيان ..كان الرئيس جل جلاله واقف الى جنبه وينحني وينظر بامعان بالبيان كأنه يخاف لتعبر او تنسي كلمة ولا تقرأ ... والذي اثار دهشتي في البيان ..نص على ان اتفاق رؤساء يلغي الحاجة الى استحصال موافقة مجلس النواب ... اي رموا الكرة بملعب المالكي حتى لايعترض التحالف الوطني الموالي لايران ولاسيما مقتدى الصدروتصير ضجة اعلامية يستغلها المشاعبون امثالي ..اي بكلمات بسيطة ( طز بالديمقراطية وبمجلس النواب وبالنواب اجمعين ) (واني اكول ...شكال بهلول ؟؟؟ ) ...
اني الفقير لله احترم الامريكان لانهم يحترمون شعبهم ولايكذبون عليه ..ويحترمون قوانينهم ولايلفون ولايدورون ...الحجي عندهم دوغري (مباشر ) ...ولاسيما عندهم وزير دفاع اسمه بانيتا وهذا (رنكو لايتفاهم ) ...صرح من واشنطن ...يجب منح المدربين حصانة (وسيحصل عليها رغما عن انوفنا ).. واليوم المالكي ...يتبلعم ويبرر بتصريحه ... نريد نلكالهم تخريجة للحصانة تحت مضلة اتفاقيتنا مع الناتوا ... احتراما لقوانينهم ...
بصراحة ...وانا كعراقي وقضيت عمري ضابط بالجيش واعرف شنوا التدريب والمدربين والعدد الذي يحتاجه جيش عراقي لاتوجد عنده طائرات ولادبابات ( عن الحلال والحرام عنده 32 دبابة ابرامز )وجم زورق بحري عليه رشاشة ثقيلة (ويسموهه العراقيون طرادات وفرقاطات وربما عند الضرورة يسموها حاملة طائرات )... فهل هذا الجيش يحتاج الى 3400 مدرب (محصن ) ؟؟؟... و16000 جندي بلباس مدني بامرة السفير الامريكي ؟؟؟و28 شركة امنية امريكية ( الله واعلم كم مجموع عدد افرادها ؟؟؟ )...؟؟؟ وكم سيتحمل دافع الضريبة العراقي ( اذا شاف فلوس النفط بعينه ؟؟)
الا تتفقون معي يا اخوتي ممن يقرأ كلماتي هذه ..ان من العيب والخزي والعار على السياسي ان يضحك على شعبه ؟؟؟تضليل ولف ودوران وكذب وتخريجات بمسميات ما انزل الله بها من سلطان ؟؟؟كولوها بصراحة ان الرئيس استلم الاوامر من عمامنا الامريكان ووصلهه النا واحنا لازم ننفذ ...بعد عليش هل اللف والدوران ؟؟؟..عيب على السياسي ينفذ الاوامر صاغرا ذليلا ويدعي انه هو عنتر بن شداد ؟؟؟ وانا اتساءل ... وبعد التوقيع على اتفاقية البقاء لما راح يسمونهم مدربين ؟؟؟ هل ستبقيهم الادارة الامريكية في مناصبهم ؟؟؟ أو ستجري انتخابات جديدة وكش ملك ؟؟؟ انتوا اصبحتوا اكسباير ونحتاج وجوه جديدة ؟؟؟
ولا تنسوا ان الشعب العراقي سيبقى ...اما نحن فراحلون ...
اللهم احفظ العراق واهله اينما حلوا او ارتحلوا
للاطلاع على المعلومات أكثر وذات العلاقة الرجوع الى الروابط التالية :-
http://www.alhurra.com/NewsArticleDetails.aspx?ID=3385209
http://imn.iq/news/view.7370/
http://www.imn.iq/news/view.7297/

#نوري_جاسم_المياحي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل