بلا دراما بلا زراطة ...

وهيب أيوب

الحوار المتمدن-العدد: 3358 - 2011 / 5 / 7 - 21:35
المحور: كتابات ساخرة
    

يا جماعة، لا حدا يستنّى رمضان الجاي دراما ومسلسلات سوريّة، لأنو الفنانين السوريين ولا تقرفوا، كلّون مشغولين عالفضائيات السوريّة ، وغرآنين لشوشتهون هالأيام بإنقاز البلد من الهجمة والمؤامرة يللي عمتنحاك ضدو من كل العالم ، آل لأنو هادا البلد بلد مقاومة وممانعة وبدّون آل يضربو في العيش المشترك، عشان هيك كلّون اليوم تفرّغوا للشغل بالإعلام والتحليل الإخباري والإعلامي والإجتماعي والسياسي والتاريخي والسيكولوجي والإستراتيجي، ولا تنأزوا ...!
كانوا بالإخباريّة السورية قبل كوم يوم، عمّيحطوا تصريحات غسان مسعود بالشريط الإخباري من تحت، يعني خبر عاجل، قول ولا تصريحات بان كيمون، عمّيئول غسان مسعود أنّو سوريا تتعرّض لحرب عالميّة، شوفو التصريح شو أوي ..؟! يعني مصدّق حالو غسان أفندي أنو ولا كلاوزفيتز زمانو، وإنو صار محلل إستراتيجي البركة ...!
ودريد لحام، يعني غوار الطوشة، تاع حارة كل مين إيدو إلو، صار يشتغل بالتفسير القرآني والسنّة، ومش بعيدة يصدر كتاب صحيح الغوّاري بدل الصحيح البخاري ...!
وأخذت مهمة الرد على الشيخ القرضاوي، المعصومة وفاء موصلّلي، والله افتكرتها رابعة العدوية وهي عمتحكي عن التقوى والدين، وكمان ما نستبعد إنها تصدر شي موسوعة بالرد على ابن حنبل وابن تيميّة، لأنو مبيّن عليها متخصّصة بهالشأن وما بفوتها فايتة، حافظه القرآن والسنّة عن ظهر قلب ....!
وسيف الدين سباعي، ألله يخلّلي للبابا رفيق سبيعي، يعني أبو صياح، تاع شرم برم كعب الفنجان، وعالبطاطا وعالبوظة وعالشاي وعالكازوزا، أكيد عرفتوا، سيف ترك الإخراج والتمسيل وصار محلل إعلامي وإخباري من الطراز الرفيع، بس جد يخربيتو شو صاحب ضمير ونباهة، ودأييء بنأل الأخبار وتحليلا، شي بيفلج ...! بعدين منظّر بالشؤون الديمقراطية، ولا فولتير...!
أما سُلاف فواخرجي، بجد طلعت من خرجي، تشكل آسي شو حلوِه، وشو شطّورة بربط الأحداس وتحليلا ، آل درعا منا محاصرة، آل، وفي مرا درعاوية راحت تطلب من واحد من الجنود يجبلها ربطة خبز ...! تسلميلي يا سلّوف شو إنتِ عالبرَكِة وحوبِة ...!
وعباس النوري، ألله ينوّر على جميع خلقو، يعتبر اليوم أهم منظّر بخصوص المؤامرة ، بس فعلاً بعبّي الراس، يا أخي شو هاد، جد إنسان متعدّد المواهب .....!
وجودِه أبوخميس، حرامي الدجاج، يعني باسم ياخور، ، يا أخي شو هالفلته بالسياسة والتحليل الإرتوازي العظيم، عدا عن أنّو ممثل يا أخي، شوف كيف انفعل عقناة الدنيا، وشوف شو هاللهجة الصارمة والحازمة، منشان يفرجيك أنو ما عميتملق ولا عميمسح جوخ ويلحس، جد كان وجهو عابس وبخوّف، ألله يستر...!
وتسلملي أمل عرفة، شو رئيئه وحسّساسة، ما بتحب سفك الدماء، خاصة يللي عمبئوموا فيها العصابات المسلّحة، وبتئول أمّولي، سمعت أنو في مزاهرة بأحد الأحياء، اتصلت برفيئتي، إلتلها في شي مزاهرة عندكون، آلتلي لا ما في شي من هاد، سكّرت التلفون، بعد شوي اتصلت فيي رفيئتي وآلتلي هلأ في مزاهرة، شوفوا هالمعارضة شو ملاعين، أتاري هادا كود لينزلوا ...! مهضومة ما في خواص ... ونفس الأصّة صارت مع سيف سباعي، آل سمع عفضائية مُغرِضة أنو في مزاهرة، آل تلفنت لصاحبي ساكن بالمنطئة، سألتو في شي عندكون، أللي، أبداً ما في شي، بعد نص ساعة كان 300 زلمي عميتزاهروا هونيك، يعني هاي شيفرة متفئين عليها، شوف المؤامرة شوف...!
هَدول بس عيّنة زغيرة من الفنانين السوريين المُحلّلين ...!
يا أخي ما حدا عميهضم، عصام التكروري وطالب ابراهيم وأحمد صوّان، وكل هالأرطة، جد ثقيلين دم وبيكزبوا على عينك يا تاجر، أما هدول الفنانين الشعب بحبّون، ومهضومين يا أخي، حتى لو كزّبوا ،بس بياخدوا العأل....!
يا جماعة، هلأ البلد عبيتعرّض لمؤامرة من الخارج، وشويّة سلفيين وعصابات مسلّحة من الداخل، وعميطخّوا الجيش والأمن بضهرون، يعني من ورا، وعميطخّوا المتزاهرين بالراس والوجه والصدر ، فخلّينا كلّنا كفنانين اليوم نشتغل بالإعلام والتحليل والأخبار، وبلا دراما وبلا زراطة...!

وهيب أيوب
الجولان السوري المحتل / مجدل شمس

#وهيب_أيوب (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل