حوار مع أفقر رجل فى مصر .

عبدالوهاب خضر

الحوار المتمدن-العدد: 987 - 2004 / 10 / 15 - 09:04
المحور: اليسار , الديمقراطية والعلمانية في مصر والسودان
    

قال: إنه لم يعرف من متع الطفولة سوي اللعب في الطين، لم تعرف معدته الزبيب أو التفاح الأمريكاني. أما جسده فمغطي بتراب المقابر التي يعمل بها منذ سنوات لا يتذكر عددها!!

ليس له علاقة من قريب أو بعيد بالحكومة الإليكترونية، فهو لا يفهم حتي الآن في «الويندوز إكس بي» لأحمد نظيف أو «الملفات المفيرسة» أو حتي «شوت داون» حكومات الانفتاح، ولكنه بالفعل يتأثر عندما يضغط هؤلاء المسئولون بقراراتهم السيئة السمعة علي أنفاسنا جميعًا سواء «كليك يمين أو يسار»!!

أحلامه لا تتعدي خط الفقر مثل معظم المصريين، فأهدافه تنحصر في الحصول علي رغيف العيش حتي ولو «حاف»، إذن جسده ليس مربوطًا بقواميس وقوانين تلك الطبيعة ذات الثلاث وجبات الآدمية. فشروق الشمس عنده مثل غروبها والليل يشبه النهار والأحياء والأموات سواء!!

أسند ظهره المحمل بأوجاع هذا الزمان علي إحدي المقابر وضحك ساخرًا وقال لي بالنص: أنا دخلت السجن في طنطا 12 شهرًا لما مسكت إيد واحدة حلوة كانت ماشية في الشارع!!

هو ليس مشاغبا أو بتاع «الكلام إياه» وإنما حاول فقط أن يعمل «بروفة» لتجريب أو إيقاظ أو انتزاع رجولته التي فقدها بسبب ظروفه المأساوية!

هذا الرجل شاهد عيان علي زمن الحق الضائع الذي لا يعرف مقتول فيه من قتله؟ ومتي قتله؟ ورءوس الناس علي جثث الحيوانات والعكس طبقا لكلام عمنا الشاعر صلاح عبد الصبور.

وافق علي تصويره وإجراء حديث صحفي معه فهو من وجهة نظرى ليس بأقل من المسئولين بل أفضل لأنه المواطن والترمومتر الطبيعي لقياس تلك السياسات الفاشلة التي «قصمت» ظهورنا جميعًا علي مدار ربع قرن من هذا الزمان البائس!

إذن وافق الرجل علي الحديث الصحفي دون المقدمات «إياها» للمسئولين، ولكنه وضع يده بقوة علي باب المقبرة التي كنا نجلس أمامها فجأة وقال لي: إنت بتتكلم دلوقتي مع أفقر واحد في مصر، ثم اشترط المواطن الغلبان ألا نتكلم في السياسة أو عن الحكومة وذلك خوفًا من الخفراء وأمناء الشرطة الذين يطاردونه في كل مكان وكأنه مواطن غير مرغوب فيه، وقرر المواطن الضحية أن يتكلم فقط عن حياته وظروفه اليومية فقط، فعشنا معه هذه الرحلة المثيرة:

> انت اسمك إيه؟

>> أنا سعيد.

> علي كده إنت سعيد ومبسوط يا عم سعيد؟

>> لا والله يا أستاذ أنا مش سعيد.

> ليه؟

>> إنت مش شايف، أنا حتي ماشي «حافي» ومعنديش فلوس أشتري «جزمة».

> طيب أنت منين؟

>> أنا من عزبة عمر بطنطا.

> بتشتغل إيه؟

>> أنا عايش في المقابر، ولما أسمع إن فيه حد مات أروح أقف جنبهم وهما بيدفنوه علشان آخد «لقمة» أو اللي يبعته ربنا.

> طيب مهو اللي يبعته ربنا ممكن تشتري منه «جزمة» مثلا؟

>> يا أستاذ دي ربع جنيه أو جنيه بالكتير بيكفيني أكل كام يوم.

> طيب أنت بتاكل إيه؟

>> أحسن أكله عندي هي الفول والطعمية، واللحمة دي بقي من رمضان لرمضان علي موائد الرحمن وكل سنة وأنت طيب.

> طيب قولي فين أولادك ومراتك وكده يعني؟

>> صدقني يا ابني أنا الفقر نساني كل حاجة ومش فاكر امبارح كان إيه ولا الساعة كام دلوقتي ويكفيك شر الجوع والظالمين يا ابني.

الظالمين

> مين الظالمين؟

>> بتوع الشرطة والمباحث كل يوم يطردوني من هنا وساعات يلفقولي «تهم» وعايزيني أشتغل مرشد لهم.

> ليه مروحتش تشتغل مرشد يعني؟

>> أنا فعلا روحت القسم مع واحد كده وبعدين الضابط قالي إنت متنفعشي علشان شكلك وحش ومبتعرفش تقرأ ولا تكتب!!

الحزب الوطني

> انت بتسمع عن الحزب الوطني ومؤتمراته.

>> لأ.

> طيب إيه رأيك في الحكومة؟

>> يعني إيه حكومة؟

> يعني كبار المسئولين والوزراء والقيادة السياسية كده يعني.

>> أنا معرفش عنهم حاجة خالص ومبسمعش عنهم أبدًا.

> ليه إنت مش مواطن؟

>> لا.. هو فيه مواطن في الدنيا كده؟!

> كدة إزاي يعني؟

>> يعني مش لاقي ياكل.. فيه أكتر من كده؟!

> طيب أنت نفسك في إيه!

>> نفسي أموت ومش عارف!

> طيب أنت إيه رأيك في الناس دلوقتي؟

>> الناس بقوا وحشين قوي يا أستاذ.

> يعني إيه؟

>> يعني اللي معاه قرش.. يساوي قرش.

> إنت عارف أني صحفي.. فيه حاجة عايز تقولها والناس تعرفها عنك؟

>> أنت صحفي يعني بتشوف الرئيس مبارك وبتكلمه؟

> يعني حاجة زي كده.

>> طب والنبي يا أستاذ تسلملي عليه قوي.

> حاضر.

انتفض المواطن فجأة عندما سمع صوت المنادي يقول: توفي إلي رحمة الله تعالي عزت متولي سعيد شقيق رجل الأعمال أحمد سعيد ولا عزاء للسيدات فهرول الرجل ناحية المنادي باحثًا عن لقمة العيش.. انتهي الحديث.. وتستمر رحلة المواطن الذي ينام ويأكل ويشرب مع الأموات!!

وتركت هذا المواطن ونسيت أن أعتذر له لأنني خالفت وعدي وتحدثنا عن الحكومة والسياسة.

#عبدالوهاب_خضر (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل